Class 10 Tamil Pothu Katturai : Essays on Computer, Forests, Social Service, and Environment in Tamil

மாணவர்களுக்கான தமிழ் கட்டுரைகள்

(Tamil General Essays for Students)

காலத்தை வெல்லும் கணினி

முன்னுரை:

'அறிவியல் தகவல் வளர்ச்சி உலகத்தை ஒரு சிற்றுராக மாற்றிவிட்டது' என்னும் கூற்று உண்மையே. இதில் கணினியின் பங்கு அளப்பரியது. 20 - ஆம் நூற்றாண்டின் இணையற்ற கண்டுபிடிப்பான கணினி பற்றி இக்கட்டுரையில் காண்போம்.

தோற்றம்:

கணக்கிடுவதற்காக முதலில் எளிதான மணிச்சட்டம் உருவாக்கப்பட்டது. பின்னர், பிளேஸ் பாஸ்கல் என்ற அறிஞர் கணக்கிடும் கருவியைக் கண்டுபிடித்தார். "உள்ளுவதெல்லாம் உயர்வுள்ளல்" என்ற வள்ளுவர் வாக்கிற்கேற்ப கி.பி. 1833 - இல் சார்லஸ் பாப்பேஜ் கணினியை முதலில் வடிவமைத்தார். லேடி லவ்லேஸ் என்பவர் கணிதச் செயல்பாட்டுக்குத் தேவையான கட்டளைகளை வகுத்தார்.

வளர்ச்சி

மின்னியல் துறையில் ஏற்பட்ட வளர்ச்சியால் ஹோவர்டு ஐக்கன் என்பார் எண்ணிலக்கக் கணினியைக் கண்டறிந்தார். இதற்கு ஹார்வார்டு மார்க் - 1 எனப் பெயரிட்டார். இன்றைய நிலையில், பல்லூடக வசதி கொண்ட கணினி மடிக்கணினி கையடக்கக் கணினி எனப் பல்வகைக் கணினிகள் பயன்பாட்டிற்கு வந்துவிட்டன. 'வெள்ளத் தனைய மலர்நீட்டம் மாந்தர்தம் உள்ளத் தனைய துயர்வு' என்ற குறளுக்கேற்ப தற்போது அமெரிக்காவும் ஜப்பானும் மீத்திறன் கணினியை உருவாக்கப் போட்டியிடுகின்றன.

இணையம்:

இணையம் என்னும் வடிவத்திற்கு வித்திட்டவர் ஜான் பாஸ்டல் ஆவார். முதலில், ஒரு கணினியில் இருந்து மற்றொரு கணினிக்குச் செய்தியை மாற்ற மின்காந்த நாடாவைப் பயன்படுத்தினர். பின்னர், குறும்பரப்பு வலைப்பின்னலும் அதனைத் தொடர்ந்து அகன்ற பரப்பு வலைப்பின்னலும் உருவாக்கப்பட்டன. உலகம் முழுமைக்குமான வலைப்பின்னல் இணையம் எனப் பெயர் பெற்றது.

இணையதள வசதி:

இணையதளச் சேவையைப் பயன்படுத்தத் தேவையானவை, கணினி , தொலைபேசி, இணையச் சேவை வழங்குநர், மாற்றி, தொடர்பு மென்பொருள் பிம்பெர்னர் லீ இணையதளத்திற்கு உலகளாவிய வலைப்பின்னல் எனப் பெயரிட்டார். இதனை வையக விரிவு வலை எனவும் அழைக்கலாம். வீட்டில் இருந்தபடியே உலகத்தைப் பார்க்க, பழக, மகிழ இணையம் உதவுகிறது.

கணினி வழிக் கல்வி:

கணினியைப் பயன்படுத்தி, வீட்டில் இருந்தபடியே தமிழ், ஆங்கிலம், கணிதம், அறிவியல்,வானியல், வரலாறு, புவியியல், பொது அறிவு, நடனம், கைவேலைப்பாடு என எந்த ஒன்றையும் கற்றுக்கொள்ள இயலும். கணினி வழியாக மொழியின் அடிப்படைத் திறன்களான கேட்டல், பேசுதல், வாசித்தல், எழுதுதல் தொடங்கி உயர்நிலைத் திறன்களையும் கற்க இயலும். தமிழ் இணையப் பல்கலைக் கழகமும், தமிழம் என்ற இணையதளமும் இவற்றைக் கற்றுத் தருகின்றன.

பயன்படும் துறைகள்:

வணிகம், அறிவியல் தொழில்நுட்பம், தொலைத்தொடர்பு, கல்வி,மருத்துவம், விண்வெளி, பாதுகாப்பு முதலிய பலவறு துறைகளில் கணினி பயன்படுகிறது. பேருந்து நிலையங்கள், வங்கிகள், கல்வி நிலையங்கள், உணவகங்கள் என எவ்விடத்தும் கணினியின் ஆட்சியே நிலவுகிறது. இது வேலைவாய்ப்புகளை விரிவுபடுத்தி, மக்களின் வாழ்க்கைத்தரம் உயரத் துணை செய்கிறது.

உலகம் உள்ளங்கையில்:

“கடந்த இருபதாண்டுக் கணினிப் பயணத்தில் இணையத்தின் பங்கு மிகச் சிறந்தது என்றே சொல்வேன்” என்கிறார் கணினி வல்லுநர் பில்கேட்ஸ். கணினியும் இணையமும் உலகத்தையே நம் உள்ளங்கையில் கொண்டு வந்துள்ளன.

முடிவுரை:

அறிவை விரிவு செய்வதற்கும் உலகத் தொடர்பிற்கும் சிறந்த வாயிலாகத் திகழும் கணினி உண்மையில் 'காலத்தை வென்ற கணினியே'. இக்கணினியை நாமும் கற்று, ஆக்க வேலைக்கு மட்டும் பயன்படுத்தி வாழ்வில் வளம் பெறுவோமாக.

காடுகளும் அவற்றின் பயன்களும்

முன்னுரை .

இயல்பாகத் தோன்றுவதே இயற்கை. அவ்வியற்கை அளித்த செல்வங்களுள் ஒன்று காடு. அது மக்களால் ஆக்கப்படுவது அன்று; மழையால் வளர்ந்தது. மழையை ஆக்கும் ஆற்றலைப் பெற்றது. அக்காட்டைப் பழந்தமிழ் மன்னர்கள் தங்களுடைய நால்வகை இயற்கை அரண்களுள் ஒன்றாகக் கொண்டிருந்தனர். காடும் காடு சார்ந்த இடத்தையும் முல்லை நிலம் என்றனர். ஆகவே, பழங்காலம் முதல் காடு நாட்டிற்கு ஓர் உறுப்பாக அமைந்துள்ளது. ஒரு நாட்டின் சிறப்புக்கு - வளத்துக்கு காடு மிகவும் இன்றியமையாத ஒன்றாகும்.

காடுகள்

மரங்கள் அடர்ந்த நிலப்பகுதி காடு என்று அழைக்கப்படுகிறது. தமிழில் வனம், கானகம், அடவி, புறவு, பொதும்பு போன்ற பல சொற்களால் இது குறிக்கப்படுகிறது. தற்போதைய நிலையில் புவி மேற்பரப்பின் 9.4% அல்லது மொத்த நிலப்பரப்பின் ஏறத்தாழ 30% காடுகளினால் மூடப்பட்டுள்ளது. முன்னர் காடுகள் நிலப்பரப்பின் 50% வரை மூடியிருந்ததாக மதிப்பிட்டுள்ளனர். உலகின் பல பகுதிகளிலுமுள்ள காடுகள் காற்றிலுள்ள கரியமில வாயுவை உட்கொள்கின்றன உயிர்க்கோளத்தில் முக்கியமான அம்சமாக விளங்கும் காடுகள், பல உயிரினங்களுக்குப் புகலிடமாக விளங்குகின்றன. காடுகள் வெள்ளப் பெருக்கைக் கட்டுப்படுத்துவதுடன் மண் அரிப்பையும் தடுக்கின்றன. காடுகளில் வெப்ப மண்டலக் காடுகள், அகன்ற இலைக் காடுகள், வறண்ட காடுகள் எனப் பலவகை உண்டு. அவை இயற்கை அமைப்புக்கும், அங் ஏற்படும் தட்ப வெப்ப நிலைக்கும், மழைக்கும் ஏற்ப அமையும்.

