"சாலை பாதுகாப்பு" குறித்து கட்டுரை எழுதுக. Essay on Road Safety in Tamil | சாலை பாதுகாப்பு கட்டுரை

"சாலை பாதுகாப்பு" குறித்து கட்டுரை எழுதுக.

முன்னுரை:

அறிவியல் வளர்ச்சியால் வாகனங்களின் எண்ணிக்கை பெருகிவிட்ட இக்காலத்தில், சாலைப் பாதுகாப்பு குறித்த விழிப்புணர்வு மிகவும் அவசியமாகிறது. இக்கட்டுரையில் சாலைப் பாதுகாப்பின் முக்கியத்துவத்தைக் காண்போம்.

விபத்துக்கான காரணங்கள்:

சாலை விபத்துகளுக்குப் பல காரணங்கள் உள்ளன. அதிவேகமாக வாகனங்களை இயக்குதல், மது அருந்திவிட்டு ஓட்டுதல், கைபேசியில் பேசிக்கொண்டே ஓட்டுதல், சாலை விதிகளை மதிக்காமல் செல்லுதல், முறையான பயிற்சி இன்றி வாகனங்களை இயக்குதல் போன்றவை முக்கியக் காரணங்களாகும். மேலும், தரமற்ற சாலைகளும், போதிய வெளிச்சமின்மையும் விபத்துகளுக்கு வழிவகுக்கின்றன.

பாதுகாப்பு நடவடிக்கைகள்:

* இருசக்கர வாகன ஓட்டிகள் கட்டாயம் தலைக்கவசம் அணிய வேண்டும்.

* மகிழுந்து ஓட்டுநர்கள் இருக்கைப் பட்டை (Seat belt) அணிய வேண்டும்.

* பாதசாரிகள் நடைபாதையைப் பயன்படுத்த வேண்டும்; சாலையைக் கடக்க மேம்பாலங்களைப் பயன்படுத்த வேண்டும்.

* போக்குவரத்து சைகைகளுக்கு (Traffic Signals) மதிப்பளித்துச் செல்ல வேண்டும்.

* வாகனங்களை உரிய காலத்தில் பராமரித்து, நல்ல நிலையில் வைத்திருக்க வேண்டும்.

அரசின் பங்கு:

சாலைப் பாதுகாப்பை உறுதி செய்வதில் அரசுக்கு முக்கியப் பங்குண்டு. தரமான சாலைகளை அமைத்தல், சாலை விதிகளை மீறுவோருக்குக் கடுமையான அபராதம் விதித்தல், பள்ளிப் பாடத்திட்டத்தில் சாலைப் பாதுகாப்பு குறித்த பாடங்களைச் சேர்த்தல், விழிப்புணர்வு முகாம்களை நடத்துதல் போன்றவற்றின் மூலம் விபத்துகளைக் குறைக்கலாம்.

முடிவுரை:

'வேகம் விவேகமல்ல, ஆபத்து', 'பயணம் தொடரட்டும், பாதுகாப்பாக'. நமது உயிர் விலைமதிப்பற்றது. சாலை விதிகளை மதிப்போம், விபத்துகளைத் தவிர்ப்போம். பாதுகாப்பான பயணத்தை மேற்கொண்டு, வளமான இந்தியாவை உருவாக்குவோம்.

உங்கள் பகுதியில் நடைபெற்ற கலைத் திருவிழாவிற்குச் சென்று வந்த நிகழ்வைக் கட்டுரையாக்குக.

முன்னுரை:

எங்கள் ஊரான திருநெல்வேலியில், ஒவ்வொரு ஆண்டும் அரசு சார்பில் கலைத் திருவிழா நடைபெறும். இந்த ஆண்டு வ.உ.சி. மைதானத்தில் மிகச் சிறப்பாக நடைபெற்றது. அந்த விழாவிற்கு நான் சென்று வந்த அனுபவத்தை இக்கட்டுரையில் காண்போம்.

கலைகளின் சங்கமம்:

நம் தமிழ்நாட்டில் பல சிறப்பான நாட்டுப்புறக் கலைகள் உள்ளன. அவற்றில் பல இன்று மறைந்து வருகின்றன. அவற்றைப் பாதுகாக்கவும், மக்களிடம் கொண்டு சேர்க்கவும் அரசு இந்த விழாவை நடத்துகிறது. இங்கு, கரகாட்டம், மயிலாட்டம், பொய்க்கால் குதிரையாட்டம், ஒயிலாட்டம், தென் மாவட்டங்களின் சிறப்பான வில்லுப்பாட்டு, போன்ற பல கலைகள் நடைபெற்றன. அவற்றைக் நேரடியாகக் கண்டது மிகவும் மகிழ்ச்சியாக இருந்தது.

