9th Tamil Grammar: Idaisol and Urisol Explained (Chapter 5)

இலக்கணம்: இடைச்சொல் - உரிச்சொல்

கல்வி – ரு

கற்கண்டு

இடைச்சொல் - உரிச்சொல்

சுசீலா, அவளுடைய தோழி கமீலாவின் வீட்டுக்குப் போனாள். கமீலாவும் சுல்தானும் தொலைக்காட்சி பச் நிகழ்ச்சியைப் பார்த்துக் கொண்டிருந்தனர். சுல்தானைவிடக் கமீலா இரண்டு ஆண்டுகள் பெரியவள். ஆனால் உருவத்தில் சுல்தான்தான் அண்ணனைப் போல இருப்பான். சுசீலாவைக் கண்டவுடன் கமீலா மகிழ்ச்சியடைந்தாள்.

மேற்கண்ட பகுதியில் இடைச் சொற்களை இனம் காண முடிகிறதா?

இன், கு, உடைய, உம், ஐ, விட, கள், ஆனால், தான், போல, உடன் போன்றவை இடைச் சொற்கள்.

பெயர்ச் சொற்கள், வினைச் சொற்கள் ஆகியவற்றைப்போல இடைச்சொற்கள் தமிழில் மிகுதியாக இல்லை. ஆயினும், இடைச் சொற்களே மொழிப் பயன்பாட்டை முழுமையாக்குகின்றன.

இடைச் சொற்கள், பெயரையும், வினையையும் சார்ந்து இயங்கும் இயல்பை உடையன; தாமாகத் தனித்து இயங்கும் இயல்பை உடையன அல்ல என்கிறார் தொல்காப்பியர்.

இடைச்சொல் பலவகையாக அமையும்.

இடைச்சொற்களின் வகைகள்

வேற்றுமை உருபுகள் - ஐ, ஆல், கு, இன், அது, கண்

பன்மை விகுதிகள் - கள், மார்

திணை, பால் விகுதிகள் - ஏன், ஓம், ஆய், ஈர்(கள்), ஆன், ஆள், ஆர், ஆர்கள், து, அ

கால இடைநிலைகள் - கிறு, கின்று,...

பெயரெச்ச, வினையெச்ச விகுதிகள் - அ, உ, இ, மல்,...

எதிர்மறை இடைநிலைகள் - ஆ, அல், இல்

தொழிற்பெயர் விகுதிகள் - தல், அம், மை

வியங்கோள் விகுதிகள் - க, இய

சாரியைகள் - அத்து, அற்று, அம்,...

உவம உருபுகள் - போல, மாதிரி

இணைப்பிடைச் சொற்கள் - உம், அல்லது, இல்லையென்றால், ஆனால், ஓ, ஆகவே, ஆயினும், எனினும்,...

தத்தம் பொருள் உணர்த்தும் இடைச் சொற்கள் - உம், ஓ, ஏ, தான், மட்டும், ஆவது, கூட, ஆ, ஆம்

சொல்லுருபுகள் - மூலம், கொண்டு, இருந்து, பற்றி, வரை

வினா உருபுகள் – ஆ, ஓ

இவற்றுள் உம், ஓ, ஏ, தான், மட்டும், ஆவது, கூட, ஆ, ஆம் ஆகிய இடைச்சொற்கள் தற்காலத் தமிழில் மிகுதியாகப் பயன்படுத்தப்படுகின்றன.

உம்

'உம்' என்னும் இடைச்சொல் எதிர்மறை, சிறப்பு, ஐயம், எச்சம், முற்று, அளவை, தெரிநிலை, ஆக்கம் என்னும் பொருள்களில் வரும்.

மழை பெய்தும் புழுக்கம் குறையவில்லை. (எதிர்மறை உம்மை )

பாடகர்களும் போற்றும் பாடகர். (உயர்வு சிறப்பு)

ஓ

ஓகார இடைச்சொல் ஒழியிசை, வினா, சிறப்பு (உயர்வு, இழிவு), எதிர்மறை, தெரிநிலை, கழிவு, பிரிநிலை, அசைநிலை ஆகிய எட்டுப் பொருளில் வரும் என்று நன்னூல் கூறுகிறது.

தற்காலத்தில் ஓகார இடைச்சொல் பிரிநிலைப் பொருளில் அதிகமாக வருகின்றது. அதைத் தவிர ஐயம், உறுதியாகக் கூறமுடியாமை, மிகை, இது அல்லது அது, இதுவும் இல்லை - அதுவும் இல்லை போன்ற பொருள்களிலும் வருகின்றன.

● இன்றைக்கு மழை பெய்யுமோ? (ஐயம்)

● பூங்கொடியோ மலர்க்கொடியோ பேசுங்கள். (இது அல்லது அது)

● பாலுவோ கண்ணனோ பேசாதீர்கள். (இதுவும் இல்லை - அதுவும் இல்லை )

ஏ

ஏகார இடைச்சொல் பிரிநிலை, வினா, எண், ஈற்றசை, தேற்றம், இசைநிறை ஆகிய ஆறு பொருள்களில் வரும் என்று நன்னூல் குறிப்பிடுகின்றது.

தற்காலத்தில் ஏகாரம் தேற்றப் பொருளில் அழுத்தம்) மட்டுமே வருகிறது.

அண்ணல் காந்தி அன்றே சொன்னார்.

நடந்தே வந்தான்.

தான்

'தான்' என்னும் இடைச்சொல்லும் அழுத்தப் பொருளில்தான் வருகின்றது. சொற்றொடரில் எந்தச் சொல்லுடன் வருகிறதோ, அதனை முதன்மைப்படுத்துகின்றது. ஒரு சொற்றொடரில் ஒருமுறை மட்டுமே வருகிறது.

நிர்மலாதான் நேற்று விழாவில் பாடினாள்.

நிர்மலா நேற்றுதான் விழாவில் பாடினாள்.

நிர்மலா நேற்று விழாவில்தான் பாடினாள்.

நிர்மலா நேற்று விழாவில் பாடினாள்தான்.

வேறுபாட்டை உணருங்கள்:

நிர்மலாதான் பாடினாள். (தான் - இடைச்சொல்)

நிர்மலா தானும் பாடினாள். (தான் - தற்சுட்டுப் படர்க்கை ஒருமை இடப்பெயர் - பெயர்ச்சொல்)

மட்டும்

இச்சொல் வரையறைப் பொருள் தருகிறது. முடிந்தவரை, குறிப்பிட்ட நேரம் வரை என்னும் பொருள்களிலும் வருகிறது.

படிப்பு மட்டும் இருந்தால் போதும். (வரையறைப் பொருள்)

ஆவது

இது பல பொருள்களில் வரும் இடைச்சொல்லாகும்.

● ஐந்து பேராவது வாருங்கள். (குறைந்த அளவு)

● அவனாவது, இவனாவது செய்து முடிக்கவேண்டும். (இது அல்லது அது)

முதலாவது, இரண்டாவது, .... (வரிசைப்படுத்தல்)

கூட

● என்னிடம் ஒரு காசு கூட இல்லை . (குறைந்தபட்சம்)

● தெருவில் ஒருவர்கூட நடமாடவில்லை . (முற்றுப் பொருள்)

● அவனுக்கு வரையக்கூடத் தெரியும். (எச்சம் தழுவிய கூற்று)

ஆ

வினாப் பொருளில் வரும் இடைச் சொல்லாகும்.