மழை பொழிவுக்கு உதவும் காடு

"கடல் நீர் சூரிய வெப்பத்தால் ஆவியாக மாறி வானத்தில் இருக்கும்போது, காடுகளே அவற்றைக் குளிர்ச்சி அடையச் செய்து மழையைப் பெய்விக்கின்றன' என்பது விஞ்ஞானிகள் கண்டறிந்த உண்மை. காடுகளே திரண்டெழுந்த மேகங்களைத் தடுத்து மழையைப் பெய்விக்கின்றன. இதனால், மழைப் பொழிவுக்குக் காடுகளே உதவுகிறது என்பதை அறியலாம்.

காடுகளின் பயன்

பூமியின் உயிர்க்கோளத்தின் மொத்த முதன்மை உற்பத்தித்திறனில் 75% காடுகள் கொண்டிருக்கின்றன, மற்றும் பூமியின் மொத்த உயிரினத்தொகுதியில் 80% ஐ கொண்டிருக்கின்றன. காட்டு நிலங்கள் கால்நடைகளுக்கு நல்ல மேய்ச்சல் நிலம் ஆகின்றன. வீடு கட்ட, அடுப்பு எரிக்க, வாழ்க்கைக்குத் தேவையான பொருள்களை உண்டாக்கிக் கொள்ளக் காட்டு மரங்கள் பயன்படுகின்றன. தழைகள் உரமாகின்றன. இலை தழைகள், பூக்கள், செடி கொடிகள், வேர்கள், மரப்பட்டைகள் முதலியன பிணி போக்கி உயிர் காக்கும் சிறந்த மருந்துப் பொருள்களாகப் பயன்படுகின்றன. காடுகளிலிருந்து யானைத் தந்தம், மான் தோல், மான் கொம்பு, தேன், அரக்கு, மெழுகு, பிரம்பு, தோல், தோல் பதனிடும் பொருள்கள் முதலிய விலைமதிக்க இயலாத பொருள்கள் கிடைக்கின்றன. காடுகள் வெள்ளப் பெருக்கினைக் கட்டுப்படுத்துகின்றன. மண் அரிப்பினைத் தடுத்து நிறுத்துகின்றன. தட்ப வெப்ப நிலைகளைச் சமப்படுத்துகின்றன.

காடுகள் அழிய காரணம்

வியாபார நோக்கும், சுயநலமும், பேராசையும் வளர்ந்ததால், பட்ட மரங்களை மட்டும் அல்லாமல், பச்சை மரங்களையும் வெட்டினர். காபி, தேயிலை, ஏலம், திராட்சை, முந்திரி, ஆப்பிள், வாழை, உருளை போன்ற பயிர்களைப் பயிரிடவும் காடுகளை அழித்தனர். ஏழை எளியவர்கள் தம் வயிற்றுப் பிழைப்புக்காகச் சிறுசிறு பகுதிகளை அழித்தனர். புயலும் தீயும் கூடச் சில சமயம் காடுகளை அழித்தன.

மரம் நடுதலின் தேவை

வீட்டுக்கு ஒரு மரம் வளர்ப்போம் என்பது அன்றைய வாசகம். ஆனால் ஆளுக்கு ஒரு மரம் வளர்க்க வேண்டிய தேவை இன்று ஏற்பட்டுள்ளது. மரங்கள் இயற்கையின் கொடை. பணம் சேமிப்பதும் சொத்து சேர்த்து வைப்பது மட்டும் நம் அடுத்த தலைமுறைக்கு செய்யும் கடமை அல்ல. நாம் வாழும் இந்த பூமியை சுத்தமானதாகவும் ஆரோக்கியமானதாகவும் வளம் மிக்கதாகவும் அவர்களுக்கு கையளிக்க வேண்டும். இதற்கு நாம் செய்ய வேண்டியது மரம் வளர்ப்பதும் மரம் வளர்ப்பதன் முக்கியத்துவம் பற்றி அவர்களுக்கு அறிய வைப்பதும் ஆகும்.வனத்துறையினர் ஒவ்வோர் ஆண்டும் ஜூலைத் திங்கள் முதல் வாரத்தில், மரம் நடு விழாவைக் கொண்டாடி வருகின்றனர். பற்பல இடங்களில் மரங்களை வைத்து வளர்த்து வருகின்றனர். 'சமுதாய நலக் காடுகளையும் அமைத்து வருகின்றனர். சட்டத்தின் மூலமாகக் காட்டின் அழிவைத் தடுத்துக் காப்பாற்றி வருகின்றார்கள்.

முடிவுரை

நாட்டு வளம் காட்டு வளத்தில் அடங்கியுள்ளது. அக்காட்டினால் நாம் நன்மை அடைகின்றோம். ஆதலால் 'நல்ல காடு வளர்ப்போம்' என்ற கவி பாரதியின் வாக்குப்படி காடுகளை வளர்த்துக் கண்போல் காப்பது நம் கடமையாகும்.

மாணவரும் சமூகத் தொண்டும்

முன்னுரை:

'எல்லாரும் இன்புற்றிருக்க நினைப்பதுவே அல்லாமல் யாதொன்று அறியேம் பராபரமே'என்பது தாயுமானார் வாக்கு. தனக்காக மட்டும் இன்றிப் பிறருக்காகவும் பாடுபடுவதே. எல்லாரும் இன்புற்றிருப்பதற்கு உரிய வழியாகும். இந்த நல்லுணர்வு இளமைப் பருவத்திலேயே மாணவர் இதயத்தில் ஊட்டப்பட வேண்டும்.

மாணவர் கடமை :

எதிர்கால இந்தியா மாணவர் கைகளில் தான் உள்ளது என்றார் பண்டித நேரு. ஆகவே அவர்களுக்கு வெறும் ஏட்டுக் கல்வி மட்டும் பயன் தராது. நாடு எனக்கு என்ன செய்தது? என்று எண்ணுவதை விடுத்து நாட்டுக்கு நாம் என்ன செய்தோம்? என்று எண்ணினால் சமூகத் தொண்டு ஆர்வம் தானாகவே முகிழ்க்கும்.

பெற்றோர்பேணல்:

பெற்றோரை மதிப்பது மாணவரின் முதல் கடமை. நமக்காக உழைத்து உழைத்து உருக்குலைந்த பெற்றோரை இன்று முதியோர் இல்லங்களுக்கு அனுப்பும் வன்கொடுமை நாடெங்கும் பரவிக் கிடக்கிறது. பெற்றோரைப் பேணாதவன் நாட்டு நலனில் எவ்வாறு அக்கறை காட்ட இயலும்?

கல்வித் தொண்டு:

கல்வியில் பின்தங்கியுள்ள நம் இந்தியத் திருநாடு கற்றவர் மிக்க நாடாக மாற வேண்டுமானால் ஒரு மாணவன் ஒரு ஏழைக்கு எழுத்தறிவித்தால் போதும். ஐம்பது விழுக்காடாக உள்ள நம் நாட்டுக் கற்றோர் அளவு விரைவில் நூறு விழுக்காடாக உயர்ந்து விடும். இதற்கு உதவ அறிவொளி இயக்கத்தைப் பயன்படுத்திக் கொள்ளலாம்.

பொதுத் தொண்டு:

மாணவர்கள் தொண்டாற்றுவதற்கு என்றே பள்ளிகளில் மாணவர் செஞ்சிலுவைச் சங்கம், சாரணர் இயக்கம், நாட்டு நலப்பணித் திட்டம், தேசிய இளைஞர் படை போன்ற அமைப்புகள் ஏற்படுத்தப்பட்டுள்ளன. அவற்றுள் ஏதேனும் ஒன்றையேனும் தேர்ந்தெடுத்துப் பழகி தொண்டில் முன் நிற்க முயல வேண்டும்.