அரங்குகள் அமைப்பு:

விழா நடைபெறும் திடலின் நுழைவு வாயில், திருநெல்வேலி நெல்லையப்பர் கோயில் கோபுரத்தின் வடிவத்தில் அழகாக அமைக்கப்பட்டிருந்தது. உள்ளே சென்றதும், பல மேடைகளில் வெவ்வேறு கலை நிகழ்ச்சிகள் நடந்தன. மேலும், தாமிரபரணி ஆற்றங்கரையில் உள்ள ஒரு கிராமத்தைப் போலவே ஒரு அரங்கு உருவாக்கப்பட்டிருந்தது. அது பார்ப்பதற்கு மிகவும் தத்ரூபமாக இருந்தது.

கலை நிகழ்ச்சிகள்:

தமிழ்நாட்டின் கலைகள் மட்டுமின்றி, கேரளா, கர்நாடகா போன்ற பிற மாநில கலைஞர்களின் நிகழ்ச்சிகளும் நடைபெற்றன. இது வெவ்வேறு கலாச்சாரங்களைத் தெரிந்துகொள்ள ஒரு நல்ல வாய்ப்பாக அமைந்தது.

விளையாட்டு அரங்குகள்:

குழந்தைகளைக் கவரும் வகையில் இராட்சச ராட்டினம், சிறிய தொடர்வண்டி, மேஜிக் ஷோ போன்ற பல விளையாட்டு அரங்குகள் இருந்தன. ஒவ்வொன்றிற்கும் தனித்தனியாகக் கட்டணம் வசூலிக்கப்பட்டது.

நுழைவுக் கட்டணம்:

கலைத் திருவிழாவிற்குள் செல்ல சிறிய நுழைவுக் கட்டணம் வசூலிக்கப்பட்டது. விடுமுறை நாள் என்பதால், காலை முதல் இரவு வரை மக்கள் கூட்டம் அதிகமாகவே இருந்தது.

முடிவுரை:

இந்தக் கலைத் திருவிழாவிற்குச் சென்றது ஒரு மறக்க முடியாத அனுபவமாக இருந்தது. இது வெறும் பொழுதுபோக்கு நிகழ்வாக இல்லாமல், நமது பாரம்பரியக் கலைகளைப் பற்றி அறிந்துகொள்ளவும் உதவியது. இது போன்ற விழாக்கள் ஆண்டுதோறும் நடத்தப்பட வேண்டும்.

79th Independence Day Speech in Tamil for Students | சுதந்திர தின விழா உரை 2025

Solutions

சுதந்திர தின விழா உரை

அனைவருக்கும் என் இனிய காலை வணக்கம். மதிப்பிற்குரிய தலைமை ஆசிரியர் அவர்களே, மரியாதைக்குரிய ஆசிரியப் பெருமக்களே, இங்கே வருகை தந்துள்ள பெற்றோர்களே மற்றும் என் அருமை நண்பர்களே! உங்கள் அனைவருக்கும் எனது இனிய சுதந்திர தின நல்வாழ்த்துக்கள்.

இன்று ஆகஸ்ட் 15, நம் இந்திய வரலாற்றில் ஒரு பொன்னாள். பல நூறு ஆண்டுகள் ஆங்கிலேயரின் அடிமைத்தளையில் சிக்கித் தவித்த நம் பாரதத் தாய், விடுதலை பெற்ற நாள். இந்த சுதந்திரம் நமக்கு எளிதாகக் கிடைக்கவில்லை. மகாத்மா காந்தியின் அகிம்சை வழிப் போராட்டம், நேதாஜி சுபாஷ் சந்திர போஸின் வீர முழக்கம், ஜான்சி ராணியின் வீரம், பகத் சிங்கின் தியாகம் எனப் பல லட்சக்கணக்கான சுதந்திரப் போராட்ட வீரர்களின் ரத்தத்தாலும், தியாகத்தாலும்தான் நாம் இன்று இந்த சுதந்திரக் காற்றை சுவாசிக்கிறோம். அவர்களை இந்த நேரத்தில் நினைவுகூர்ந்து வணங்குவது நமது தலையாய கடமையாகும்.

சுதந்திரம் அடைந்த இந்த ஆண்டுகளில், நமது நாடு மகத்தான வளர்ச்சியைப் பெற்றுள்ளது. பசுமைப் புரட்சி மூலம் விவசாயத்தில் தன்னிறைவு, வெண்மைப் புரட்சி மூலம் பால் உற்பத்தியில் சாதனை, அறிவியல் மற்றும் தொழில்நுட்பத் துறையில் அபார வளர்ச்சி என நாம் பல மைல்கற்களை எட்டியுள்ளோம். இன்று, உலக அரங்கில் இந்தியா ஒரு தவிர்க்க முடியாத சக்தியாக வளர்ந்து நிற்கிறது. நமது இளைஞர்களின் திறமையும், கடின உழைப்புமே இதற்குக் காரணம்.