ஆ என்னும் இடைச் சொல், சொற்றொடரில் எந்தச் சொல்லுடன் இணைந்து வருகிறதோ, அச்சொல் வினாவாகிறது.

புகழேந்தி நேற்று உன்னுடன் பேசினானா?

புகழேந்தி நேற்று உன்னுடனா பேசினான்?

ஆம்

சொற்றொடரின் இறுதியில் வந்து இசைவு, சாத்தியம், பொருத்தம் ஆகிய பொருள்களிலும், தகவலாகவும், வதந்தியாகவும் செய்தியைக் கூறுவதற்கும் பயன்படுகிறது.

உள்ளே வரலாம். (இசைவு)

இனியன் தலைநகர் போகிறானாம். (தகவல்)/செய்தி

பறக்கும் தட்டு நேற்றுப் பறந்ததாம். (வதந்தி)/பொய்மொழி

தெரிந்து தெளிவோம்

அன்று என்பது ஒருமைக்கும்

அல்ல என்பது பன்மைக்கும் உரியன.

(எ.கா.) இது பழம் அன்று . இவை பழங்கள் அல்ல.

எத்தனை என்பது எண்ணிக்கையைக் குறிக்கும்

எத்துணை என்பது அளவையும் காலத்தையும் குறிக்கும்

(எ.கா.) எத்தனை நூல்கள் வேண்டும்? எத்துணை பெரிய மரம், எத்துணை ஆண்டு பழைமையானது.

உரிச்சொற்கள்

உரிச்சொற்கள் பெயர்களையும் வினைகளையும் சார்ந்து வந்து பொருள் உணர்த்துகின்றன. உரிச்சொல் இசை, குறிப்பு, பண்பு என்னும் பொருள்களுக்கு உரியதாய் வரும். உரிச்சொற்கள் ஒவ்வொன்றும் தனித்த பொருள் உடையவை. ஆனால் இவை தனித்து வழங்கப்படுவதில்லை. உரிச் சொற்கள் செய்யுளுக்கே உரியன என்று நன்னூலார் கூறுகிறார்.

கடி மலர் - மணம் மிக்க மலர்

கடி நகர் - காவல் மிக்க நகர்

கடி விடுதும் - விரைவாக விடுவோம்

கடி நுனி - கூர்மையான நுனி

- ஒரு சொல் பல பொருளுக்கு உரியது

உறு, தவ, நனி என்ற மூன்று உரிச்சொற்களும் மிகுதி என்னும் பொருளில் வருகின்றன.

உறு பசி; தவச் சிறிது; நனி நன்று - பல சொல் ஒரு பொருள்

உரிச்சொற்கள், பெயரையும் வினையையும் சார்ந்து அவற்றிற்கு முன்னால் வந்து பொருள் உணர்த்துகின்றன. மேலும் அவை

1) ஒரு சொல் பல பொருள்களுக்கு உரியதாய் வருவதும் உண்டு

2) பல சொல் ஒரு பொருளுக்கு உரியதாய் வருவதும் உண்டு

மழ, குழ என்பவற்றிலிருந்து உருவானவை மழலை, குழந்தை போன்ற சொற்கள். உவப்பு (உவகை), பசப்பு (நிறம் மங்குதல்), பயப்பு (பயன்) போன்றவை அப்படியே பயன்படுகின்றன. செழுமை என்பது செழிப்பு, செழித்த, செழிக்கும் எனப் பெயராகவும், வினையாகவும் பயன்படுகிறது. விழுமம் என்பது விழுப்பம், விழுமுதல், விழுமிய எனப் பெயராகவும் வினையாகவும் பயன்படுகிறது. பிற உரிச் சொற்களும் அவ்வாறே தற்காலத்தில் பயன்படுகின்றன.

Tamil Grammar Guide: Ilakkana Kurippu Explained (Detailed Examples)

இலக்கணக் குறிப்பு

பக்கம் 34

மூதூர் - பண்புத்தொகை

பிரிப்பு: முதுமை + ஊர் --> முதுமை ஆகிய ஊர்.

இங்கு 'மை' என்னும் பண்பு உருபும் 'ஆகிய', 'ஆன' ஆகிய பண்பு உருபுகளும் மறைந்து வந்துள்ளதால் இது பண்புத்தொகை ஆயிற்று.

உறுதுயர் - வினைத்தொகை

உற்ற துயர்

உறுகின்ற துயர்

உறும் துயர்

இங்கு, 'உற்ற, உறுகின்ற, உறும்' ஆகியவை பெயரெச்சங்கள். 'உறுதுயர்' என்ற சொல்லில் மூன்று காலங்களையும் காட்டக்கூடிய எச்சங்கள் மறைந்து வந்துள்ளன. இவ்வாறு 'காலம் கரந்த பெயரெச்சம்' வினைத்தொகை எனப்படுகிறது. (கரந்த - மறைந்து வந்த...)

கைதொழுது - மூன்றாம் வேற்றுமைத்தொகை

கைதொழுது என்பது 'கையால் தொழுது' என விரிந்து வரும்.

கைதொழுது என்ற சொல்லில் மூன்றாம் வேற்றுமை உருபு 'ஆல்' மறைந்து வந்துள்ளது. எனவே இது மூன்றாம் வேற்றுமைத்தொகை ஆயிற்று.

தடக்கை - உரிச்சொற்றொடர்

(தட - நீண்ட)

நீண்ட கை என்பது இதன் பொருள்.

பெயர் மற்றும் வினைச்சொற்களின் பொருளை உயர்த்திக் கூறுவது உரிச்சொற்கள் ஆகும். இயல்பான கையை நீண்ட கை என உயர்வாகக் கூறியதால் இது உரிச்சொல் ஆயிற்று.

பக்கம் 55

நன்மொழி - பண்புத்தொகை

பிரிப்பு: நன்மை + மொழி

நன்மை ஆகிய மொழி, நன்மையான மொழி - என விரிந்து வருகிறது.

இதில் 'மை', 'ஆன', 'ஆகிய' என்னும் பண்பு உருபுகள் மறைந்து வந்துள்ளதால் இது பண்புத்தொகை ஆயிற்று.

வியத்தல், நோக்கல், எழுதுதல், உரைத்தல், செப்பல், இருத்தல், வழங்கல் - தொழிற்பெயர்

வியத்தல்: வியப்பு என்னும் வினையைக் குறிக்கக்கூடிய பெயர் ஆதலின் இது தொழிற் பெயர் ஆயிற்று. தொழிற்பெயர் விகுதி 'தல்' வந்துள்ளது.

நோக்கல்: நோக்கு + அல். 'நோக்கு' என்ற வினையைக் குறிக்கக்கடிய தொழிலின் பெயர் ஆதலின் தொழிற் பெயர் ஆயிற்று. தொழிற்பெயர் விகுதி 'அல்' வந்துள்ளது.

எழுதுதல்: எழுது என்ற வினையைக் குறிக்கக்கூடிய பெயர் ஆதலின் தொழிற்பெயர் ஆயிற்று. தொழிற்பெயர் விகுதி 'தல்' வந்துள்ளது.