மொழி வளர்ச்சி

தாய்மொழிவளர்ச்சியில் மாணவருடைய பங்கு முக்கியமானதாகும். ஆங்காங்கே தமிழ் மன்றங்கள் ஏற்படுத்த வேண்டும். அங்கே முத்தமிழும் முழங்குமாறு செய்ய வேண்டும். பட்டி மன்றங்கள், இலக்கியச் சொற்பொழிவுகள், இலக்கிய வகுப்புகள் முதலியன நடத்தி மக்கள் இதயத்தே தமிழார்வத்தையும் தமிழறிவையும் வளர்க்க முன் வர வேண்டும்.

பிற தொண்டுகள்:

அரசாங்கத்தின் திட்டங்களை அறியாமை மிகுந்த மக்களுக்கு விளக்கிக் கூறி அவர்களை நாட்டு நலனில் நாட்டமுள்ளவர்களாக மாற்ற வேண்டும். சிறு சேமிப்பு, தேசிய சேமிப்புப் பத்திரங்கள் வாங்குதல், நோய் தடுக்கும் முறைகள், குடும்ப நலத் திட்டம், சட்டங்களை மதித்தல், சாதி வேறுபாடு பாராட்டாமை, வரதட்சணை மறுத்தல் முதலியன பற்றி அவர்களுக்கு எடுத்துக் கூறி நல்வழிப்படுத்த வேண்டும்.

அரசியலும் மாணவரும் :

அரசியல் செய்திகளை மாணவர்கள் அறிந்து கொள்வது மிகவும் நல்லது. ஆனால் அரசியலில் சேர்ந்து நேரடி நடவடிக்கைகளில் ஈடுபடுவது குளிக்கப்போய் சேற்றைப் பூசிக் கொண்ட நிலையாக முடிந்து விடும். அத்தகைய மாணவர்களைத் திசை திருப்புவது அறிவறிந்த மாணாக்கரின் கடமையாகும்.

முடிவுரை:

வருங்கால அரசியல் தலைவர்களாகவும், அமைச்சர்களாகவும். அறிஞர்களாகவும், தொண்டர்களாகவும் விளங்க இருக்கும் மாணவர்களாகிய நாம் 'என் கடன் பணி செய்து கிடப்பதே' என்ற குறிக்கோள் கொண்டு வீட்டுக்கும் நாட்டுக்கும் பயன்பட வாழ்வோமாக.'அன்பர்பணி செய்யஎன்னை ஆளாக்கி விட்டு விட்டால் இன்பநிலை தானே வந்தெய்தும்'

சுற்றுச்சூழல் பாதுகாப்பு

முன்னுரை:

அறிவியலும் தொழில் நுட்பமும் உச்சத்தில் இருக்கும் இன்றையகாலத்தில், சுற்றுச்சூழல் மாசும் உச்சத்தில் உள்ளது. சீனா, இந்தியா உள்ளிட்ட நாடுகளில் காற்று மாசு அளவுகடந்து சென்று சிவப்பு எச்சரிக்கை விடும் நிலைக்கு சென்றது. 21-ஆம் நூற்றாண்டில் உலகம் தனது இயற்கை அழகை மெல்ல மெல்ல இழந்து வருகிறது. சுற்றுச் சூழல் குறித்து இக்கட்டுரையில் காண்போம்.

சுற்றுச்சூழல் சீர்கேடு:

மனிதன் பண ஆசை கொண்டு இயற்கையைச் சீரழிப்பதால் சுற்றுச்சூழல் சீர்கெட்டு வருகிறது. எங்கும் குப்பையும் கழிவுநீரும் நச்சுப் புகையும் நிறைந்து வாழ்க்கையைக் கேள்விக்குறியாக்கியுள்ளது காடுகளெல்லாம் கட்டிடமாவதால் காற்றும் நிலமும் நீரும் நஞ்சாக மாறி வருகின்றன.

காற்று மாசு:

பெருகி வரும் வாகனங்களும் தொழிற்சாலைகளும் வெளியிடும் நச்சுப் புகையால் காற்று மாசடைந்து வருகிறது. மேலும் நெகிழி, ரப்பர் போன்ற பொருள்களை எரிப்பதாலும் காற்று மாசடைகிறது. காற்று மாசடைவாதால், காற்றின் வெப்ப அளவு உயர்கிறது. இது ஓசோன் படலத்தை பாதிக்கிறது. ஓசோன் படலம் ஓட்டையாவதால் புறஊதாகதிர் தாக்கம் அதிகமாகிறது.

நீர் மாசு:

"நீரின்றி அமையாது உலகு" என்கிறார் வள்ளுவர். ஆனால், தோல் மற்றும் சாயத் தொழிற்சாலைகளில் இருந்து வெளியேறும் நச்சக் கழிவுநீர் ஆறு, குளங்களில் கலப்பதால் நீர் மாசடைகிறது. இதனால் பாலாறு பாழாறு ஆகிவிட்டது. மேலும் விவசாயத்திற்குப் பயன்படுத்தும் இரசாயன உரங்கள் மற்றும் பூச்சிக்கொல்லி, களைக்கொல்லி மருந்துகளால் நிலத்தடி நீரும் மாசடைகிறது.

நிலம் மாசு:

தொழிற்சாலைகளில் இருந்து வெளியேறும் நச்சக் கழிவுநீரும் இரசாயன உரங்கள் மற்றும் பூச்சிக்கொல்லி, களைக்கொல்லி மருந்துகளும் மண்ணை மாசுபடுத்துகின்றன. அங்கிங்கெனாதபடி எங்கும் நீக்கமற நிறைந்திருக்கும் நெகிழிப் பைகள் மண் வளத்தைக் கெடுக்கின்றன.

ஒலி மாசு:

அளவிற்கு அதிகமான பேரோசையே இரைச்சல் எனப்படுகிறது. அதிக சத்தத்துடன் ஒலிப்பெருக்கிகளைப் பயன்படுத்துவது, தொழிற்சாலைகள், வாகனங்கள், ஒலி பெருக்கிகள் உண்டாக்கும் இரைச்சல் ஆகியவற்றால் ஒலி மாசு உண்டாகிறது. இது நமது மன அமைதியையும் நலத்தையும் பெரிதும் பாதிக்கிறது.

சூழலைக் காக்கும் முறைகள்:

தொழிற்சாலைகளிலிருந்து வெளியேறும் நச்சுக்கலந்த நீர் மற்றும் புகையைச் சுத்திகரித்தபின் வெளியேற்ற வேண்டும். இயற்கைக்குக் கேடு விளைவிக்கும் செயற்கை உரங்களைத் தவிர்த்து இயற்கை உரங்களைப் பயன்படுத்த வேண்டும். நெகிழிப் பைகளை முற்றிலும் தடைசெய்ய வேண்டும். விழாக்களில் பயன்படுத்தும்ஒலிப்பெருக்கிகளால் ஒலி மாசு ஏற்படாமல் பார்த்துக்கொள்ள வேண்டும். மட்கும் குப்பைகளை உரமாகப் பயன்படுத்தலாம்.

