காலப் பயணம்: வரமா? சாபமா? Time Travel Paradox: The Butterfly Effect Explained Through a Story

காலப் பயணம்: வரமா? சாபமா?
காலத்தின் எச்சரிக்கை

காலத்தின் எச்சரிக்கை (முன்னுரை)

கால இயந்திரம் என்பது மனிதக் கற்பனையின் உச்சம்; ஆனால், அதுவே மனிதகுலத்தின் அழிவுக்கும் காரணமாகலாம். அதன் சக்தி அளப்பரியது; ஆனால், அதைவிடவும் அளப்பரியது அது சுமந்துவரும் ஆபத்து. காலத்தின் ஓட்டத்தில் ஒரு சிறு கல்லை எறிந்தாலும், அது எதிர்காலத்தில் ஒரு பெரும் புயலையே உருவாக்கக்கூடும். இதை உணர்த்தும் ஒரு சிறு உதாரணத்தைக் காண்போம்.

கதிர் என்ற ஓர் இளைஞன் இருந்தான். அவனுக்கு ஒரு கால இயந்திரம் கிடைத்ததாகக் கற்பனை செய்துகொள்வோம். தன் தாத்தாவையும் பாட்டியையும் இழந்து ஒரு வாரமே ஆகியிருந்த நிலையில், அந்த இயந்திரம் அவனுக்கு ஒரு வரமாகத் தோன்றியது. அவர்களை மீண்டும் பார்க்க, அதுவும் அவர்களின் இளமைக்காலத்தில் சந்திக்க அவன் பேரார்வம் கொண்டான். கால இயந்திரத்தை ஐம்பது ஆண்டுகள் பின்னோக்கிச் செலுத்தினான்.

அவன் தற்போது வசிக்கும் வீடு, அவனது தாத்தா பாட்டியின் பூர்வீக வீடுதான். எனவே, அந்தப் பழைய காலத்து வீட்டில்தான் அவர்களும் வாழ்ந்திருப்பார்கள் என்ற நம்பிக்கையுடன் அங்குச் சென்றான். மறைந்திருந்து தன் தாத்தாவையும் பாட்டியையும் ஆவலுடன் கவனித்தான். அவனது பாட்டி, உறங்கச் செல்வதற்கு முன், ஒரு குவளைப் பாலுடன் வராண்டாவில் அமர்ந்து செய்தித்தாள் படித்துக்கொண்டிருந்த தாத்தாவிடம் அதைக் கொடுத்தார்.

தன் தாத்தாவையும் பாட்டியையும் இளமைப் பொலிவுடன் கண்டதும் கதிர் பெருமகிழ்ச்சியடைந்தான். அந்த நொடியில்தான் அந்த விபரீதம் நிகழ்ந்தது. எதிர்பாராத விதமாக, கதிரின் காலில் ஏதோ இடறியதுபோலிருக்க, அவன் தன்னையறியாமல், "அம்மா!" என்று கத்திவிட்டான்.

பட்டாம்பூச்சி விளைவு (Butterfly Effect)

அவன் கத்திய அடுத்த கணமே, அவன் அந்த உலகிலிருந்து மறைந்துபோனான்! ஆம், கதிர் என்ற அந்த இளைஞன் இந்த உலகில் பிறக்கவேயில்லை என்றாகிவிட்டது!

இது எவ்வாறு நிகழ்ந்தது? கதிர் எழுப்பிய அந்தச் சிறு ஒலி, அந்தச் சிறிய குறுக்கீடு, அன்று அவர்களுக்குள் நிகழ வேண்டியதை மாற்றிவிட்டது. தாத்தா சத்தத்தைக் கேட்டு வெளியே வந்தார். இந்த இடைப்பட்ட தாமதத்தால், கதிரின் தந்தையை உருவாக்க வேண்டிய குறிப்பிட்ட உயிரணு பின்தங்கியது. கதிரின் தந்தை பிறக்கவில்லை; அதனால் கதிரும் பிறக்கவில்லை.

காலச்சக்கரத்தில் நாம் செய்யும் ஒரு மிகச்சிறிய மாற்றம், ஒரு பட்டாம்பூச்சியின் சிறகடிப்பு ஏற்படுத்தும் தாக்கத்தைப்போல, பிற்காலத்தில் மிகப்பெரிய, கணிக்க முடியாத விளைவுகளை ஏற்படுத்திவிடும்.