உரைத்தல்: உரை என்ற வினையின் பெயர் ஆதலின் இது தொழிற் பெயர் ஆயிற்று. தொழிற்பெயர் விகுதி 'தல்' வந்துள்ளது.

செப்பல்: செப்பு (சொல்லு) என்ற வினையின் பெயரைக் குறிப்பதால் இது தொழிற் பெயர் ஆயிற்று. செப்பு + அல். இங்கே தொழிற்பெயர் விகுதி 'அல்' வந்துள்ளது.

இருத்தல்: இரு என்ற வினையின் பெயரை குறிப்பதால் இது தொழிற் பெயர் ஆயிற்று. இங்கே 'தல்' என்ற தொழிற்பெயர் விகுதி வந்துள்ளது.

வழங்கல்: வழங்கு என்ற வினையின் பெயரைக் குறிப்பதால் இது தொழிற் பெயராயிற்று. வழங்கு + அல். இங்கே 'அல்' என்பது தொழிற்பெயர் விகுதி ஆகும்.

பக்கம் 57

அசைஇ, கெழீஇ - சொல்லிசை அளபெடை

அசைஇ: இளைப்பாறி. (அசாவிடுதல்-இளைப்பாறுதல்). ஐகாரத்தின் இனமான 'இ' அளபெடுத்து, இளைப்பாறுதல் என்ற பெயர்ச் சொல்லை (தொழிற்பெயரை) 'இளைப்பாறி' என்ற வினை எச்சச்சொல்லாக மாற்றுகிறது.

கெழீஇ: கெழு- துணை, உறவு, பழக்கம். கெழு- பழக்கம் --> பெயர்ச்சொல் (தொழிற்பெயர்). கெழு+ஈ+இ --> பழகி.

இவ்வாறு பெயர்ச் சொல்லின் மீது 'இ' என்னும் எழுத்து அளபெடுத்து வினையெச்சச் சொல்லாக மாற்றுவது அல்லது குறில் நெடிலாகி, நெடிலுக்கு இனமான குறில் அளபெடுத்து பெயர்ச்சொல்லை வினையெச்சச் சொல்லாக மாற்றுவது சொல்லிசை அளபெடை ஆகும்.

பரூஉக்குறை, குரூஉக்கண் - இன்னிசை அளபெடை

பரூஉக்குறை: பரு --> பரூ --> பரூ+உ --> பரூஉ. 'பருக்குறை' என்று சொல்லும்போது செய்யுளில் ஓசை குறையவில்லை.

குரூஉக்கண்: குரு --> குரூ --> குரூஉ. குரு- நிறம் (சிவந்த நிறமுடைய). 'குருக்கண்' என்று சொல்லும்போது செய்யுளில் ஓசை குறையவில்லை.

செய்யுளில் ஓசை குறையாத இடத்தும் இனிய ஓசைக்காக உயிரெழுத்துக்கள் அளபெடுப்பது இன்னிசை அளபெடை ஆகும்.

பக்கம் 85

ஊழ் ஊழ் - அடுக்குத்தொடர்

சொற்கள் அடுக்கி வருவது அடுக்குத்தொடர் ஆகும்.

வளர்வானம் - வினைத்தொகை

வளர்ந்த வானம்

வளர்கின்ற வானம்

வளரும் வானம்

காலம் கரந்த பெயரெச்சம் ஆதலின் வினைத்தொகை ஆயிற்று.

செந்தீ - பண்புத்தொகை

பிரிப்பு: செம்மை + தீ

செம்மை ஆன தீ, செம்மை ஆகிய தீ

"மை, ஆன, ஆகிய " என்னும் பண்பு உருபுகள் மறைந்து வந்துள்ளதால் இது பண்புத்தொகை ஆயிற்று.

வாரா - ஈறு கெட்ட எதிர்மறைப் பெயரெச்சம்

உரு அறிவாரா - உருவம் அறிய இயலாத.

வாரா - இயலாத.

'வாராத' என்று வந்திருக்க வேண்டும். ஆனால் ஈற்றெழுத்து (கடைசி எழுத்து) கெட்டு அழிந்து போய், மீதமுள்ள எழுத்துகள் வந்துள்ளன.

இவ்வாறு, ஈறுகெட்டும் எதிர்மறை பொருளிலும் வந்துள்ளதால், இது ஈறு கெட்ட எதிர்மறைப் பெயரெச்சம் ஆகும்.

பக்கம் 110

கேள்வியினான் - வினையாலணையும் பெயர்

கருத்தா செய்யும் வினையால் பெயரின் (கருத்தாவின்) முக்கியத்துவம் குறைவது (அணைவது) போல அமையும் சொல், வினையாலணையும் பெயர் ஆகும். (வினையால் அணையும் பெயர்).

கேள்வியின் + ஆனான். சான்றோர்தம் வாய்ச் சொற்களைக் கேட்டறியும் தன்மையினை உடையவன் ஆனான்.

ஒரே சொல் வினையையும் வினைசெய்பவரையும் காட்டும். வினையால் அணையும் பெயரின் பகுதி வினைச்சொல்லாகவும் விகுதி பிரதிப்பெயராகவும் (அவன், அவள், அவர், அது, அன், ஆர்) அமையும். இங்கு வினைச்சொல்லால் பெயர்ச்சொல் அணைகிறது. அதனால் இது வினையாலணையும் பெயராயிற்று.

காடனுக்கும் கபிலனுக்கும் - எண்ணும்மை

காடனுக்கும் - உம்

கபிலனுக்கும் - உம்

இங்கு 'உம்' என்னும் அசைச்சொல் ஒன்றுக்கு மேற்பட்ட எண்ணிக்கையில் வந்துள்ளது. எண்ணிக்கையில் வந்துள்ளதால் எண்ணும்மை ஆயிற்று.

பக்கம் 134

குண்டலமும் குழைகாதும் - எண்ணும்மை

குண்டலமும் - உம்

குழைகாதும் - உம்

எண்ணிக்கையில் 'உம்' என்னும் அசைச்சொல் வந்துள்ளதால் 'எண்ணும்மை' ஆயிற்று.

ஆடுக - வியங்கோள் வினைமுற்று

ஆடுக - வினைச் சொல்லின் பொருள் முழுமை பெற்றுள்ளதால் 'வினைமுற்று' ஆயிற்று.

வேண்டல், விதித்தல், வாழ்த்துதல், வைதல் என்னும் பொருள்பட வரும் தொடர் உணர்ச்சித் தொடர் (வியப்புத் தொடர்) ஆகும். இங்கு 'ஆடுக' என்ற வினைமுற்று வியப்புப் பொருளில் வருவதால் இது வியங்கோள் வினைமுற்று ஆகும்.

பக்கம் 169

வண்ணமும் சுண்ணமும் - எண்ணும்மை

வண்ணமும் - உம்

சுண்ணமும் - உம்

எண்ணிக்கையில் 'உம்' வந்துள்ளதால் இது எண்ணும்மை ஆயிற்று.

பயில்தொழில், காய்மணி, உய்முறை, செய்முறை - வினைத்தொகை

பயில்தொழில்: பயின்ற தொழில், பயில்கின்ற தொழில், பயிலும் தொழில்.