முடிவுரை:

நிலம்,நீர்,காற்று ஆகிய மூன்றையும் மாசுபடாமல் காப்பது நம் வாழ்க்கையைக் காப்பது போன்று ஆகும். எனவே சுற்றுச்சூழலை பேணுவது நம் ஒவ்வொருவரின் கடமையாகும். இனியாவது சூழலைக் காத்து இயற்கையோடு இணைந்து வாழ முயல்வோமாக. "ஐம்பூதங்கள் வீணாகாமல் மிச்சமாக்குவோம் - நமஎதிர்காலத் தலைமுறையின் அச்சம் போக்குவோம்"

மழை நீர் சேமிப்பு

முன்னுரை :

உலகில் உள்ள எல்லா உயிர்களும் வாழ்வதற்கு மழை இன்றியமையாததாகிறது. மழைநீரை சேமிக்க தவறியதால் இன்று நாம் லாரியில் வரும் தண்ணீரை பிடிப்பதற்கு பல மணி நேரம் தினமும் செலவிட நேருகிறது, அதனால் இன்றைய காலகட்டத்தில் மழை நீர் சேமிப்பு மிகவும் அவசியமானது,

மழைநீர் சேமிப்பு :

நீரின்றி அமையாது உலகு என்கிறார் வள்ளுவர். பூமியானது 72 சதவீதம் நீர் நீர் நிறைந்திருந்தாலும் நன்னீர் என்பது ஒரு சதவீதம் அளவே உள்ளது. அந்த ஒரு சதவீத்த நன்னீரும் மனிதனால் மாசடைந்து வருகிறது. மூன்றாம் உலகப் போர் ஒன்று வருமானால் அது தண்ணீராலேதான் வரும் என்று அறிஞர் பெருமக்கள் கூறுகின்றனர். உலகம் முழுவதிலும் தண்ணீர் தட்டுபாடானது பெருகி வருகிறது. இப்படியே சென்றால் மனிதன் உப்புக் கடலின் நடுவே தாகத்திலே உயிரிழக்க வேண்டியது வரும். இவற்றைத் தடுக்க வேண்டும் என்றால் மழைநீரை வீணாக்காமல் வீடுகளிலும் கட்டடம் இருக்கின்ற பகுதிகளிலும் மழைநீர் சேமிக்கும் தொட்டிகளை அமைத்து சேகரிக்க வேண்டும். வீணாகும் மழைநீரினை மடை மாற்றி நிலத்திற்குள் அனுப்புகின்ற பொழுது நிலத்தடி நீர் மட்டம் உயர்ந்து மனிதர்களுக்கு அது பயனளிக்கும்

தொட்டி அமைக்கும் முறை :

மழை நீரை சேமிப்பதற்கு முதலில் மண் வகையை ஆராய வேண்டும். மணற்பாங்கான நிலமாக இருந்தால் சுமார் மூன்று அடி ஆழத்திற்கு பள்ளம் தோண்டி கூழாங்கற்களால் அல்லது செங்கல், ஜல்லி கொண்டு நிரப்ப வேண்டும். அதிக தண்ணீர் சேமிக்க வேண்டுமெனில் தொட்டியை அகலமாகவும், ஆழமாகவும் அமைக்க வேண்டும். செம்மண் கரிசல்மண் போன்றவை தண்ணீரை சற்று குறைவான வேகத்தில் உறிஞ்சும் தன்மையுடையவைகள், எனவே இம்மாதிரியான மணலில் சற்று அகமான மற்றும் ஆழமான தொட்டியை அமைப்பதே சிறந்ததாகும்.

சேமிக்கத் தவறினால்

நாம் மழை நீரை வீணாக்குவதால்,நாட்டில் தண்ணீர் தட்டுப்பாடு வருவதோடு மட்டுமல்லாமல், நிலத்தடியில் உள்ள நீர்வளம் குறையத் தொடங்குகிறது. இதன் விளைவாக. பல இடங்களில் விவசாயம் பாதிக்கப்படுகிறது. மேலும், நீர்வளம் குறைவதால் நிலத்தில் வெடிப்பு ஏற்படுகிறது. நிலமும் இறுக்கத்தன்மையை இழந்து வறண்டு அடிக்கடி நில அதிர்வுகள் ஏற்பட வழிவகுக்கிறது.

கடமை

பெற்றோர்கள் தங்கள் குழந்தைகளுக்குச் சொத்துக்களை சேமித்து வைப்பது போல் மழைநீரையும் சேமித்து வைக்க வேண்டும். அதில் அவர்கள் ஆர்வம் காட்ட தொடங்கவில்லையென்றால் பாதிக்கப்படுவது பிள்ளைகளே ! எனவே மிக சரியான முறையில் மழை நீர் தொட்டியை அமைக்க வேண்டும்.

முடிவுரை:

"மாரியல்லாது காரியம் இல்லை" என்ற கருத்தை மனதில் கொண்டு தமிழக அரசு மேற்கொண்ட நடவடிக்கைகள் மூலம் மக்கள் தங்கள் வீடுகள், கடைகள், தொழிற்சாலைகள் மற்றும் நிறுவனங்கில் மழைபெய்யும்போது அதை சேகரிக்கும் வசதியை ஏற்படுத்தியுள்ளனர். எல்லாவற்றிற்கும் மேலாக மழைநீரின் பெருமைகளையும் அதை சேமிக்கும் முறைகளையும் அறிய வேண்டியதே ஒரு நல்ல குடிமகனின் கடமையாகும்.

கட்டுரைகள் தொகுப்பு

For more 10th Tamil - Pothu Katturaigal, visit

தமிழகத் தவப்புதல்வர்
இயற்கையைப் போற்று
உழவெனும் உன்னதம்
புயலிலே ஒரு தோணி

The Art of Translation: An Essay on Enriching the Classical Tamil Language

நடுப்பக்கக் கட்டுரை

செம்மொழித் தமிழுக்கு வளம் சேர்க்கும் மொழிபெயர்ப்புக் கலை

தமிழின் இலக்கிய வளம் - கல்வி மொழி - பிறமொழிகளில் உள்ள இலக்கிய வளங்கள் -அறிவியல் கருத்துகள் - பிற துறைக் கருத்துகள் - தமிழுக்குச் செழுமை.

மேற்கண்ட குறிப்புகளைக் கொண்டு 'செம்மொழித் தமிழுக்கு வளம் சேர்க்கும் மொழிபெயர்ப்புக் கலை' என்ற தலைப்பில், வார இதழ் ஒன்றுக்கு நடுப்பக்கக் கட்டுரை எழுதுக.

முன்னுரை

ஒரு மொழியில் ஏற்படும் புதுமைகளை வேற்று மொழிக்கு கொண்டு வரும் அரிய பெரிய கலையே 'மொழிபெயர்ப்புக்கலை' ஆகும். மொழிபெயர்ப்புச் செய்யப்படும் பொழுது மூல மொழி சார்ந்துள்ள சமுதாயப் பின்னணியை எண்ணிப் பார்ப்பது அவசியமானது.

"பிறநாட்டு நல்லறிஞர் சாத்திரங்கள் தமிழ்மொழியிற் பெயர்த்தல் வேண்டும்... சென்றிடுவீர் எட்டுத் திக்கும் கலைச் செல்வங்கள் யாவும் கொணர்ந்திங்கு சேர்ப்பீர்"

என்ற பாரதியின் கருத்துகள் மொழிபெயர்ப்பின் இலக்குக்கு வழிகாட்டுகின்றன.

தமிழின் இலக்கியவளம்

வாழ்வியலுக்கு இலக்கணம் வகுத்து நெறியோடு வாழ்ந்த தமிழரின் சங்க இலக்கியங்கள், அறக்கருத்துக்களை வலியுறுத்தும் பதினெண்-கீழ்க்கணக்கு-நூல்கள், ஐம்பெருங்காப்பியங்கள், பக்திப் பாடல்கள், சிற்றிலக்கிய வடிவங்கள், மரபுக்கவிதைகள், சந்தப் பாடல்கள், புதுக் கவிதைகள், புதினங்கள் எனத் தமிழின் இலக்கிய வளத்திற்கு சான்றுகள் பலவாகும்.

மேலும் மொழிபெயர்ப்பு இலக்கியங்களான இராமாயணம், மகாபாரதம், பெருங்கதை, கொங்குவேளிர் மாக்கதை, சீவக சிந்தாமணி, நளவெண்பா, தண்டியலங்காரம், வில்லிபாரதம் போன்றவையும் இவற்றுள் அடங்கும்.