காலம் எனும் பிரபஞ்ச ஆற்றலின் இந்த விசித்திரமான, அதே சமயம் அபாயகரமான தன்மையைப் பற்றி ஓரளவு புரிந்துகொண்டிருப்பீர்கள் என்று நம்புகிறேன்.

இனி, இதேபோன்றதொரு காலப் பயணத்தின் சிக்கலில் சிக்கும் கதிரின் கதைக்குள் செல்வோம்.

PURCHASE BOOK

About the Author

Amin Buhari, M.Com
OMTEX Classes

"The hands that once wrote on the blackboard are now creating a world of imagination on paper."

Original Source Material:

The Weaver Bird and the Giraffe Story | 3rd Grade Tamil Lesson (Term 3, Chapter 2)

தூக்கணாங்குருவியும் ஒட்டகச்சிவிங்கியும்

3 ஆம் வகுப்பு தமிழ் - பருவம் 3 | இயல் 2

கதை

காட்டில் இருந்த பெரிய மரம் ஒன்றின் கிளையில் தன் குஞ்சுகளுடன் கூட்டில் தூக்கணாங்குருவி ஒன்று வசித்து வந்தது. அதன் குஞ்சுகள், கீச்...... கீச்.... என்று ஒலி எழுப்பி மகிழ்ச்சியுடன் இருந்தன. அப்போது அந்த வழியாக ஒட்டகச்சிவிங்கி ஒன்று வந்தது.

ஒட்டகச்சிவிங்கி: அப்பாடா... என்ன வெயில்... என்ன வெயில் .... இந்த மரத்தின் அடியில் கொஞ்ச நேரம் ஒதுங்கலாம். என நினைத்தது. அப்போது தூக்கணாங்குருவி குஞ்சுகள் மகிழ்ச்சியுடன் சத்தமிட்டுக் கொண்டிருந்தன... என்ன ஒரே சத்தம்! என ஒட்டகச்சிவிங்கி மேலே பார்த்தது. மரக்கிளையில் உள்ள கூட்டில் இருந்த தூக்கணாங்குருவிக் குஞ்சுகள் சத்தமிட்டுக் கொண்டு இருப்பதைப் பார்த்து கோபம் கொண்ட, ஒட்டகச்சிவிங்கி மரக்கிளையைப் பிடித்து உலுக்கியது.

தூக்கணாங்குருவி: ஏ! ஒட்டகச்சிவிங்கியே! ஏன் மரக்கிளையை உலுக்குகிறாய்? என் கூட்டிலுள்ள குஞ்சுகள் பயப்படுகின்றன.

ஒட்டகச்சிவிங்கி: உன் குஞ்சுகள் கத்துவது எனக்குப் பிடிக்கவில்லை.

(அப்போது... தேனீ ஒன்று பறந்து வந்து மரத்தில் உள்ள பூவில் அமர்ந்தது)

தேனீ: ஒட்டகச்சிவிங்கியே! மரம் அனைவருக்கும் பொதுவானது. தூக்கணாங்குருவி கூடு கட்டி வாழ்கிறது. உனக்கு ஓய்வெடுக்க நிழல் தருகிறது. எனக்கு இம்மரத்தில் உள்ள பூக்களில் இருந்து தேன் கிடைக்கிறது. எனவே நாம் அனைவரும் நண்பர்களாக இருப்போம்.

ஒட்டகச்சிவிங்கி: இல்லை! இல்லை! நான் உங்களுடன் சேர முடியாது. எனக்கு இந்தக் குஞ்சுகள் கத்துவது பிடிக்கவில்லை.

(மீண்டும் மரக்கிளையை ஒட்டகச்சிவிங்கி உலுக்கியது)

தூக்கணாங்குருவிக் குஞ்சுகள் பயந்து, காப்பாத்துங்க.... காப்பாத்துங்க என மீண்டும் அலறின.

தேனீ: நான் உங்களுக்கு உதவி செய்கிறேன். அருகில் உள்ள குளத்தில் புத்திசாலித் தவளை வாழ்ந்து வருகிறது. அதனிடம் சென்று உதவி கேட்போம்.

(தேனீ, ஒட்டகச்சிவிங்கியின் அடாத செயலை தவளையிடம் கூறியது. தூக்கணாங்குருவியும் தன் நிலையைக் கூறித் தவளையிடம் உதவி கேட்டது)

தவளை: உங்களுக்குக் கட்டாயம் உதவுகிறேன். தண்ணீர் குடிக்க வரும் போதெல்லாம் இந்த ஒட்டகச்சிவிங்கியின் கால்களில் மிதிபட்டு எங்கள் இனம் அழிந்து போகிறது. அதனால், நாம் படும் துன்பம் அதற்குத் தெரியவில்லை. அதற்கும் அந்த நிலை ஏற்பட்டால்தான், தானாகவே புரிந்துகொள்ளும் போலிருக்கிறது.