காய்மணி: காய்த்த மணி, காய்க்கின்ற மணி, காய்க்கும் மணி.

உய்முறை: உய்த்த முறை, உய்க்கின்ற முறை, உய்க்கும் முறை.

செய்முறை: செய்த முறை, செய்கின்ற முறை, செய்யும் முறை.

இவை அனைத்தும் காலம் கரந்த பெயரெச்சம் என்பதால் வினைத்தொகை ஆகும்.

காக்கென்று - தொகுத்தல் விகாரம்

காக்கவென்று என்று வந்திருக்க வேண்டும். (காக்க + என்று --> காக்க + வ் + என்று --> காக்கவென்று (வ்- உடம்படு மெய்))

ஆனால், காக்க + என்று --> காக்க் + என்று (அகர ஈறு கெட்டு) --> காக்கென்று.

இவ்வாறு இயல்பான வடிவமாய் இல்லாமல் குறைந்த எழுத்துகளால் (சொல்லினது பொருளைத் தொகுத்து) கூறுவது, தொகுத்தல் விகாரம் ஆகும்.

கணீர் - இடைக்குறை

'கண்ணீர்' என்று வந்திருக்க வேண்டும்.

சொல்லின் இடையில் ஓர் எழுத்து குறைந்து வந்துள்ளதால் இது 'இடைக்குறை' ஆயிற்று.

மெய்முறை - வேற்றுமைத் தொகை

மெய்யின்(உடலின்) முறை - 'இன்' வேற்றுமை உருபு.

வேற்றுமை உருபு மறைந்து வந்துள்ளதால் இது வேற்றுமைத் தொகையாகும்.

கைமுறை - மூன்றாம் வேற்றுமை உருபும் பயனும் உடன் தொக்க தொகை

கையால் செய்யும் முறை

'ஆல்' - மூன்றாம் வேற்றுமை உருபு.

செய்யும் - 'கை' என்ற கருவியின் பயன்.

மூன்றாம் வேற்றுமை உருபும் பயனும் மறைந்து வந்துள்ளதால் இது மூன்றாம் வேற்றுமை உருபும் பயனும் உடன்தொக்க தொகை ஆகும்.

Purapporul Ilakkanam 1 Mark Questions and Answers | Tamil Grammar

புறப்பொருள் இலக்கணம் ஒரு மதிப்பெண் வினாக்கள்

1. வெட்சி என்பது யாது? ஆநிரை கவர்தல்
2. கரந்தை என்பது யாது? ஆநிரை மீட்டல்
3. வஞ்சி என்பது யாது? மண்ணாசை கருதிப் போருக்குச் செல்வது
4. காஞ்சி என்பது யாது? மாற்று அரசனோடு எதிர்த்து போரிடுவது
5. நொச்சி என்பது யாது? மதில் காத்தல்
6. உழிஞை என்பது யாது? கோட்டையை சுற்றி வளைத்தல்
7. தும்பை என்பது யாது? வீரர்கள் ஒருவரோடு ஒருவர் போரிடுவது
8. வாகை என்பது யாது? வெற்றி பெற்ற மன்னன் வாகைப் பூவைச் சூடி மகிழ்வது
9. பாடாண்திணை என்பது யாது? ஆண்மகனைப் புகழ்ந்து பாடுவது
10. பொதுவியல்திணை என்பது யாது? வெட்சி முதல் பாடாண்திணை வரை சொல்லாத செய்திகளைப் பொதுவாகக் கூறுவது
11. கைக்கிளை என்பது யாது? ஒருதலைக் காமம்
12. பெருந்திணை என்பது யாது? பொருந்தாக் காமம்
13. இட்லிப் பூ எனப்படுவது எது? வெட்சிப் பூ
14. கரந்தையின் வேறு பெயர் என்ன? கொட்டைக்கரந்தை
15. பஞ்சு போன்ற நுண்மயிர் உடைய பூ எது? வஞ்சி
16. முடக்கத்தான் பூ என்பது எது? உழிஞை
17. வெண்ணிற மலர்களைக் கொண்ட சிறிய செடி எது? தும்பை
18. கொத்துக் கொத்தாகப் பூக்கும் நீல நிற, மணம் உள்ள பூ எது? காஞ்சிப் பூ
19. கொத்துக் கொத்தாகப் பூக்கும் நீல நிற மருதநிலப் பூ எது? நொச்சி
20. கொத்துக் கொத்தாகப்பூக்கும் மங்கிய வெள்ளை நிறப் பூ எது? வாகை

Ilakkanam: Vallinam Miga Idangal (Grammar Rules for Tamil)

இலக்கணம்: வல்லினம் மிகா இடங்கள்

தொழில்நுட்பம் – ச

கற்கண்டு

தோப்புக்கள் – தோப்புகள்

கத்தி கொண்டு வந்தான் - கத்திக்கொண்டு வந்தான்

மேற்கண்ட சொற்களில் வல்லினம் மிகும்போது ஒரு பொருளும் மிகாதபோது வேறொரு பொருளும் வருவதை அறியலாம். நாம் பேசும்போதும் எழுதும்போதும் பொருள் மயக்கம் தராத வகையில் மொழியைப் பயன்படுத்துவதற்கு வல்லினம் மிகா இடங்களை அறிவது இன்றியமையாததாகும்.

வல்லினம் மிகா இடங்கள்

தற்கால உரைநடையில் வல்லினம் மிகா இடங்களாகக் கீழ்க்காண்பவற்றைக் கூறலாம்.

அது செய் இது காண்

- அது, இது என்னும் சுட்டுப் பெயர்களின் பின் வல்லினம் மிகாது.

எது கண்டாய்? எவை தவறுகள்?

- இவ்வினாப் பெயர்களின் பின் வல்லினம் மிகாது.

குதிரை தாண்டியது. கிளி பேசும்

- எழுவாய்த் தொடரில் வல்லினம் மிகாது.

அண்ணனோடு போ. எனது சட்டை

- மூன்றாம், ஆறாம் வேற்றுமை விரிகளில் வல்லினம் மிகாது.

தந்தையே பாருங்கள். மகளே தா.

- விளித் தொடர்களில் வல்லினம் மிகாது.

வந்த சிரிப்பு. பார்த்த பையன்

- பெயரெச்சத்தில் வல்லினம் மிகாது.

நாடு கண்டான். கூடு கட்டு

- இரண்டாம் வேற்றுமைத் தொகையில் வல்லினம் மிகாது.

வரும்படி சொன்னார். பெறும்படி கூறினார்.

- படி என்று முடியும் வினையெச்சத்தில் வல்லினம் மிகாது.

வாழ்க தமிழ் வருக தலைவா!

- வியங்கோள் வினைமுற்றுத் தொடரில் வல்லினம் மிகாது.

குடிதண்ணீர், வளர்பிறை, திருவளர்செல்வன்

- வினைத்தொகையில் வல்லினம் மிகாது.

ஒரு புத்தகம், மூன்று கோடி

- எட்டு, பத்து தவிர பிற எண்ணுப் பெயர்களுடன் புணரும் வல்லினம் மிகாது.

தாய்தந்தை, இரவுபகல்

- உம்மைத் தொகையில் வல்லினம் மிகாது.