கல்வி மொழி

மொழிபெயர்ப்பைக் கல்வியாக ஆக்குவதன் மூலம் அனைத்துலக அறிவையும் நாம் எளிதில் பெற முடியும். பல அறிவுத் துறைகளுக்கும் தொழில் துறைகளுக்கும் வெளிநாட்டவரை எதிர்பார்க்காமல் நாமே நமக்கு வேண்டிய அனைத்தையும் உருவாக்கிக்கொள்ள முடியும்; மனித வளத்தை முழுமையாகப் பயன்படுத்த முடியும்; வேலைவாய்ப்புத் தளத்தை விரிவாக்க முடியும்; நாடு, இன, மொழி எல்லைகளைக் கடந்து ஓருலகத்தன்மையைப் பெற முடியும். வெளிநாட்டு தூதரகங்கள் தங்களுடைய இலக்கியம், பண்பாடு, தொழில் வளர்ச்சி போன்றவற்றைத் தத்தம் மொழிகளில் கற்றுக் கொடுக்கின்ற முயற்சியை மேற்கொண்டு வருகின்றன. தனியார் நிறுவனங்களும் பள்ளிகளும் கல்லூரிகளும் பல்கலைக்கழகங்களும் பிற மொழிகளைக் கற்கும் வாய்ப்புகளை உருவாக்கித் தருகின்றன.

பிறமொழிகளில் உள்ள இலக்கிய வளங்கள்

பிற மொழி இலக்கியங்களை அறிந்துகொள்ளவும் அவை போன்ற புதிய படைப்புகள் உருவாகவும் மொழிபெயர்ப்பு உதவுகிறது. ஆங்கிலேயரின் வருகைக்குப் பின் ஆங்கில நூல்களும், ஆங்கிலம் வழியாகப் பிற ஐரோப்பிய மொழி நூல்களும் அறிமுகமாயின. மொழிபெயர்ப்பு இல்லை என்றால் ஷேக்ஸ்பியரோ, கம்பரோ, தாகூரோ உருவாகியிருக்க முடியாது.

ஷேக்ஸ்பியரின் நாடகங்கள் தமிழாக்கம் செய்யப்பட்டதன் விளைவு, பல நாடகமேடை அமைப்புகள் உருவாகின. மேலைநாட்டு இலக்கியச் சார்புதான் நமது தமிழ் இலக்கியத்தின் புதிய வரவுகளான புதினம், சிறுகதை போன்ற வடிவங்களுக்குப் படிநிலையாகும். வால்ட் விட்மனின் 'புல்லின் இதழ்கள்' ஏற்படுத்திய கவிதைத் தாக்கம் தமிழ்ப்புதுக்கவிதை மாளிகைக்கு அடிக்கல் நாட்டியது. ஜப்பானிய ஹைக்கூக் கவிதைகள் நமது ஹைக்கூக்கவிதை வளர்ச்சிக்கு வித்திட்டது. மொழிபெயர்ப்பு மூலம் இலக்கியத் திறனாய்வு முறைகளை ஆங்கிலத்திலிருந்து பெற்றுள்ளோம்.

அறிவியல் கருத்துகள்

தாமஸ் ஆல்வா எடிசன், ஐசக் நியூட்டன், ஆர்க்கிமிடிஸ், கலிலியோ போன்ற அறிஞர்பெருமக்களின் கண்டுபிடிப்புகள் தமிழில் மொழிபெயர்க்கப் பெற்றபின் அறிவியல் வளர்ச்சியில் பெரும் திருப்பம் ஏற்பட்டது. மரத்திலிருந்து கனிந்த பழம் விழுவதையும் பழத்திற்காக எறிந்த கல் நிலத்தை சென்றடைவதையும் கண்டுகளித்த மக்கள், நியூட்டனின் இயற்பியல் விதிக்குப் பின்னர்தான் அது 'புவியீர்ப்பு சக்தி' என்பதை அறிந்தனர்.

பிறதுறைக் கருத்துகள்

இன்றைக்குப் பல்வேறு துறைகளின் வளர்ச்சிக்கு மொழிபெயர்ப்பு தேவைப்படுகிறது. மொழிபெயர்ப்பு இல்லை எனில் உலகை எல்லாம் வலையாகப் பிடித்திருக்கின்ற ஊடகத்தின் வளர்ச்சி இல்லை. தொலைக்காட்சி, வானொலி, திரைப்படம், இதழ்கள் போன்ற ஊடகங்கள் மொழிபெயர்ப்பால்தான் வளர்ச்சி பெறுகின்றன. விளம்பர மொழிக்கு மொழிபெயர்ப்பு தேவைப்படுகிறது. திரைப்படங்கள், தொலைக்காட்சித் தொடர்கள் ஆகியன மொழிமாற்றம் செய்யப்பட்டு அனைத்து மொழி பேசும் மக்களையும் அடைகிறது. இதனால் புதுவகையான சிந்தனை மொழிக் கூறுகள் பரவுகின்றன.

தமிழுக்குச் செழுமை

மொழிபெயர்ப்பினால் புதிய சொற்கள் உருவாகி மொழிவளம் ஏற்படுகிறது. பிற இனத்தவரின் பண்பாடு, நாகரிகம், பழக்க வழக்கம் போன்றவற்றை அறியமுடிகிறது. அதிலிருந்து நல்லனவற்றை நாம் பெற்றுக்கொள்ள முடிகிறது. அதன்மூலம் நம் இலக்கியத்தை வளப்படுத்த முடிகிறது. உலகப் புகழ்பெற்ற அறிவியல் கண்டுபிடிப்புகளையும் இலக்கியப் படைப்புகளையும் அறிவதற்கு வாய்ப்பு ஏற்படுகிறது. நல்ல மொழிபெயர்ப்பாளன் சில விதி மீறல்களைச் செய்வான். இதன் மூலம் புதிய இலக்கண விதிகளின் தேவையை உருவாக்குவான். இதன் மூலம் மொழியில் புதுக்கூறுகள் உருவாகி, மொழிவளர்ச்சிக்கு வழிவகுக்கும்.

முடிவுரை

பிற மொழி இலக்கியங்களை அறிந்துகொள்ளவும், அவை போன்ற புதிய படைப்புகளை உருவாக்கவும் மொழிபெயர்ப்பு உதவுகிறது. இலக்கியம் என்பது தன் அனுபவத்தை எழுதுவது என்றாலும் அது கலைச் சிறப்புடையதாக இருக்கும் போது அனைவரது அனுபவமாகவும் பொதுநிலை பெறுகிறது. அத்தகைய பொதுநிலை பெற்ற இலக்கியத்தை மொழிவேலி சிறையிடுகிறது. மொழி வேலியை அகற்றும் பணியை மொழிபெயர்ப்பு செய்கிறது. எனவே, செம்மொழித் தமிழுக்கு மொழிபெயர்ப்புகலையானது வளம் சேர்க்கும் என்பது திண்ணம்.

Speech on Student Life and Patriotism (Manava Paruvamum Nattupatrum)

மாணவப் பருவமும் நாட்டுப் பற்றும்: 8 மதிப்பெண் மேடை உரை

வினா (Question)

நாட்டு விழாக்கள் - விடுதலைப் போராட்ட வரலாறு - நாட்டின் முன்னேற்றத்தில் மாணவர் பங்கு - குறிப்புகளைக் கொண்டு ஒரு பக்க அளவில் 'மாணவப் பருவமும் நாட்டுப்பற்றும்' என்ற தலைப்பில் மேடை உரை எழுதுக.

மேடை உரை: மாணவப் பருவமும் நாட்டுப் பற்றும்

இங்கே கூடியிருக்கும் ஆன்றோர்களே! தமிழ்ச் சான்றோர்களே! உங்கள் அனைவருக்கும் என் வணக்கத்தை உரித்தாக்குகிறேன். இப்போது உங்களிடத்திலே 'மாணவப் பருவமும் நாட்டுப்பற்றும்' என்ற தலைப்பில் பேச வந்திருக்கிறேன்.

மாணவப் பருவம் என்பது பசுமையான நிகழ்வுகளைத் தாங்கி நிற்கும் நந்தவனம் ஆகும். அத்தகைய பருவத்தில் விதைக்கப்படும் கருத்துக்கள் 'பசுமரத்தாணி போல' பதியும். ஆதலால், இளமைப் பருவத்திலேயே ஒருமைப்பாட்டுணர்வும் நாட்டுப்பற்றும் ஊட்டப்பட வேண்டும்.