(மறுநாள், ஒட்டகச்சிவிங்கி வழக்கம்போல் அந்த மரத்தின் அருகில் வருகிறது.)

ஒட்டகச்சிவிங்கி: அப்பாடா! இன்று கொஞ்சம் வெயில் பரவாயிலே. அட, அது என்ன? அந்தத் தேனீக்கூட்டம் எப்போது பார்த்தாலும் ஙொய்...ஙொய்..னு சத்தம் போடுதே. இரு, இரு, இப்ப உங்களை என்ன செய்றேன் பாருங்க.

தேனீக்களின் கூட்டை ஒட்டகச்சிவிங்கி, தன் தலையால் தட்டிக் கலைக்கிறது. சினம் கொண்ட தேனீக்கள், ஒட்டகச்சிவிங்கியின் காதைக் கடிக்கின்றன. வலி பொறுக்கமுடியாமல், ஒடகச்சிவிங்கி அருகிலிருந்த குளத்தில் விழுகிறது. அது விழுந்ததால் அங்கிருந்த தவளைகள், அதன் உடலின்மீது அங்குமிங்கும் ஓடுகின்றன. தண்ணீரிலிருந்து தட்டுத்தடுமாறி எழுந்த ஒட்டகச்சிவிங்கி, மீண்டும் மீண்டும் கூச்சம் தாங்காமல் தண்ணீரில் விழுகிறது. தேனீக்கள் கொட்டிக்கொண்டே இருக்கின்றன.

ஒட்டகச்சிவிங்கி: ஐயோ தேனீக்களே என்னை கொட்டாதீர்கள். தவளைகளே என் மீது ஏறாதீர்கள் - என்று கத்தியது

நமக்கு ஏற்பட்டதுபோலத்தானே அந்தத் தூக்கணாங்குருவிகளுக்கும் ஏற்பட்டிருக்கும். தங்கள் கூட்டைக் கலைத்ததால்தானே அந்தத் தேனீக்களும் என்னைக் கொட்டின. பாவம், அந்தத் தவளைகள் எத்தனை முறை அவற்றை நான் காலால் மிதித்திருக்கிறேன். எனக்கு வலித்ததுபோல அவற்றிற்கும் வலித்திருக்கும் என்று ஒட்டகச்சிவிங்கி, தான் செய்த தவற்றை எண்ணுகிறது. இனிமேல், யாருக்கும் தொல்லை தரமாட்டேன். துன்பம் செய்ய மாட்டேன் என்று உண்மையாகவே மனம் வருந்தியது ஒட்டகச்சிவிங்கி. மேலும், தன் தவற்றைப் பொறுத்துக் கொள்ளுமாறு அனைவரிடமும் வேண்டியது. பின்னர், அனைவரோடும் இணைந்து மகிழ்ச்சியுடன் வாழ்ந்தது.

நீதிக் கருத்து: நல்லதே நினைப்போம்! நன்மை பெறுவோம்!

3rd Grade Tamil: Term 2 Chapter 5 - Vaalu poyi Kathi vanthadu | Questions & Answers

வாலு போயி கத்தி வந்தது! டும்...டும்... டும்...டும்

பயிற்சி

வாங்க பேசலாம்

* ‘டும் .. டும் .. டும் .. டும்..' படக்கதையை உமது சொந்த நடையில் கூறுக.

• ஓணான் ஒன்று வேலியைத் தாண்டும்போது அதன் வாலில் முள் குத்திவிட்டது. அதனை எடுத்துவிடுமாறு உழவரிடம் வேண்டியது. உழவர் முள்ளை எடுக்கும்போது அதன் வால் அறுந்துவிட்டதால் கத்தியை ஓணான் பெற்றுக்கொண்டது.

• காட்டில் மரம் வெட்டியைப் பார்த்துக் கத்தியைக் கொடுத்தது. மரம் வெட்டி கத்தியை ஒடித்ததால் அதற்காக விறகுகளைப் பெற்றுக்கொண்டது.

• வழியில் தோசை சுடும் பாட்டியிடம் விறகுகளைக் கொடுத்துவிட்டு தோசையைப் பெற்றுச் சென்றது.