அன்று சொன்னார். என்று தருவார். அவராவது தருவதாவது யாரடா சொல். ஏனடி செல்கிறாய்? கம்பரைப் போன்ற கவிஞர் யார்?

- அன்று, இன்று, என்று, ஆவது, அடா, அடி, போன்ற என்னும் சொற்களின் பின் வல்லினம் மிகாது.

அவ்வளவு பெரியது. அத்தனை சிறியது. அவ்வாறு பேசினான். அத்தகைய பாடங்கள். அப்போதைய பேச்சு. அப்படிப்பட்ட காட்சி. நேற்றைய சண்டை.

- அவ்வளவு, இவ்வளவு, எவ்வளவு, அத்தனை, இத்தனை, எத்தனை, அவ்வாறு, இவ்வாறு, எவ்வாறு, அத்தகைய, இத்தகைய, எத்தகைய, அப்போதைய, இப்போதைய, எப்போதைய, அப்படிப்பட்ட, இப்படிப்பட்ட, எப்படிப்பட்ட நேற்றைய, இன்றைய, நாளைய ஆகிய சொற்களின் பின் வல்லினம் மிகாது.

என்னோடு சேர். மரத்திலிருந்து பறி. குரங்கினது குட்டி.

- மூன்று, ஐந்து, ஆறாம் வேற்றுமைத் தொடர்களில் வல்லினம் மிகாது.

தமிழ் படி. (ஐ) கை தட்டு. (ஆல்) வீடு சென்றாள். (கு) கரை பாய்ந்தான். (இருந்து)

- இரண்டாம், மூன்றாம், நான்காம், ஐந்தாம், வேற்றுமைத் தொகைகளில் வல்லினம் மிகாது.

தலைவி கூற்று. தொண்டர் படை

- நிலைமொழி உயர்திணையாய் அமையும் தொடரில் வல்லினம் மிகாது.

உறு பொருள் நனி தின்றான். கடி காவல்

- சால, தவ, தட, குழ என்னும் உரிச்சொற்களைத் தவிர ஏனைய உரிச்சொற்களின் பின் வல்லினம் மிகாது.

பார் பார் சலசல

- அடுக்குத் தொடர், இரட்டைக் கிளவி ஆகியவற்றில் வல்லினம் மிகாது.

கருத்துகள் பொருள்கள் வாழ்த்துகள்

- கள் என்னும் அஃறிணைப் பன்மை விகுதி சேரும்போது வல்லினம் மிகாது. (மிகும் என்பர் சிலர்)

பைகள், கைகள்

- ஐகார வரிசை உயிர்மெய் ஓரெழுத்துச் சொற்களாய் வர, அவற்றோடு கள் விகுதி சேரும்போது வல்லினம் மிகாது.

Tamil Grammar Guide: Understanding Vallinam Mikum Idangal (Punarchi Rules)

இலக்கணம்: வல்லினம் மிகும் இடங்கள்

பண்பாடு – ங

கற்கண்டு

வாணன் வேலைக் கொடுத்தான்.

வாணன் வேலை கொடுத்தான்.

இந்த இரண்டு தொடர்களுக்கும் உள்ள பொருள் வேறுபாடு யாது?

வல்லெழுத்துகள் க, ச, த, ப ஆகிய நான்கும் மொழிக்கு முதலில் வரும். இவை நிலைமொழியுடன் புணர்கையில் அவற்றின் மெய்யெழுத்துகள் தோன்றிப் புணரும். இதை வல்லினம் மிகுதல் என்பர். இவ்வாறு எந்த எந்த இடங்களில் அவ்வல்லினம் மிகும் என்பதை விதிகளின் மூலமும் எடுத்துக்காட்டுகள் மூலமும் அறியலாம்.

வல்லினம் மிகும் இடங்கள்

தற்கால உரைநடையில் வல்லினம் மிகவேண்டிய இடங்களாகக் கீழ்க்காண்பனவற்றைக் கூறலாம்.

விதி 1: சுட்டு, வினா எழுத்துகள்

அச்சட்டை

இந்தக் காலம்

எத்திசை?

எந்தப் பணம்?

அ, இ என்னும் சுட்டெழுத்துகளுக்குப் பின்னும், அந்த, இந்த என்னும் சுட்டுப் பெயர்களின் பின்னும், எ என்னும் வினாவெழுத்தின் பின்னும், எந்த என்னும் வினாச் சொல்லின் பின்னும் வல்லினம் மிகும்.

விதி 2: இரண்டாம் வேற்றுமை உருபு

கதவைத் திற

தகவல்களைத் திரட்டு

காட்சியைப் பார்

ஐ என்னும் இரண்டாம் வேற்றுமை உருபு வெளிப்படும் தொடர்களில் வல்லினம் மிகும்.

விதி 3: நான்காம் வேற்றுமை உருபு

முதியவருக்குக் கொடு

மெட்டுக்குப் பாட்டு

ஊருக்குச் செல்

கு என்னும் நான்காம் வேற்றுமை உருபு வெளிப்படும் தொடர்களில் வல்லினம் மிகும்.

விதி 4: சொல்லுருபுகள்

எனக் கேட்டார்

வருவதாகக் கூறு

என, ஆக போன்ற சொல்லுருபுகளின்பின் வல்லினம் மிகும்.

மேற்கண்டவாறு வல்லினம் மிகும் இடங்களை இனங்கண்டு பயன்படுத்தத் தொடங்கினாலே , தவறுகளைத் தவிர்த்துவிடலாம். மரபையும் பட்டறிவையும் தாண்டி, சொற்களை ஒலித்துப் பார்ப்பதும் வல்லினம் மிகும், மிகா இடங்களை அறிவதற்கு எளியவழி எனலாம்.

தோன்றல், திரிதல், கெடுதல் என விகாரப் புணர்ச்சி மூன்று வகைப்படும். வல்லினம் மிகுந்து வருதல் தோன்றல் விகாரப் புணர்ச்சியின்பாற்படும்.

சொல்லமைப்பின் கட்டுப்பாடுகளைப் பேணவும் பொருள் மயக்கத்தைத் தவிர்க்கவும் பேச்சின் இயல்பைப் பேணவும் இனிய ஓசைக்காகவும் இவ்வல்லின எழுத்துகளின் புணர்ச்சி இலக்கணம் தேவைப்படுகிறது.

மேலும் சில வல்லினம் மிகும் இடங்கள்

அதற்கு, இதற்கு, எதற்கு

அதற்குச் சொன்னேன்

இதற்குக் கொடு

எதற்குக் கேட்கிறாய்?

அதற்கு, இதற்கு, எதற்கு என்னும் சொற்களின் பின் வல்லினம் மிகும்.

இனி, தனி

இனிக் காண்போம்

தனிச் சிறப்பு

இனி, தனி ஆகிய சொற்களின்பின் வல்லினம் மிகும்.

மிக

மிகப் பெரியவர்

மிக என்னும் சொல்லின்பின் வல்லினம் மிகும்.

எண்ணுப் பெயர்கள்

எட்டுத் தொகை

பத்துப்பாட்டு

எட்டு, பத்து என்னும் எண்ணுப் பெயர்களின்பின் வல்லினம் மிகும்.

ஓரெழுத்து ஒரு மொழி

தீப் பிடித்தது

பூப் பந்தல்

ஓரெழுத்து ஒரு மொழிக்குப் பின் வல்லினம் மிகும்.