நாட்டு விழாக்கள்

உயர்ந்த இலட்சியங்களான சுதந்திரம் - சமத்துவம் - சகோதரத்துவம் பேணவும், தேசிய ஒருமைப்பாட்டுணர்வை வளர்க்கவும், வேற்றுமையில் ஒற்றுமை காணவும் நாம் நாட்டு விழாக்களைக் கொண்டாடி வருகின்றோம். சுதந்திர தினவிழா, குடியரசு தினவிழா, காந்தி ஜெயந்தி, உழைப்பாளர் தினம் ஆகியவற்றைத் தேசிய விழாக்களாக நாம் கொண்டாடி வருகின்றோம். சுதந்திரத்திற்காகத் தமது இன்னுயிரை ஈந்த தலைவர்களை நினைவு கூறவும், தேசபக்தியை வளர்த்துக் கொள்ளவும், நாட்டின் முன்னேற்றத்திற்குத் தம்மை அர்ப்பணிக்கவும் நாட்டு விழாக்கள் துணைபுரிகின்றன.

விடுதலைப் போராட்ட வரலாறு

நமது இந்திய விடுதலைப் போராட்ட வரலாறு மிக நீண்டது. வணிகம் செய்யும் பொருட்டு இந்தியாவிற்குள் நுழைந்த ஆங்கிலேயர் அங்காங்கே வணிகத் தளங்களை நிறுவினர். அவற்றை நிர்வாகம் செய்யும் பொருட்டு, தங்களுக்கென்று நிர்வாக அமைப்பையும் இராணுவத்தையும் அமைத்துக்கொண்டனர். ஊர் இரண்டுபட்டால் கூத்தாடிக்குக் கொண்டாட்டம் என்பதைப்போல, உள்நாட்டில் எழுந்த உட்பூசல்களில் தலையிட்டு, வரிவசூல் செய்யும் அதிகாரத்தையும், பின்னர் படிப்படியாக ஆட்சி செய்யும் அதிகாரத்தையும் பெற்றனர்.

நீதிமுறையற்ற வரிவசூல் முறைகளால் பாதிக்கப்பட்ட பாளையக்காரர்கள் கிளர்ச்சி செய்தனர். வெல்லெஸ்லியின் துணைப்படைத்திட்டத்தாலும் டல்கௌசியின் வாரிசு இழப்புக் கொள்கையாலும் ஆட்சியை இழந்த மன்னர்களும், இராணுவச் சீர்திருத்தங்களால் பாதிக்கப்பட்ட இந்திய வீரர்களும் முதல் இந்திய சுதந்திரப் போரில் கலந்து கொண்டனர். ஆங்கிலக் கல்வியின் தாக்கத்தால் படித்த இந்தியர்கள் படிப்படியாக அரசியல் சமத்துவம் வேண்டி பல்வேறு போராட்டங்களை முன்னெடுத்தனர். சமூக மற்றும் சமயச் சீர்திருத்த இயக்கங்கள் இந்தியாவின் பெருமையை வெளிக்கொண்டு வந்தன.

1885இல் உருவான இந்தியத்தேசியக் காங்கிரஸ் எனும் பேரியக்கம் ஒத்துழையாமை இயக்கம், சட்டமறுப்பு இயக்கம், உப்பு சத்தியாகிரகம், வெள்ளையனே வெளியேறு இயக்கம் ஆகிய போராட்டங்களை அமைதி வழியில்நின்று நடத்தி வெற்றி கண்டது. கிரிப்ஸ் தூதுக்குழு இந்தியாவிற்குத் தன்னாட்சி வழங்கப் பரிந்துரை செய்தது. கேபினட் தூதுக்குழு இந்தியாவிற்குத் தனி அரசியலமைப்புக்குழு அமைக்க பரிந்துரை செய்தது. இறுதியாக, மவுண்ட்பேட்டன் திட்டப்படி சுதந்திர இந்தியா உருவானது.

நாட்டின் முன்னேற்றத்தில் மாணவர் பங்கு

இன்றைய மாணவர்கள் எதிர்கால இந்தியாவின் தூண்கள். அவர்கள் நாட்டுப்பற்று மிக்கவர்களாகவும் சமூகத்தொண்டு புரிபவர்களாகவும் மலர வேண்டும். 'ஐந்தில் வளையாதது ஐம்பதில் வளையாது' என்பதை உணர்ந்து இளமைப் பருவத்திலேயே சாரணர் இயக்கம், தேசிய மாணவர்படை, பசுமைப்படை, செஞ்சிலுவைச் சங்கம், சுற்றுச்சூழல் மன்றம், சாலைப் பாதுகாப்பு இயக்கம் ஆகியவற்றில் சேர்ந்து பல்வகைத் திறன்களை வளர்த்துக் கொள்ள வேண்டும்.

சுற்றுச்சூழலைத் தூய்மையாக வைத்திருக்க வேண்டும். பொதுச் சொத்துக்களைப் பாதுகாக்க வேண்டும். அறிவியல் மனப்பான்மையை வளர்த்துக் கொள்ள வேண்டும். வனவிலங்குகளைப் பாதுகாக்க வேண்டும். மரங்களை நட்டு வளர்க்க வேண்டும். நீர்நிலைகளைப் பராமரிக்க வேண்டும். சமூக விழிப்புணர்வு நிகழ்ச்சிகளில் பங்குபெற வேண்டும்.

எழுத்தறிவற்றவர்களுக்குக் கற்றுக் கொடுக்க வேண்டும். போக்குவரத்து நெரிசல், பேரிடர், திருவிழாக்கள் ஆகியவற்றில் காவல்துறைக்கு உதவியாக இருக்க வேண்டும். நலிவடைந்தோர் மற்றும் ஆதரவற்றோர்களுக்கு உதவி செய்ய வேண்டும்.

தேசியச் சின்னங்களை மதிக்க வேண்டும். தேசிய ஒருமைப்பாட்டைப் பேணிக் காக்க வேண்டும். மூத்தோருக்குக் கீழ்ப்படிய வேண்டும். சகிப்புத்தன்மை, விட்டுக்கொடுத்தல், பொறுமை, சகோதரத்துவ உணர்வு ஆகியவற்றை வளர்த்துக் கொள்ள வேண்டும்.

"பெற்றதாயும் பிறந்தபொன்னாடும் நற்றவ வானினும் நனிசிறந்தனவே" என்கிறார் பாரதியார். பெற்ற தாயைப்போல பிறந்த பொன்னாட்டைப் பேணிக்காப்பது நமது ஒவ்வொருவரின் கடமை என்று கூறி, பேச வாய்ப்பளித்த உங்கள் அனைவருக்கும் நன்றி கூறி விடைபெறுகிறேன். நன்றி, வணக்கம்!

Complaint Letter in Tamil for Substandard Food (புகார்க் கடிதம்)

கடிதம் - புகார்க் கடிதம்

கேள்வி

உணவு விடுதி ஒன்றில் வழங்கப்பட்ட உணவு தரமற்றதாகவும், விலை கூடுதலாகவும் இருந்தது குறித்து உரிய சான்றுகளுடன் உணவு பாதுகாப்பு ஆணையருக்குக் கடிதம் எழுதுக.

மாதிரிப் புகார்க் கடிதம்

அனுப்புநர்

அ. கபிலர்,

6, ஔவையார் தெரு,

சங்கரலிங்கபுரம்,

விருதுநகர் (மாவட்டம்).

பெறுநர்

உயர்திரு. உணவுப் பாதுகாப்பு ஆணையர்,

உணவுப்பாதுகாப்பு ஆணையர் அலுவலகம்,

சென்னை.

மதிப்பிற்குரிய ஐயா,

பொருள்: தரமற்ற உணவு வழங்கிய உணவு விடுதியாளர் மீது நடவடிக்கை எடுக்க வேண்டுதல்...