• தோசையை மோர் விற்கும் பெண்ணிடம் கொடுத்துவிட்டு மோரைப் பெற்றுச் சென்றது.

• மோர் பானையை தோட்டக்காரரிடம் கொடுத்துவிட்டு, பூக்களைப் பெற்றுச் சென்றது.

• பூவை மேளம் வாசிக்கும் பெண்ணிடம் கொடுத்துவிட்டு மேளத்தைப் பெற்றுச் சென்று மகிழ்வுடன் ஆடிப் பாடியது.

• வார இதழ்களில் வரும் படக்கதையைப் படித்த அனுபவம் உண்டா ? ஆம் எனில், அக்கதையைப் பற்றி கூறுக.

படிப்போம் சிந்திப்போம் எழுதுவோம்

சரியான விடையைத் தெரிவு செய்வோமா?

1. விறகெல்லாம் - இச்சொல்லைப் பிரித்து எழுதக் கிடைப்பது ___________.

அ) விறகு + எல்லாம்

ஆ) விறகு + கெல்லாம்

இ) விற + கெல்லாம்

ஈ) விறகு + எலாம்

விடை : அ) விறகு + எல்லாம்

2. 'படம் + கதை' - இச்சொற்களைச் சேர்த்து எழுதக் கிடைப்பது

அ) படம்கதை

ஆ) படக்கதை

இ) படகதை

ஈ) படகாதை

விடை : ஆ) படக்கதை

3. - இப்படத்திற்கு உரிய சொல்லைக் கண்டறிக.

அ) ஓனான்

ஆ) ஓநான்

இ) ஓணான்

ஈ) ஓணன்

விடை : இ) ஓணான்

4. தோசை - இச்சொல்லின் ஒலிப்புடன் தொடர்பில்லாத சொல் எது?

அ) ஆசை

ஆ) மேசை

இ) பூசை

ஈ) இசை

விடை : ஈ) இசை

வினாக்களுக்கு விடையளி

1. ஓணான் எதற்காக மருத்துவரிடம் சென்றது?

ஓணான் மருத்துவரிடம் செல்லவில்லை.

2. தோட்டக்காரன் ஓணானிடம் என்ன கூறினான்?

தோட்டக்காரனிடம் ஓணான் இந்தப் பானையை வைத்துக்கொள் என்று கூறியது.

3. கதையில் ஓணான் பெற்று வந்த பொருள்களைக் கூறுக.

கத்தி, விறகு, தோசை, பானை, பூக்கள், மேளம் போன்ற பொருள்களை ஓணான் பெற்று வந்தது.

4. படக்கதையிலிருந்து நீ அறிந்து கொண்ட கருத்து யாது?

துன்பம் வரும் வேளையில் மனச்சோர்வு அடையக்கூடாது. ஒன்றுபோனால் மற்றொன்று வரும்.

புதிருக்குப் பொருத்தமான படத்தைப் பொருத்துக

ஊர் கூடி என்னை இழுத்தால்தான் நான் அசைந்து வருவேன். நான் யார்?

விடை : தேர்

இடிஇடிக்கும்; மின்னல் மின்னும்; மழை பெய்யாது. அது என்ன?

விடை : பட்டாசு

நிழல் தருவேன் காய் தருவேன் பழம் தருவேன். நான் யார்?

விடை : மரம்

'கலை' என்ற சொல்லில் முதல் எழுத்து
'படம்' என்ற சொல்லில் இடை எழுத்து
'மடல்' என்ற சொல்லில் இறுதி எழுத்து.
நான் யார்?

விடை : கடல்

சொல் விளையாட்டு

ஒரு சொல்லில் உள்ள ஏதாவது ஓர் எழுத்தைக்கொண்டு, புதிய சொற்களை உருவாக்கி மகிழ்க.

இதே போன்று ஒட்டகம், குருவி, சிங்கம், கவிதை போன்ற சொற்களைத் தொடக்கமாக வைத்துச் சொற்களை உருவாக்குக.

ஒட்டகம் → கதிர்வன் → வந்தன → தங்கம் → கழுகு

குருவி → விளக்கு → மிளகு → மின்னல் → கனவு

சிங்கம் → சிரிப்பு → குப்பை → குளம் → அளவு

கவிதை → கரம் → ரம்பம் → பட்டம் → குடம்

அறிந்து கொள்வோம்

உலக கதைசொல்லல் நாள் - மார்ச் 20

2nd Grade Tamil: Term 3 Chapter 5 - Payanam (பயணம்) Story

பயணம்

2 ஆம் வகுப்பு தமிழ் - பருவம் 3, இயல் 5

கதை

குட்டிப்பையன் சிட்டி குளிக்கப் போனான். குழாயைத் திறந்தான். தண்ணீர் குபு...குபுவென வந்தது.