நண்பர்களே, மாணவர்களாகிய நாம்தான் இந்த நாட்டின் எதிர்காலத் தூண்கள். 'வேற்றுமையில் ஒற்றுமை' என்பதே நமது பலம். சாதி, மத, மொழி, இன வேறுபாடுகளைக் களைந்து, நாம் அனைவரும் 'இந்தியர்' என்ற ஒரே கொடியின் கீழ் ஒற்றுமையாக நிற்க வேண்டும். நம் முன்னோர்கள் போராடிப் பெற்றுத் தந்த இந்த சுதந்திரத்தைப் பாதுகாப்பதும், நம் நாட்டை வளர்ச்சிப் பாதையில் மேலும் கொண்டு செல்வதும் நமது கடமை. லஞ்சம், ஊழல், வறுமை போன்ற சமூகத் தீமைகளை ஒழிப்போம் என்று இந்த நன்னாளில் உறுதி ஏற்போம். நமது கடமைகளைச் சரியாகச் செய்து, இந்தியாவை ஒரு வல்லரசு நாடாக மாற்றுவோம்.

எல்லோரும் சேர்ந்து சொல்வோம்,
ஜெய் ஹிந்த்!
நன்றி, வணக்கம்.

Tamil Solvalam: Essay on Tamil Vocabulary and New Word Creation

8 மதிப்பெண் வினா, தமிழ்ச் சொல்வளம்

வினா: தமிழின் சொல்வளம்பற்றியும் புதிய சொல்லாக்கத்திற்கான தேவை குறித்தும் தமிழ் மன்றத்தில் பேசுவதற்கான உரைக்குறிப்புகளை எழுதுக.

தமிழ்மன்றப் பேச்சு

"இனிமைத் தமிழ்மொழி எமது எமக்கு இன்பம் தரும்படி வாய்த்தநல் அமுது". அமுத மொழி - தமிழ் மொழி. தமிழ்மொழியின் மன்றத்திற்கு வருகை தந்துள்ள சான்றோர் பெருமக்களே! பள்ளி எனும் தேரின் அச்சாணியாகிய தலைமை ஆசிரியர் அவர்களே! ஒளி விளக்கின் தூண்டுகோலாகிய ஆசிரியர் பெருமக்களே! நீர்த் தடாகத்தின் ஆம்பல் மொட்டுகளாகிய மாணவச் செல்வங்களே! உங்கள் அனைவருக்கும் என் பணிவான வணக்கங்கள்.

தமிழின் சொல்வளம் குறித்தும், புதிய சொல்லாக்கத்திற்கான தேவை குறித்தும் உங்களிடத்தில் நான் பேசப் போகிறேன்.

தமிழின் சொல்வளம்

கால வெள்ளத்தில் கரைந்து போன மொழிகளுக்கு இடையில் நீந்தித் தன்னை நிலை நிறுத்திக் கொண்டுள்ளது, தமிழ் மொழி. சொல்வளம் இலக்கிய செம்மொழிகளுக்கெல்லாம் பொதுவானது, என்றாலும் தமிழ் மட்டும் அதில் தலைசிறந்தது.

பயிர் வகைச் சொற்கள்

தமிழ்ச் சொல் வளத்தைப் பல துறைகளிலும் காணலாம். அதில் சிறப்பாக பயிர் வகைகளில் சொல் வளத்தைப் பற்றி இங்குக் குறிப்பிட விரும்புகிறேன்.

தாவரத்தின் அடிப்பகுதியை அதன் மென்மை வன்மை குறித்துத் தாள், தண்டு, கோல், தட்டை, தூறு, கழி, கழை, அடி எனப் பகுத்துள்ளனர்.

அடியில் இருந்து பிரிந்து செல்லும் மேல்நோக்கிய பிரிவுகளுக்கு கவை, கொப்பு, கிளை, சினை, போது, குச்சு, இணுக்கு எனப் பாகுபாடு செய்துள்ளனர்.

இலையின் வகைகளை அதன் மென்மை வன்மை பற்றி இலை, தாள், தோகை, ஓலை என்றும் காய்ந்த இலையைச் சருகு என்றும் காய்ந்த தோகையைச் சண்டு என்றும் பாகுபடுத்தி உள்ளனர்.

பூவின் மலரும் நிலைகளை அரும்பு, போது, மலர், வீ, செம்மல் எனப் பகுத்துள்ளனர்.

பிஞ்சின் வகைகளைப் பூம்பிஞ்சு, பிஞ்சு, வடு, மூச்சு, கவ்வை, குரும்பை, முட்டுக் குரும்பை, இளநீர், நுழாய், கருக்கல், கச்சல் எனப் பெயரிட்டுள்ளனர்.

இதேபோல் குலை வகைகள், காய்கனி வகைகள், மணி வகைகள், இளம் பயிர் வகைகள், இளம்தளிர் வகைகள் என ஏராளமான தமிழ்ச் சொற்கள் இருக்கின்றன.