ஈறுகெட்ட எதிர்மறைப் பெயரெச்சம்

கூவாக் குயில்

ஓடாக் குதிரை

ஈறுகெட்ட எதிர்மறைப் பெயரெச்சத்தின்பின் வல்லினம் மிகும்.

வன்தொடர்க் குற்றியலுகரம்

கேட்டுக் கொண்டான்

விற்றுச் சென்றான்

வன்தொடர்க் குற்றியலுகரங்கள் நிலை மொழியாக இருந்து புணர்கையில் வல்லினம் மிகும்.

வினையெச்சங்கள்

ஆடச் சொன்னார்

ஓடிப் போனார்

(அகர, இகர ஈற்று) வினையெச்சங்களுடன் புணர்கையில் வல்லினம் மிகும்.

ஆறாம் வேற்றுமைத் தொகை

புலித் தோல்

ஆறாம் வேற்றுமைத் தொகையில் வல்லினம் மிகும்.

திசைப் பெயர்கள்

கிழக்குப் பகுதி

வடக்குப் பக்கம்

திசைப் பெயர்களின்பின் வலிமிகும்.

இரு பெயரொட்டுப் பண்புத் தொகை

மல்லிகைப் பூ

சித்திரைத் திங்கள்

இரு பெயரொட்டுப் பண்புத் தொகையில் வல்லினம் மிகும்.

உவமைத் தொகை

தாமரைப் பாதம்

உவமைத் தொகையில் வல்லினம் மிகும்.

உரிச்சொற்கள்

சாலப் பேசினார்

தவச் சிறிது

சால, தவ, தட, குழ என்னும் உரிச்சொற்களின்பின் வல்லினம் மிகும்.

தனிக் குற்றெழுத்தை அடுத்துவரும் ஆகாரம்

நிலாச் சோறு

கனாக் கண்டேன்

தனிக் குற்றெழுத்தை அடுத்துவரும் ஆகார எழுத்தின்பின் வல்லினம் மிகும்.

உருவகச் சொற்கள்

வாழ்க்கைப் படகு

உலகப் பந்து

சில உருவகச் சொற்களில் வல்லினம் மிகும்.

Tamil Grammar: Auxiliary Verbs (Ilakkanam: Thunaivinaigal) - 9th Std

இலக்கணம்: துணைவினைகள்

இயற்கை - உ

கற்கண்டு

துணைவினைகள்

வினைவகைகள்

வினைச்சொற்களை அவற்றின் அமைப்பு, பொருள், சொற்தொடரில் அவை தொழிற்படும் விதம் முதலான அடிப்படை பலவகையாகப் பாகுபடுத்தலாம்.

தனிவினையும் கூட்டுவினையும்

வினைச்சொற்களை அமைப்பின் அடிப்படையில் தனிவினை, கூட்டுவினை என இருவகைப்படுத்தலாம்.

தனிவினை

படி படியுங்கள் படிக்கிறார்கள்.

மேற்காணும் சொற்களைக் கவனியுங்கள். இவற்றில் படி என்னும் வினையடியும் சில ஓட்டுகளும் உள்ளன. படி என்னும் வினையடி , பகாப்பதம் ஆகும். அதை மேலும் பொருள் தரக்கூடிய கூறுகளாகப் பிரிக்க முடியாது. இவ்வாறு, தனிவினையடிகளை அல்லது தனிவினையடிகளை கொண்ட வினைச்சொற்களைத் தனிவினை என்பர்.

கூட்டுவினை

ஆசைப்பட்டேன், கண்டுபிடித்தார்கள், தந்தியடித்தேன், முன்னேறினோம்.

மேற்காணும் சொற்களைக் கவனியுங்கள். ஆசைப்படு, கண்டுபிடி, தந்தியடி, முன்னேறு என்பன அவற்றின் வினையடிகள். அவை பகுபதங்கள் ஆகும். இவ்வாறு பகுபதமாக உள்ள வினையடிகளைக் கூட்டுவினையடிகள் என்பர். அவ்வகையில் கூட்டுவினையடிகளைக் கொண்ட வினைச்சொற்களைக் கூட்டுவினை என்பர்.

கூட்டுவினைகள் உருவாகும் மூன்று வகைகள்:

1. பெயர் + வினை = வினை
   • தந்தி + அடி = தந்தியடி
   • ஆணை + இடு = ஆணையிடு
   • கேள்வி + படு = கேள்விப்படு
2. வினை + வினை = வினை
   • கண்டு + பிடி = கண்டுபிடி
   • சுட்டி + காட்டு = சுட்டிக்காட்டு
   • சொல்லி + கொடு = சொல்லிக்கொடு
3. இடை + வினை = வினை
   • முன் + ஏறு = முன்னேறு
   • பின் + பற்று = பின்பற்று
   • கீழ் + இறங்கு = கீழிறங்கு

முதல்வினையும் துணைவினையும்

நான் படம் பார்த்தேன்.
கண்ணன் போவதைப் பார்த்தேன்.

இந்தச் சொற்றொடர்களில், பார் என்னும் வினை, கண்களால் பார்த்தல் என்னும் பொருளைத் தருகிறது. இது பார் என்னும் வினையின் அடிப்படைப் பொருள் அல்லது சொற்பொருள்(LEXICAL MEANING) எனலாம்.

ஓடப் பார்த்தேன்.
எழுதிப் பார்த்தாள்.

இந்தச் சொற்றொடர்களில் ஓடப்பார், எழுதிப்பார் என்பன கூட்டுவினைகள் ஆகும். இவற்றில் இரண்டு உறுப்புகள் உள்ளன. ஓட, எழுதி என்பன முதல் உறுப்புகள். இவை அந்தந்த வினைகளின் அடிப்படைப் பொருளைத் தருகின்றன. பார் என்பது இரண்டாவது உறுப்பு. இது இவ்வினையின் அடிப்படைப் பொருளான பார்த்தல் என்னும் பொருளைத் தராமல் தனது முதல் உறுப்போடு சேர்ந்து வேறு பொருள் தருகிறது.

ஓடப் பார்த்தேன் - இதில் பார் என்பது முயன்றேன் என்னும் முயற்சிப் பொருளைத் தருகிறது.

எழுதிப் பார்த்தாள் - இதில் பார் என்பது சோதித்து அறிதல் என்னும் பொருளைத் தருகிறது.

ஒரு கூட்டுவினையின் முதல் உறுப்பாக வந்து தன் அடிப்படைப் பொருளைத் தரும் வினை, முதல் வினை (MAIN VERB) எனப்படும். ஒரு கூட்டு வினையின் இரண்டாவது உறுப்பாக வந்து தன் அடிப்படைப் பொருளை விட்டுவிட்டு முதல் வினைக்குத் துணையாக வேறு இலக்கணப் பொருளைத் தரும் வினை, துணைவினை எனப்படும்.

கூட்டுவினையின் முதல் வினை செய அல்லது செய்து என்னும் வினையெச்ச வடிவில் இருக்கும். துணைவினை, வினையடி வடிவில் இருக்கும். துணைவினையே திணை, பால், இடம், காலம் காட்டும் விகுதிகளைப் பெறும். தமிழில் ஏறத்தாழ 40 துணைவினைகள் உள்ளன. அவற்றுள் பெரும்பாலானவை முதல்வினையாகவும் செயல்படுகின்றன.