வணக்கம். நான் நேற்று (22.09.2020) விருதுநகர் - மதுரை நான்குவழிச் சாலையில் அமைந்துள்ள முல்லை உணவு விடுதிக்குச் சென்றிருந்தேன். கோழி பிரியாணி ஒன்று வாங்கினேன். சாப்பிடும்போது குழம்பில் மிகுதியான வேதிப்பொருட்களும் நிறமிகளும் கலந்து இருப்பதையும், கோழிக்கால் துண்டில் புழு இருப்பதையும் கண்டு அதிர்ச்சி அடைந்தேன்.

உணவு விடுதி உரிமையாளரிடம், இதுகுறித்து முறையிட்டபோது "உன்னால் முடிந்ததைப் பார்" என்று மிரட்டினார். விலைப்பட்டியலில் கோழிப் பிரியாணி விலை ரூபாய் 120 என்று எழுதப்பட்டிருந்தது. ஆனால், என்னிடம் 180 ரூபாய் கேட்டார்.

தரமற்ற உணவு வழங்கியும், விலை கூடுதலாக வசூலித்தும் வரும் முல்லை உணவு விடுதி உரிமையாளர் மீது உரிய நடவடிக்கை எடுக்க வேண்டுகிறேன். புழுவுடன் கூடிய கோழிக்கால் துண்டின் புகைப்படத்தையும், 180 ரூபாய்க்கான உணவு கட்டணச் சீட்டின் ஒளிப்பட நகலையும் இத்துடன் இணைத்துள்ளேன்.

நன்றி!

இப்படிக்கு,

உண்மையுள்ள,

அ. கபிலர்.

இடம்: சங்கரலிங்கபுரம்
நாள்: 23.09.2020

இணைப்பு:

• (1). புழுவுடன் கூடிய கோழிக்கால் துண்டின் புகைப்படம்
• (2). உணவுக் கட்டணச் சீட்டின் ஒளிப்பட நகல்

உறைமேல் முகவரி:

பெறுநர்

உயர்திரு. உணவுப் பாதுகாப்பு ஆணையர்,

உணவு பாதுகாப்பு ஆணையர் அலுவலகம்,

சென்னை.

How to Write a Book Review (Katturai) in Tamil: Manimekalai Example

கட்டுரை- மதிப்புரை வழங்குதல்

பள்ளி ஆண்டுவிழா மலருக்காக நீங்கள் நூலகத்தில் படித்த கதை/ கட்டுரை/ சிறுகதை/ கவிதை நூலுக்கான மதிப்புரை எழுதுக.

மதிப்புரை

நூலின் தலைப்பு

மணிமேகலை

நூலின் மையப் பொருள்

மணிமேகலை மேற்கொண்ட துறவு

மொழிநடை

நாவல்

வெளிப்படுத்தும் கருத்து

     நாம் போன பிறவியில் செய்த பாவத்தின் பயனாகத்தான் இந்த உடம்பு வாய்த்திருக்கிறது. இந்த உடம்பை வைத்துக்கொண்டு நல்லது செய்வதும் கெட்டது செய்வதும் முழுக்க முழுக்க நம்முடைய கையில் தான் இருக்கிறது. இந்த உடம்பு அழகானது என்று நினைத்தால் அந்த கருத்தைத் தயவு செய்து மாற்றிக் கொள்ளுங்கள். இந்த அழகு நிலை இல்லாதது. இளமை போய் முதுமை வந்து விட்டால் அத்தனை அழகும் மறைந்து போகும். இந்த நிலை இல்லாத உடம்பைப் பராமரிக்கத் தான் எத்தனை அலங்காரங்கள்? அழகு சாதனங்கள், நறுமணப் பூச்சுகள். இதை எல்லாம் நீக்கி விட்டால் இந்த உடம்பு எத்தனை கேவலமான நாற்றம் கொண்டது என்று புரியும். புற்றுக்குள் பாம்பு புகுந்தது போல கோபம், வருத்தம், கவலை, துன்பம் எல்லாம் உள்ளே பூட்டி வைக்கிறோம்.

நூலின் நயம்

தீவதிலகையின் கூற்று:

     இந்த உலகத்தையே பெரும் துன்பத்தில் ஆழ்த்தக் கூடிய ஒரு மிகப்பெரிய நோய் பசி. அந்தப் பசியைப் போக்கும் அற்புத மருந்து அந்த அமுதசுரபி. நீ அதை ஏற்றுக்கொண்டு, இல்லாதவர்களுக்கு உணவு கொடுத்து மகிழச் செய்ய வேண்டும். உன் மூலம் இந்த பூமி மொத்தமும் நலம் பெறவேண்டும்.

அறவண அடிகளின் கூற்று:

     இங்கிருந்து சூரிய மண்டலம் தொலைவில் உள்ளது என்பதை நாம் உணர முடியும். ஆனால், அதைக் கண்ணால் பார்த்து அறிவது சாத்தியமில்லை. அதுபோலத்தான், நல்ல அறநெறிகளை நாம் நேரில் பார்த்தால் தான் நம்புவோம் என்று பிடிவாதம் பிடிக்கக் கூடாது. மற்றவர்கள் உணர்த்துவதை உள்ளத்தால் புரிந்துகொள்ள வேண்டும்.

ஆதிரையின் கணவன் சாதுவன் கூற்று:

     கள் நம்முடைய அறிவை மயக்குகிறது. மாமிசம், மற்ற உயிர்களைக் கொன்று பிழைக்கச் சொல்கிறது. பல பெண்களின் பின்னே அலைவதும் மிருகக் குணம் தான்.

நூலின் கட்டமைப்பு

     மணிமேகலைக் காப்பியத்தை, இவள் பெயர் மணிமேகலைமுதல் குற்றம்தவிர்த்த வாழ்க்கை ஈறாக 66 தலைப்புகளில் நாவல் வடிவில் விளக்குகிறது.

சிறப்புக் கூறு

     மூல நூலான மணிமேகலையை விட, நாவல் வடிவிலமைந்த இந்த நூல் எளிய நடையில் கதை சொல்கிறது. ஒரே மூச்சில் படித்து முடித்துவிட வேண்டும் என்ற ஆவலைத் தூண்டுகிறது.

     நாடகக் காட்சிகளை நம் கண்முன்னே கொண்டுவந்து நிறுத்தி, மணிமேகலை வாழ்ந்த உலகிற்கு நம்மை அழைத்துச் செல்கிறது.

     புத்தர் அறிவித்த நன்னெறிகள், நூல் முழுவதும் தொடர்கின்றன. இக்கால சமுதாயம் சீர்பெற மிகவும் அவசியமான நூலாகும்.

     மிகுந்த சுவையோடு எழுதப்பட்டிருக்கும் இந்நூல் அனைவரையும் கவரும் என்பதில் ஐயமில்லை.

நூலின் ஆசிரியர்: என். சொக்கன்

An Essay on a Visit to the Government Exhibition

உங்கள் பகுதியில் நடைபெற்ற அரசுப் பொருட்காட்சிக்குச் சென்று வந்த நிகழ்வை கட்டுரையாக்குக.

அரசுப்பொருட்காட்சி

முன்னுரை

கண்ணால் காண்பவை மனத்தில் ஆழமாகப் பதிந்து, நெடுங்காலம் நிலைத்திருக்கும். அதனால்தான், பள்ளிகளில் சில இடங்களைக் குறிப்பிட்டு சுற்றுலாவாக அழைத்துச் செல்கின்றனர். அந்த வகையில் பொருட்காட்சிகள் கூட மக்கள் அறிவை வளர்க்க பெருந்துணை புரிகின்றன. நான் அண்மையில் என் நண்பர்களுடன் மதுரையில் உள்ள தமுக்கம் மைதானத்தில் நடைபெற்ற அரசுப் பொருட்காட்சிக்குச் சென்று வந்தேன். அது குறித்துச் சில செய்திகளைக் கூறுகிறேன், கேளுங்கள்.