இதனால், தமிழ் சொல்வளம் உடையது என்பதும், தமிழ்நாடு பொருள் வளம் உடையது என்பதும் தெளிவாக விளங்குகிறது.

புதிய சொல்லாக்கத்திற்கான தேவை

இனி, தமிழில் புதிய சொல்லாக்கத்திற்கான தேவை குறித்துப் பார்ப்போம்.

ஒப்பீட்டளவில் இன்று மொழியின் வளர்ச்சிக்கு ஆதாரமாகச் சொல்லாக்கம் விளங்குகிறது.

நாளும் மாறிவரும் அறிவியல், தொழில்நுட்பத்தின் விளைவாகத் தகவல் தொடர்பியலில் ஏற்பட்டுள்ள மாற்றங்கள் காரணமாக, இன்று தகவல் வெள்ளம் பெருக்கெடுத்து ஓடுகின்றது.

ஒரு மொழியின் வளர்ச்சியென்பது இத்தகைய தகவல் தொழில்நுட்பப் புரட்சியை உள்வாங்கிக் கொண்டு, செறிவாக, வெளிப்படுவதாகும்.

குறிப்பாக இணையகங்களின் பக்கங்களில் அதிகபட்சமான இடத்தினைப் பிடித்துள்ள மொழிகளே, நன்கு வளர்ச்சியடைந்தவைகளாகக் கருதிட இயலும்.

இந்நிலையில், கருத்தியல் வளர்ச்சிக்கு ஆதாரமாக விளங்கும் சொற்கள் அதிக அளவில் உருவாக்கப்படுகின்ற மொழிகளே, உச்ச நிலையினை அடைய முடியும்.

தமிழைப் பொறுத்த வரையில், ''ஆட்சி மொழியாகவும் உயர்கல்வியில் பயிற்று மொழியாகவும் தமிழே இடம்பெற வேண்டும்'' என்பதால், புதிய சொல்லாக்க முயற்சிகள் நடைபெற்று வருகின்றன. இத்தகைய முயற்சிகள், தமிழ்மொழியின் வளர்ச்சி வேகத்தினைத் தூண்டுகின்றன; சொற்களஞ்சியம் பெருகிடக் காரணமாக அமைகின்றன. எனவே, அறிவியல் தொழில்நுட்ப யுகத்தில் புதிய சொல்லாக்கத்திற்கான தேவை இருக்கிறது என்று கூறி, எனது உரையை நிறைவு செய்கிறேன்.

8 Mark Question: Essay on Hospitality (Virunthu Potruthum) | Tamil Prose

8 மதிப்பெண் வினா, உரைநடை உலகம், விருந்து போற்றுதும்

8 மதிப்பெண் வினா

உங்கள் இல்லத்திற்கு வந்த உறவினருக்கு நீங்கள் செய்த விருந்தோம்பலை அழகுற விவரிக்க.

வரவேற்றேன்

எங்கள் ஊர்ப் பொங்கல் விழாவிற்கு என் மாமாவைத் தொலைபேசியில் அழைத்தேன்; அவர் வருகைக்காக வாயிலில் விழி வைத்துக் காத்திருந்தேன்; மதியவேளை வந்தது; அவரும் வந்தார். "வாங்க மாமா" என்று வாய் நிறைய அழைத்தேன்; முகம் மலர்ந்தேன்; கைபிடித்து உள்ளே கூட்டிச் சென்றேன்; ஆற அமர நாற்காலி தந்தேன்; தாகம் தீரத் தண்ணீர் தந்தேன்; வியர்வை நீங்க விசிறி போட்டேன்; உள்ளம் மகிழ்ந்து உறவுகளை விசாரித்தேன்; ஓய்வெடுக்க அறையைக் காட்டினேன்.

விருந்து உண்டோம்

சிறிது நேர ஓய்வுக்குப் பின்னர், வாழையிலையில் சாம்பார், ரசம், அப்பளம், பாயாசம், அவித்த முட்டை, மாங்காய் ஊறுகாய், முருங்கைக் கீரை, மோர் மணக்க மணக்க, மாமா முகம் அறிந்து விருந்து வைத்தேன்; கை அலம்பக் குவளைத் தண்ணீரும் கை துடைக்கத் துண்டும் கொணர்ந்தேன்.

உலா வந்தோம்

பின்னர், ஊர் நந்தவனத்திற்குச் சென்றோம்; காலார நடந்தோம்; களிப்புடன் பேசினோம்; பூ மரம் செடி கொடிகளைக் கண்டோம்; களித்தோம்; மாலை வேளை வந்தது. தோட்டத்துக் கிணற்றில் துள்ளிக் குதித்தோம்; நீரில் மூழ்கிமூழ்கி நீந்தினோம்; கிணற்று மீனைத் தொட்டுப் பிடித்து மகிழ்ந்தோம்; நாங்கள் பேசும் நகைச்சுவை கேட்டு மீன்கள் வந்து கிச்சுகிச்சு மூட்டின. இரண்டே எட்டில் செவ்விளநீர் மரத்தில் ஏறினேன். ஆளுக்கு இரண்டாய் அருந்தினோம்; கொய்யாப்பழம் கடித்துக் கொண்டே வீடு வந்து சேர்ந்தோம்.