பார், இரு, வை, கொள், போ, வா, முடி, விடு, தள்ளு, போடு, கொடு, காட்டு முதலானவை இருவகை வினைகளாகவும் செயல்படுகின்றன.

துணைவினைகளின் பண்புகள்

1. துணைவினைகள் பேசுவோரின் மனநிலை, செயலின் தன்மை போன்றவற்றைப் புலப்படுத்துகின்றன.
2. இவை முதல் வினையைச் சார்ந்து அதன் வினைப்பொருண்மைக்கு மெருகூட்டுகின்றன.
3. பேச்சு மொழியிலேயே துணைவினைகளின் ஆதிக்கம் அதிகமாக உள்ளது.

தற்காலத் தமிழில் ஆம், ஆயிற்று, இடு, ஒழி, காட்டு, கூடும், கூடாது, கொடு, கொண்டிரு, கொள், செய், தள்ளு, தா, தொலை, படு, பார், பொறு, போ, வை, வந்து, விடு, வேண்டாம், முடியும், முடியாது, இயலும், இயலாது, வேண்டும், உள் போன்ற பல சொற்கள் துணைவினைகளாக வழங்குகின்றன.

தமிழ் மற்றும் ஜப்பானிய மொழிகளில் துணைவினைகள் முதல் வினைகளுக்குப் பின்பே இடம்பெறும். (எ.கா.) கீழே விழப் பார்த்தான். இத்தொடரில் விழு (விழ) என்பது முதல்வினை; பார்த்தான் என்பது துணைவினை.

தமிழின் துணைவினைக் கொள்கை ஆங்கிலத்தின் துணைவினைக் கொள்கையிலிருந்து வேறுபட்டது. அதாவது, தமிழில் துணைவினையாக வரும் வேர்ச்சொல் சில தொடர்களில் முதல்வினையாகவும் வரும்.

Comprehensive Guide to Tamil Grammar: Thodar Ilakkanam (Sentence Structure)

மொழி –க கற்கண்டு

இலக்கணம்: தொடர் இலக்கணம்

எட்வர்டு வந்தான்.

இந்தச் சொற்றொடரில் பெயர்ச்சொல், எட்வர்டு என்பதாகும். இந்தச் சொற்றொடர் எழுவதற்கு அடிப்படையாக அமைந்த பெயர்ச்சொல்லையே எழுவாய் என்கிறோம்.

கனகாம்பரம் பூத்தது.

இந்தச் சொற்றொடரில் வினைச்சொல், பூத்தது. இந்த வினைச்சொல்லே பயனிலை ஆகும். ஒரு தொடரில் பயன் நிலைத்து இருக்கும் இடத்தைப் பயனிலை என்கிறோம்.

மீனா கனகாம்பரத்தைச் சூடினாள்.

இத்தொடரில், சொற்றொடர் எழுவதற்குக் காரணமாக அமைந்த மீனா என்னும் பெயர்ச்சொல்லே எழுவாய் ஆகும். அவ்வெழுவாயின் பயனிலை சூடினாள் என்பதாகும். எனில், மற்றொரு பெயர்ச்சொல்லான கனகாம்பரம் என்பது யாது? அது செயப்படுபொருள் என்று அழைக்கப்படுகிறது. எழுவாய் ஒரு வினையைச் செய்ய அதற்கு அடிப்படையாய்த் தேர்ந்தெடுக்கப்பட்ட பொருளே, செயப்படுபொருள் ஆகும்.

ஒரு தொடரில் எழுவாயும், செயப்படு பொருளும் பெயர்ச்சொல்லாகவும் பயனிலை வினை முற்றாகவும் இருக்கும். பயனிலை, அந்தத் தொடரின் பயன் நிலைத்து இருக்கும் இடமாகும். ஒரு தொடரில் செயப்படுபொருள் இருக்க வேண்டும் என்கிற கட்டாயம் இல்லை. செயப்படுபொருள் தோன்றும் தொடர், விளக்கமாக இருக்கும்.

படித்தாய்.

இத்தொடரில் படித்தாய் என்பது பயனிலை. நீ என்னும் எழுவாய் வெளிப்படையாகத் தெரியவில்லை. இதைத் தோன்றா எழுவாய் என்று கூறுகிறோம்.

பயனிலை வகைகள்

நான் வந்தேன்.

இத்தொடரில் வினைமுற்று பயனிலையாக வந்தது. இது வினைப் பயனிலை எனப்படும்.

சொன்னவள் கலா.

இங்கு கலா என்னும் பெயர்ச்சொல் பயனிலையாக வந்துள்ளது. இது பெயர்ப் பயனிலை எனப்படும்.

விளையாடுபவன் யார்?

இங்கு யார் என்னும் வினாச்சொல் பயனிலையாக வந்துள்ளது. இது வினாப் பயனிலை எனப்படும்.

சில இடங்கள் தவிர, ஒரு சொற்றொடரில் எழுவாய், பயனிலை, செயப்படுபொருள் மூன்றும் இந்த வரிசையில்தான் வரவேண்டும் என்று எந்தக் கட்டுப்பாடும் இல்லை. தமிழின் தொடர் அமைப்பின் சிறப்புகளுள் இதுவும் ஒன்று.

எடுத்துக்காட்டு:

• நான் பாடத்தைப் படித்தேன் (எழுவாய், செயப்படுபொருள், பயனிலை)
• பாடத்தை நான் படித்தேன் (செயப்படுபொருள், எழுவாய், பயனிலை)
• படித்தேன் நான் பாடத்தை (பயனிலை, எழுவாய், செயப்படுபொருள்)
• நான் படித்தேன் பாடத்தை (எழுவாய், பயனிலை, செயப்படுபொருள்)
• பாடத்தைப் படித்தேன் நான் (செயப்படுபொருள், பயனிலை, எழுவாய் )

நல்ல நூல் ஒன்று படித்தேன்.

இத்தொடரில் நல்ல என்னும் சொல், எழுவாயாக வரும் பெயர்ச்சொல்லுக்கு அடையாக வருகிறது. இவ்வாறு அமைவதனைப் பெயரடை என்கிறோம்.

மகிழ்நன் மெல்ல வந்தான்.

இத்தொடரில் மெல்ல என்னும் சொல், வந்தான் என்னும் வினைப் பயனிலைக்கு அடையாக வருகிறது. இதை வினையடை என்கிறோம்.

வினை வகைகள் - தன்வினை, பிறவினை

மாணவர்கள் கால்பந்து விளையாடிக்கொண்டிருக்கின்றார்கள். எங்கும் விளையாட்டு, மகிழ்ச்சியின் ஆரவாரம். கண்ணன் முகமதுவை நோக்கி, "பந்தை என்னிடம் உருட்டு" என்று கத்தினான். முகமது பந்தைக் கண்ணனிடம் உருட்டினான். பந்து உருண்டது. கண்ணன் முகமது மூலம் பந்தை உருட்டவைத்தான்.

மேற்கண்ட சூழலில்,

பந்து உருண்டது என்பது தன்வினை.

உருட்டவைத்தான் என்பது பிறவினை.