தமுக்கம் மைதானம்

தமுக்கம் மைதானம் மதுரையின் வரலாற்றுச் சிறப்பு மிக்க மைதானமாக பதினான்காம் நூற்றாண்டில் மன்னர் விஸ்வநாத நாயக்கரால் கட்டப்பட்டு, மதுரை நாயக்கர் வம்சத்தால் பராமரிக்கப்பட்டு வந்தது. அக்காலத்தில் குதிரைப் பந்தயம், யானைப் பந்தயம், மாட்டு சண்டைகள் போன்ற விளையாட்டுகளும் சிலம்பு சண்டை, கத்திச் சண்டை போன்ற கலைகளும் இங்கு நடத்தப்பட்டன.

அரசுப் பொருட்காட்சி

சித்திரைத் திருவிழாவை முன்னிட்டு ஆண்டுதோறும் மதுரைத் தமுக்கம் மைதானத்தில் அரசு சார்பில் பொருட்காட்சி நடைபெறும். மாலை வேளையில் பல வண்ண விளக்குகளால் மைதானமே ஜொலிக்கும். பல்வேறு அரசுத் துறைகளின் சார்பில் அரசின் சாதனைகளை விளக்கும் வகையில் அரங்குகள் அமைக்கப்பட்டு இருக்கும்.

பல்துறை அரங்குகள்

அரசு ஏற்பாடு செய்திருந்த பொருட்காட்சி ஆதலால், உள்ளே நுழைந்ததும் அரசு சார்புடைய காவல்துறை, சுற்றுலாத் துறை, பொதுப்பணித் துறை, அற நிலையத் துறை, வனத் துறை, தீயணைப்புத் துறை, விளம்பரத் துறை, போக்குவரத்துத் துறை, மின்துறை, அறிவியல் துறை எனப் பல்வேறு துறைசார்ந்த அரங்குகள் அமைக்கப்பட்டிருந்தன. விவசாயம், கைத்தறி, மீன் வளர்ப்பு முதலான துறை சார்ந்த அரங்குகளும் இருந்தன. அவற்றில் நமக்குத் தேவையான விளக்கமளிக்கப் பொறுப்புடைய பலர் காத்திருந்தது சிறப்பாக இருந்தது. நான் பல வினாக்களை வினவி, என் ஐயங்களைப் போக்கிக் கொண்டேன்.

பல்வேறு கடைகள்

சிறுவர்களுக்கான பொம்மைகள் விற்கும் கடைகள், புத்தகக் கடைகள், ஆயத்த ஆடைகள் விற்கும் கடைகள், வீட்டுப் பயன்பாட்டுப் பொருட்கள் விற்கும் கடைகள், கைவினைப் பொருட்கள் விற்கும் கடைகள் எனப் பல்வேறு கடைகள் அங்கே காணப்பட்டன.

கேளிக்கை அரங்குகள்

பல்வேறு கலை நிகழ்ச்சிகள், சாகச நிகழ்ச்சிகள் போன்றவை நடத்தப்பட்டன. மீன் கண்காட்சிக் கூடம் கண்களைக் கவர்வதாக இருந்தது. பல்வேறு வகையான இராட்டினங்களில் குழந்தைகள், சிறியவர், பெரியவர் என அனைவரும் சுற்றி மகிழ்ந்தனர்.

உணவு அரங்குகள்

குடும்பம் குடும்பமாக வந்திருந்த சிலர், அங்கு அமைக்கப்பட்டிருந்த பல்வேறு உணவு அரங்கங்களில் கூடிநின்று, பல்வேறு வகையான தின்பண்டங்களை வாங்கி உண்டு மகிழ்ந்தனர். அங்குக் குடிப்பதற்குப் பல்வேறு வகையான சாறுகள் வழங்கப்பட்டன. பனிக்கூழ் வகைகள் எல்லோரையும் கவர்ந்தன. 'ஆவின்' பால் நிறுவனம் அமைத்திருந்த அரங்கில் எண்ணற்ற மக்கள் அவரவர் விருப்பத்திற்கு ஏற்ப சுவையுடைய பண்டங்களை வாங்கிச் சுவைத்தனர்.

முடிவுரை

பொருட்காட்சி என்பது வெறும் பொருள்களை மட்டும் காண உதவவில்லை. அது பல்வேறு துறை அறிவையும் பெற உதவுவதாக அமைந்துள்ளது. எனவே, அடுத்த முறை நண்பர்களை எல்லாம் அழைத்துக் கொண்டு செல்ல வேண்டும் என்ற முடிவுடன் வீடு திரும்பினேன்.

Kaatchiyai Kandu Kavinura Ezhuthuga: Oyilattam Poem and Explanation | Iyal 6

காட்சியைக் கண்டு கவினுற எழுதுக

இயல் 6

தலைப்பு: ஒயிலாட்டம்

காலின் சலங்கையில் கனவுகள் நில்லும்!

கைச்சிறு துணியில் காரியம் செல்லும்!

இடுப்பின் கச்சையில் ஈரம் சிந்தும்!

உருமியின் ஓசையில் உணர்ச்சிகள் உந்தும்!

ஒய்யார ஆட்டத்தில் வீரமே முந்தும்!

தாளத்தின் நீளத்தில் தாவலும் இருக்கும்!

ஒத்த அசைவில் ஓர்மை ஒளிரும்!

கலையின் நிறைவில் கண்கள் மிளிரும்!

விளக்கம்:

காலின் சலங்கையில் கனவுகள் நில்லும் - ஒயிலாட்டம் ஆடுபவர், காலில் சலங்கை கட்டி ஆடுவர். எதிர்காலத்தில் என்னவாக இருக்க வேண்டும் என்ற கனவு ஒவ்வொருவருக்கும் உண்டு. அத்தகைய கனவுகளை ஒவ்வொருவரும் சுமப்பர். இங்கு, ஒயிலாட்டம் ஆடுபவர் தங்களுடைய கனவுகளை தம்முடைய காலின் சலங்கையில் சுமப்பதாக உருப்படுத்தப்பட்டுள்ளது.

கைச்சிறு துணியில் காரியம் செல்லும் - ஆண்கள் அனைவரும் கையில் சிறு துணியை பிடித்துக்கொண்டு ஒரே மாதிரியாக அசைத்து ஆடுவர். யாருடைய தவறும் அங்கு இருக்காது. காரியம் சிறப்பாக இருக்கும்.

இடுப்பின் கச்சையில் ஈரம் ஒழுகும் - ஆண்கள் வேகமாக காலை எடுத்து வைத்து ஆடும் போது உண்டாகும் வியர்வைத் துளிகளால், இடுப்பில் கட்டியிருக்கும் கச்சையானது நனைந்து வியர்வைத்துளிகள் ஒழுகும். ஆட்டத்தின் கடினத்தன்மை இங்கு கூறப்பட்டுள்ளது.

உருமியின் ஓசையில் உணர்ச்சிகள் உந்தும் - ஒயிலாட்டத்தின் போது இசைக்கப்படும் உருமியின் ஓசையானது, ஆடுபவர், பார்ப்பவர் ஆகியோர் அனைவரது உணர்ச்சிகளையும் உந்தித் தள்ளும்.

ஒய்யார ஆட்டத்தில் வீரமே முந்தும் - ஒரே மாதிரியான இடைவெளியில், ஒரே மாதிரியாக ஆடும் ஆட்டத்தில் ஆண்களின் வீரம் புலப்படும்.

தாளத்தின் நீளத்தில் தாவலும் இருக்கும் - இசைக்கப்படும் காலத்திற்கு ஏற்றார் போல, ஆண்கள் தாவி ஆடுவர்.

ஒத்த அசைவில் ஓர்மை ஒளிரும் - ஒரே மாதிரியான சலங்கை. ஒரே மாதிரியான கச்சை. ஒரே மாதிரியான கைக்குட்டை அல்லது துணி. ஒரே மாதிரியான நடனம். ஒரே மாதிரியான பாவனை. இவற்றையெல்லாம் பார்க்கும்போது ஓர்மை புலப்படும்; ஒற்றுமை வெளிப்படும்.

கலையின் நிறைவில் கண்கள் மிளிரும் - ஒயிலாட்டம் முடிந்தபின்பு ஆடிய ஆடவர் கண்களில் ஒரு நிறைவு வெளிப்படும். அந்த நிறைவில் அவர்களது கண்கள் ஒளிரும்.