கோவிலுக்குச் சென்றோம்

நான் எடுத்து வைத்திருந்த வெள்ளை சட்டையையும் வேட்டியையும் மாமாவுக்குப் பரிசளித்தேன். மாமா வாங்கித்தந்த புத்தாடை அணிந்து, ஊர்க்கோவிலை நோக்கி நடந்தோம். வாயில்தோறும் மஞ்சளும், தெருதோறும் தோரணமும் வாழையும் கமுகும் வாஞ்சையுடன் வரவேற்றன. கோயிலைச் சுற்றி வகைவகையாய் நிழல் மரங்கள்; மரங்கள்தோறும் வண்ண ஒளி விளக்குகள். அதைப் பிரதிபலிக்கும் பெரியகுளம்; ஆர்ப்பரிக்கும் மக்கள் கூட்டம்; அதை உடைக்கும் மங்கள வாத்தியம். வண்ண வண்ணப் பொங்கல்பானைகள். பெண்கள் குலவையுடன் பொங்கலிடும் காட்சி. வண்ண வண்ண வானவேடிக்கை. வகைவகையாய் ராட்டினங்கள்.

இரவு விருந்து

சாம்பாரில் மிதக்கும் இட்லியைச் சட்னியில் தொட்டு உண்டோம்; ஆடல் பாடல் கண்டு களித்தோம்; அது, விருந்தினும் விருந்தாய் அமைந்தது. கண்ணயர்ந்து தூங்கிப் போனோம்.

விடியல் வந்தது

பொழுது புலர்ந்தது; பறவைகள் பாடின; கதிரவன் கை நீட்டினான். அயர்ந்து தூங்கிய மாமாவை எழுப்பினேன். முகம் அலம்பக் குவளைத் தண்ணீரும் பல் துலக்க ஆல விழுதும் அன்புடன் அளித்தேன். தோட்டத்திற்குச் சென்றோம்; காலைக் கடனை முடித்தோம்; கிணற்றில் குளித்தோம்; மரத்தில் ஏறி மாவும் பலாவும் பறித்தோம்; வீடு திரும்பினோம்.

பிரிய மனமில்லை

தலைவாழை இலையில் பச்சைநெல் சோறும் நாட்டுக்கோழி குழம்பும் பொறித்த மீனும் அன்பு குழையக் குழையப் பரிமாறினேன். உண்டு மகிழ்ந்த மாமா, நன்றி கூறிப் புறப்பட்டார். ஊர் எல்லைவரை வந்து, மாம்பழ மூட்டையுடன் வழியனுப்பி வைத்தேன். இருவரும் பிரிய மனமின்றிப் பிரிந்தோம். நாங்கள் இருவரும் சுற்றிப் பார்த்து ரசித்த இடங்கள் கண்களுக்குள் நடனமாடின.

The Art of Translation: An Essay on Enriching the Classical Tamil Language

நடுப்பக்கக் கட்டுரை

செம்மொழித் தமிழுக்கு வளம் சேர்க்கும் மொழிபெயர்ப்புக் கலை

தமிழின் இலக்கிய வளம் - கல்வி மொழி - பிறமொழிகளில் உள்ள இலக்கிய வளங்கள் -அறிவியல் கருத்துகள் - பிற துறைக் கருத்துகள் - தமிழுக்குச் செழுமை.

மேற்கண்ட குறிப்புகளைக் கொண்டு 'செம்மொழித் தமிழுக்கு வளம் சேர்க்கும் மொழிபெயர்ப்புக் கலை' என்ற தலைப்பில், வார இதழ் ஒன்றுக்கு நடுப்பக்கக் கட்டுரை எழுதுக.

முன்னுரை

ஒரு மொழியில் ஏற்படும் புதுமைகளை வேற்று மொழிக்கு கொண்டு வரும் அரிய பெரிய கலையே 'மொழிபெயர்ப்புக்கலை' ஆகும். மொழிபெயர்ப்புச் செய்யப்படும் பொழுது மூல மொழி சார்ந்துள்ள சமுதாயப் பின்னணியை எண்ணிப் பார்ப்பது அவசியமானது.

"பிறநாட்டு நல்லறிஞர் சாத்திரங்கள் தமிழ்மொழியிற் பெயர்த்தல் வேண்டும்... சென்றிடுவீர் எட்டுத் திக்கும் கலைச் செல்வங்கள் யாவும் கொணர்ந்திங்கு சேர்ப்பீர்"

என்ற பாரதியின் கருத்துகள் மொழிபெயர்ப்பின் இலக்குக்கு வழிகாட்டுகின்றன.