'குளிக்கப் போறேன் – நான்

குளிக்கப் போறேன்

அழுக்குப்போக நல்லா

குளிக்கப் போறேன்'

எனப் பாட்டுப் பாடியபடி வழலைக் கட்டியைக் குழைத்தான்.

’குமிழி வந்தேன்

வண்ணக்குமிழி வந்தேன்

சிட்டியின் கைகளில்

குமிழி வந்தேன்’

சிட்டியின் கையிலிருந்து பாட்டுச் சத்தம் கேட்டது. திடுக்கிட்டுத் தன் கையைப் பார்த்தான். கை, கால்கள் முளைத்த வண்ணக்குமிழி ஒன்று அவன் கையில் இருந்தது. சிட்டியைப் பார்த்துக் குதூகலமாகச் சிரித்தது. அதனைத் தொட்டுப் பார்க்க ஆர்வத்துடன் விரலை நீட்டினான். "ஆ! நீ தொட்டால் நான் உடைந்து விடுவேனே", என்றது குமிழி. சிட்டி சிரித்தபடி தலையை ஆட்டினான்.

மெல்ல, தன் முகத்தைத் தேய்த்தான். குமிழி, சிட்டியின் நெற்றியில் நடந்தபடி,

'நடந்து வந்தேன் – நான்

நடந்து வந்தேன்

சிட்டியின் நெற்றியில்

நடந்து வந்தேன்’

என்று பாடியது.

பாடலைக் கேட்டுப் புன்னகைத்தான் சிட்டி. மீண்டும் தேய்க்கத் தொடங்கினான்.

'சறுக்கி வந்தேன் - நான்

சறுக்கி வந்தேன்

சிட்டியின் மூக்கின் மேல்

சறுக்கி வந்தேன்’

என்று பாடியபடி சறுக்கியது குமிழி. சிட்டி அதன் குறும்பைக் கண்டு மகிழ்ந்தான். தன் காதுகளைத் தேய்க்கத் தொடங்கினான். குமிழி, காதுகளில் வளைந்தபடி,

'வளைந்து வந்தேன்- நான்

வளைந்து வந்தேன்

சிட்டியின் காதுகளில்

வளைந்து வந்தேன்’

என்று பாடியது.

"ஏய்! காதுகளில் இவ்வளவு சத்தமாய்ப் பாடாதே", செல்லமாய் அதட்டினான் சிட்டி. 'ஓ! சரி, நண்பனே! புன்னகையுடன் தலையாட்டியது குமிழி.

தன் தோள்களைத் தேய்த்தான் சிட்டி. குமிழி, சரசரவென்று வழுக்கியபடி,

‘வழுக்கி வந்தேன் - நான்

வழுக்கி வந்தேன்

சிட்டியின் தோள்களில்

வழுக்கி வந்தேன்'

என்று பாடியது.

கலகலவெனச் சிரித்தபடி சிட்டி வயிற்றின்மீது தேய்த்தான். கடகடவென உருண்ட குமிழி,

'உருண்டு வந்தேன் - நான்

உருண்டு வந்தேன்

சிட்டியின் வயிற்றின்மேல்

உருண்டு வந்தேன்'

என்று பாடியது.

ஓரக்கண்ணால் பார்த்தபடி தன் கால்களைத் தேய்த்தான் சிட்டி. அவன் குட்டிக் கால்களில் குடுகுடுவென் ஓடிவந்த குமிழி,

‘ஓடி வந்தேன் - நான்

ஓடி வந்தேன்

சிட்டியின் கால்களில்

ஓடி வந்தேன்'

என்று பாடியது.

தேய்த்து முடித்ததும் தண்ணீரைத் தன்மீது ஊற்றினான் சிட்டி.

அப்போது குமிழி,

'பயணம் வந்தேன் - நான்

பயணம் வந்தேன்

தலைமுதல் கால்வரை

பயணம் வந்தேன்’ - சிட்டியின்

தலைமுதல் கால்வரை

பயணம் வந்தேன்'

என்று பாடியபடியே சிட்டிக்குக் கையசைத்தது. "நாளையும் நீ வரவேண்டும்" என்று அன்புக் கட்டளையிட்டுக் கையசைத்தான், சிட்டி.