எழுவாய் ஒரு வினையைச் செய்ய வைத்தால் அது பிறவினை எனப்படும்.

பிறவினைகள், வி, பி போன்ற விகுதிகளைக் கொண்டும் செய், வை, பண்ணு போன்ற துணை வினைகளை இணைத்தும் உருவாக்கப்படுகின்றன.

தன்வினை: அவன் திருந்தினான்

தன்வினை: அவர்கள் நன்றாக படித்தனர்

பிறவினை: அவனைத் திருந்த செய்தான்

பிறவினை: தந்தை மகனை நன்றாகப் படிக்க வைத்தார்

பிறவினை: பள்ளிக்குப் புத்தகங்கள் வருவித்தார்.

செய்வினை, செயப்பாட்டுவினை

அப்பா சொன்னார், "குமுதா, இலையில் உள்ள இட்டிலியை விரைந்து சாப்பிடு. அடுத்துத் தோசை வரப்போகிறது." அவள் சாப்பிட்டு முடிப்பதற்குள், தோசை வைக்கப்பட்டது.

அப்பா சொன்னார் - செய்வினைத் தொடர்

தோசை வைக்கப்பட்டது - செயப்பாட்டுவினைத் தொடர்

இது போலவே, பாட்டுப் பாடுகிறாள் - செய்வினைத் தொடர்

பாட்டுப் (அவளால்) பாடப்பட்டது - செயப்பாட்டுவினைத் தொடர்

தெரிந்து தெளிவோம்

செய்பவரை முதன்மைப்படுத்தும் வினை செய்வினை; செயப்படு பொருளை முதன்மைப்படுத்தும் வினை செயப்பாட்டு வினை என்பதை நினைவில் கொள்க.

'படு' என்னும் துணை வினைச்சொல் செயப்பாட்டு வினைத் தொடரில் சேர்ந்துவிடுகிறது.

'படு' என்பதைப் போல, 'உண், பெறு' முதலான துணைவினைகள் செயப்பாட்டு வினைகளாக அமைகின்றன. அவற்றைப் போலவே, எச்சங்களுடன் சேர்ந்து ஆயிற்று, போயிற்று, போனது' முதலான துணை வினைகள் செயப்பாட்டுவினைகளை உருவாக்குகின்றன.

• கோவலன் கொலையுண்டான்.
• ஓவியம் குமரனால் வரையப்பட்டது.
• வீடு கட்டியாயிற்று.
• சட்டி உடைந்து போயிற்று.
• பணம் காணாமல் போனது.

பயன்பாட்டுத் தொடர்கள்

அப்துல் நேற்று வந்தான் - தன்வினைத் தொடர்

அப்துல் நேற்று வருவித்தான் - பிறவினைத் தொடர்

கவிதா உரை படித்தாள் - செய்வினைத் தொடர்

உரை கவிதாவால் படிக்கப்பட்டது - செயப்பாட்டுவினைத் தொடர்

குமரன் மழையில் நனைந்தான் - உடன்பாட்டுவினைத் தொடர்

குமரன் மழையில் நனையவில்லை - எதிர்மறைவினைத் தொடர்

என் அண்ணன் நாளை வருவான் - செய்தித் தொடர்

எவ்வளவு உயரமான மரம்! - உணர்ச்சித் தொடர்

உள்ளே பேசிக்கொண்டிருப்பவர் யார்? - வினாத் தொடர்

பூக்களைப் பறிக்காதீர் - கட்டளைத் தொடர்

இது நாற்காலி - பெயர்ப் பயனிலைத் தொடர்

அவன் மாணவன் - பெயர்ப் பயனிலைத் தொடர்

பகுபத உறுப்பிலக்கணம்

பதம்(சொல்) இருவகைப் படும். அவை பகுபதம், பகாப்பதம் ஆகும். பிரிக்கக்கூடியதும், பிரித்தால் பொருள் தருவதுமான சொல் பகுபதம் எனப்படும். இது பெயர்ப் பகுபதம், வினைப் பகுபதம் என இரண்டு வகைப்படும்.

பகுபத உறுப்புகள் ஆறு வகைப்படும்.

• பகுதி (முதனிலை) - சொல்லின் முதலில் நிற்கும்; பகாப் பதமாக அமையும்; வினைச்சொல்லில் ஏவலாகவும், பெயர்ச் சொல்லில் அறுவகைப் பெயராகவும் அமையும்.
• விகுதி (இறுதிநிலை) - சொல்லின் இறுதியில் நின்று திணை, பால், எண், இடம் காட்டுவதாகவும் அமையும்.
• இடைநிலை - பகுதிக்கும் விகுதிக்கும் இடையில் நின்று காலம் காட்டும்.
• சந்தி - பகுதியையும் பிற உறுப்புகளையும் இணைக்கும்; பெரும்பாலும் பகுதிக்கும் இடைநிலைக்கும் இடையில் வரும்.
• சாரியை - பகுதி, விகுதி, இடைநிலைகளைச் சார்ந்து வரும்; பெரும்பாலும் இடைநிலைக்கும் விகுதிக்கும் இடையில் வரும்.
• விகாரம் - தனி உறுப்பு அன்று; மேற்கண்ட பகுபத உறுப்புகளில் ஏற்படும் மாற்றம்.

பகுதி:

ஊரன் - ஊர், நடிகன் - நடி, பார்த்தான் - பார், வரைந்தான் - வரை, மடித்தார் - மடி, மகிழ்ந்தாள் – மகிழ்

விகுதி:

இடைநிலைகள்:

சந்தி:

உறுத்தும் - த் – சந்தி - த், ப், க

பொருந்திய - ய் - உடம்படுமெய் சந்தி – ய்,வ்

சாரியை:

நடந்தனன் - அன் – சாரியை - அன், ஆன், இன், அல், அற்று, இற்று, அத்து, அம், தம், நம், நும், ஏ, அ, உ, ஐ, குன்

எழுத்துப்பேறு

பகுபத உறுப்புகளுள் அடங்காமல் பகுதி, விகுதிக்கு நடுவில் காலத்தை உணர்த்தாமல் வரும் மெய்யெழுத்து எழுத்துப்பேறு ஆகும். பெரும்பாலும் 'த்' மட்டுமே வரும். சாரியை இடத்தில் 'த்' வந்தால் அது எழுத்துப்பேறு.

எடுத்துக்காட்டுகள்

வந்தனன்: வா(வ) + த்(ந்) + த் + அன் + அன்

• வா - பகுதி ('வ' ஆனது விகாரம்)
• த்(ந்) - சந்தி ('ந்' ஆனது விகாரம்)
• த் - இறந்தகால இடைநிலை
• அன் - சாரியை
• அன் - ஆண்பால் வினைமுற்று விகுதி

செய்யாதே: செய் + ய் + ஆ + த் + ஏ

• செய் - பகுதி
• ய் - சந்தி
• ஆ - எதிர்மறை இடைநிலை
• த் - எழுத்துப்பேறு
• ஏ - முன்னிலை ஒருமை ஏவல் வினைமுற்று விகுதி

தமிழ் எண்களில் எழுதுக.

பன்னிரண்டு - 12

பதிமூன்று - 13

நாற்பத்து மூன்று - 43

எழுபத்தெட்டு - 78

தொண்ணூறு - 90