தமிழின் இலக்கியவளம்

வாழ்வியலுக்கு இலக்கணம் வகுத்து நெறியோடு வாழ்ந்த தமிழரின் சங்க இலக்கியங்கள், அறக்கருத்துக்களை வலியுறுத்தும் பதினெண்-கீழ்க்கணக்கு-நூல்கள், ஐம்பெருங்காப்பியங்கள், பக்திப் பாடல்கள், சிற்றிலக்கிய வடிவங்கள், மரபுக்கவிதைகள், சந்தப் பாடல்கள், புதுக் கவிதைகள், புதினங்கள் எனத் தமிழின் இலக்கிய வளத்திற்கு சான்றுகள் பலவாகும்.

மேலும் மொழிபெயர்ப்பு இலக்கியங்களான இராமாயணம், மகாபாரதம், பெருங்கதை, கொங்குவேளிர் மாக்கதை, சீவக சிந்தாமணி, நளவெண்பா, தண்டியலங்காரம், வில்லிபாரதம் போன்றவையும் இவற்றுள் அடங்கும்.

கல்வி மொழி

மொழிபெயர்ப்பைக் கல்வியாக ஆக்குவதன் மூலம் அனைத்துலக அறிவையும் நாம் எளிதில் பெற முடியும். பல அறிவுத் துறைகளுக்கும் தொழில் துறைகளுக்கும் வெளிநாட்டவரை எதிர்பார்க்காமல் நாமே நமக்கு வேண்டிய அனைத்தையும் உருவாக்கிக்கொள்ள முடியும்; மனித வளத்தை முழுமையாகப் பயன்படுத்த முடியும்; வேலைவாய்ப்புத் தளத்தை விரிவாக்க முடியும்; நாடு, இன, மொழி எல்லைகளைக் கடந்து ஓருலகத்தன்மையைப் பெற முடியும். வெளிநாட்டு தூதரகங்கள் தங்களுடைய இலக்கியம், பண்பாடு, தொழில் வளர்ச்சி போன்றவற்றைத் தத்தம் மொழிகளில் கற்றுக் கொடுக்கின்ற முயற்சியை மேற்கொண்டு வருகின்றன. தனியார் நிறுவனங்களும் பள்ளிகளும் கல்லூரிகளும் பல்கலைக்கழகங்களும் பிற மொழிகளைக் கற்கும் வாய்ப்புகளை உருவாக்கித் தருகின்றன.

பிறமொழிகளில் உள்ள இலக்கிய வளங்கள்

பிற மொழி இலக்கியங்களை அறிந்துகொள்ளவும் அவை போன்ற புதிய படைப்புகள் உருவாகவும் மொழிபெயர்ப்பு உதவுகிறது. ஆங்கிலேயரின் வருகைக்குப் பின் ஆங்கில நூல்களும், ஆங்கிலம் வழியாகப் பிற ஐரோப்பிய மொழி நூல்களும் அறிமுகமாயின. மொழிபெயர்ப்பு இல்லை என்றால் ஷேக்ஸ்பியரோ, கம்பரோ, தாகூரோ உருவாகியிருக்க முடியாது.

ஷேக்ஸ்பியரின் நாடகங்கள் தமிழாக்கம் செய்யப்பட்டதன் விளைவு, பல நாடகமேடை அமைப்புகள் உருவாகின. மேலைநாட்டு இலக்கியச் சார்புதான் நமது தமிழ் இலக்கியத்தின் புதிய வரவுகளான புதினம், சிறுகதை போன்ற வடிவங்களுக்குப் படிநிலையாகும். வால்ட் விட்மனின் 'புல்லின் இதழ்கள்' ஏற்படுத்திய கவிதைத் தாக்கம் தமிழ்ப்புதுக்கவிதை மாளிகைக்கு அடிக்கல் நாட்டியது. ஜப்பானிய ஹைக்கூக் கவிதைகள் நமது ஹைக்கூக்கவிதை வளர்ச்சிக்கு வித்திட்டது. மொழிபெயர்ப்பு மூலம் இலக்கியத் திறனாய்வு முறைகளை ஆங்கிலத்திலிருந்து பெற்றுள்ளோம்.

அறிவியல் கருத்துகள்

தாமஸ் ஆல்வா எடிசன், ஐசக் நியூட்டன், ஆர்க்கிமிடிஸ், கலிலியோ போன்ற அறிஞர்பெருமக்களின் கண்டுபிடிப்புகள் தமிழில் மொழிபெயர்க்கப் பெற்றபின் அறிவியல் வளர்ச்சியில் பெரும் திருப்பம் ஏற்பட்டது. மரத்திலிருந்து கனிந்த பழம் விழுவதையும் பழத்திற்காக எறிந்த கல் நிலத்தை சென்றடைவதையும் கண்டுகளித்த மக்கள், நியூட்டனின் இயற்பியல் விதிக்குப் பின்னர்தான் அது 'புவியீர்ப்பு சக்தி' என்பதை அறிந்தனர்.

பிறதுறைக் கருத்துகள்

இன்றைக்குப் பல்வேறு துறைகளின் வளர்ச்சிக்கு மொழிபெயர்ப்பு தேவைப்படுகிறது. மொழிபெயர்ப்பு இல்லை எனில் உலகை எல்லாம் வலையாகப் பிடித்திருக்கின்ற ஊடகத்தின் வளர்ச்சி இல்லை. தொலைக்காட்சி, வானொலி, திரைப்படம், இதழ்கள் போன்ற ஊடகங்கள் மொழிபெயர்ப்பால்தான் வளர்ச்சி பெறுகின்றன. விளம்பர மொழிக்கு மொழிபெயர்ப்பு தேவைப்படுகிறது. திரைப்படங்கள், தொலைக்காட்சித் தொடர்கள் ஆகியன மொழிமாற்றம் செய்யப்பட்டு அனைத்து மொழி பேசும் மக்களையும் அடைகிறது. இதனால் புதுவகையான சிந்தனை மொழிக் கூறுகள் பரவுகின்றன.

தமிழுக்குச் செழுமை

மொழிபெயர்ப்பினால் புதிய சொற்கள் உருவாகி மொழிவளம் ஏற்படுகிறது. பிற இனத்தவரின் பண்பாடு, நாகரிகம், பழக்க வழக்கம் போன்றவற்றை அறியமுடிகிறது. அதிலிருந்து நல்லனவற்றை நாம் பெற்றுக்கொள்ள முடிகிறது. அதன்மூலம் நம் இலக்கியத்தை வளப்படுத்த முடிகிறது. உலகப் புகழ்பெற்ற அறிவியல் கண்டுபிடிப்புகளையும் இலக்கியப் படைப்புகளையும் அறிவதற்கு வாய்ப்பு ஏற்படுகிறது. நல்ல மொழிபெயர்ப்பாளன் சில விதி மீறல்களைச் செய்வான். இதன் மூலம் புதிய இலக்கண விதிகளின் தேவையை உருவாக்குவான். இதன் மூலம் மொழியில் புதுக்கூறுகள் உருவாகி, மொழிவளர்ச்சிக்கு வழிவகுக்கும்.

முடிவுரை

பிற மொழி இலக்கியங்களை அறிந்துகொள்ளவும், அவை போன்ற புதிய படைப்புகளை உருவாக்கவும் மொழிபெயர்ப்பு உதவுகிறது. இலக்கியம் என்பது தன் அனுபவத்தை எழுதுவது என்றாலும் அது கலைச் சிறப்புடையதாக இருக்கும் போது அனைவரது அனுபவமாகவும் பொதுநிலை பெறுகிறது. அத்தகைய பொதுநிலை பெற்ற இலக்கியத்தை மொழிவேலி சிறையிடுகிறது. மொழி வேலியை அகற்றும் பணியை மொழிபெயர்ப்பு செய்கிறது. எனவே, செம்மொழித் தமிழுக்கு மொழிபெயர்ப்புகலையானது வளம் சேர்க்கும் என்பது திண்ணம்.

8-Mark Question: Appreciation Speech on Puppetry and Plastic Bag Awareness

8 மதிப்பெண் வினா: பொம்மலாட்டக் கலை பாராட்டுரை

நெகிழிப் பைகளின் தீமையைக் கூறும் பொம்மலாட்டம் உங்கள் பள்ளியின் ஆண்டு விழாவில் நிகழ்த்தப்படுகிறது. அதற்குப் பாராட்டுரை ஒன்றினை எழுதுக.

பாராட்டுரை

முன்னுரை

ஆதி கலைகளான இயல், இசை, நாடகம் ஆகிய முக்கலைகளின் சங்கமமே பொம்மலாட்டக் கலை. இவை மூன்றும் தெரிந்திருந்தால் மட்டுமே பொம்மலாட்டத்தை நிகழ்த்த முடியும். சினிமா உள்ளிட்ட பொழுதுபோக்கு அம்சங்கள் இல்லாத அக்காலத்தில் பல்வேறு கடவுள்களின் அருட்பெருமைகளைக் கூறவும், போரில் வெற்றி பெற்ற மன்னர்களின் புகழ் பாடவும், அரசனின் ஆணைகளை மக்களுக்குத் தெரிவிக்கவும், சிறந்த பொழுதுபோக்கு அம்சமாகப் பொம்மலாட்டக் கலை விளங்கியது. இந்திய சுதந்திரப் போராட்டத்தின்போது, விடுதலைப் போராட்டச் செய்திகளைப் பொதுமக்களுக்குக் கொண்டு செல்லவும் கூட பொம்மலாட்டம் பயன்படுத்தப்பட்டது.

பொம்மலாட்டம் என்னும் நுட்பக்கலை

பொம்மலாட்ட நிகழ்ச்சி நடத்துவது என்பது கத்திமேல் நடப்பது போன்றது. விரல் நுனியில் காட்சிகளை மாற்றி கண்முன்னே நிறுத்துவது வியப்பிற்குரியது.

தலை, கைகளில் கயிறுகட்டி கால்கள் இல்லாமல் துணிகளால் நீளமாக உடை கொடுத்து, பொம்மைகளைத் திரைக்குப் பின்னால் இருந்து கொண்டு ஆட்டி வைக்கும் அற்புதமான கலை. கயிற்றை நுட்பமாக ஆட்டி, அதன் அசைவுக்குத் தக்கவாறு பாடி, இசைக்கருவிகளை இசைத்து பிரமிப்பான உணர்வை ஏற்படுத்துவது இதன் சிறப்பு.

பொம்மைகளின் முகம், கை, கால், உடல் அசைவுகளுடன் பின்னணிக் குரலும் ஒலிக்க, விழிப்புணர்வு நிகழ்ச்சிகள் நடத்துவதற்கு மிகச் சிறந்த கலையாக இது திகழ்கிறது. உயிருள்ள மனிதர்கள் பேசுவது போன்ற தோற்றத்தை ஏற்படுத்தி உள்ளுணர்வில் மாற்றத்தை ஏற்படுத்த வல்லது. இத்தகைய பொம்மலாட்டக் கலை மூலம் நெகிழிப்பைகளின் தீமை குறித்து விழிப்புணர்வு ஏற்படுத்தியமை பாராட்டுதலுக்கு உரியது.

நாங்கள் அடைந்த விழிப்புணர்வு

எங்கள் பள்ளியின் ஆண்டுவிழாவில் நடைபெற்ற பொம்மலாட்ட நிகழ்ச்சியின் மூலம் நெகிழிப் பைகளின் தீமைகளை அறிந்து கொண்டோம். அவை,

• நெகிழிப் பொருள்கள் எளிதில் அழிவதில்லை. சராசரியாக ஒரு பாலித்தீன் பையின் பயன்பாட்டுக் காலம் 12 முதல் 20 நிமிடங்களே என்றும் அவை அழிய 1000 ஆண்டுகளுக்கும் அதிக காலம் பிடிக்கும் என்றும் ஒரு ஆய்வு கூறுகிறது. பயன்பாடற்ற ஒரு நச்சுவேதிப் பொருளின் நெடிய ஆயுட்காலம் என்பது இயற்கையின் நியதிக்கு மிகமிக ஆபத்தான முரண்பாடாகும். அதிலும் நெகிழியின் அதிகப்படியான பயன்பாட்டின் காரணமாக இவை கற்பனைக்கெட்டாத அளவில் உற்பத்தி செய்யப்படுகின்றன. எதிர்கால சந்ததிகளையும், மானுடரல்லாத பிற உயிர்களையும், இயற்கைச் சூழலையும் பற்றிய அக்கறையற்ற சுயநலமே இன்றைய நிலையாக இருக்கின்றது. மறுசுழற்சி என்பதும் பெரிதும் பயன்தரப் போவதில்லை. ஏனென்றால் நெகிழிப் பொருட்களில் 10 சதவீதப் பொருள்களே மீண்டும் பயன்படுத்தத் தக்கவையாக இருக்கின்றன. மற்ற 90 சதவீதப் பொருட்களும் வீணே எரிக்கப்பட்டுவிடுகின்றன. ‘இன்சினரேசன்’ என்னும் கருவி இப்போது நெகிழிக் குப்பைகளை எரிக்கப் பயன்படுகிறது. அவையும் டையாக்சின் என்ற நச்சுப் புகையைத்தான் கூடுதல் தீமையாகத் தருகின்றன. மறுசுழற்சி, கழிவு மேலாண்மை போன்றவை பயனற்றவையாகவே கருதப்படுகின்றன.
• தொழிற்சாலைகளில் இவை மறு சுழற்சி செய்யப்படும் போதும், எரிக்கப்படும் போதும் வெளியேறும் வாயுக்கள் நச்சுத் தன்மை உடையதாக இருப்பதால், அருகிலுள்ள மக்களின் உடல்நலனாது பெரிதும் பாதிப்புக்குள்ளாகிறது. தோல்நோய், புற்று நோய், ஒவ்வாமை, மூச்சுக் குழாய் பாதிப்பு, குடல் புண், செரிமானமின்மை, நரம்புத்தளர்ச்சி, ரத்த, சிறுநீரகச் செயல் குறைபாடு, நோய் எதிர்ப்பு ஆற்றல் குறைவு போன்றவை ஏற்படக் கூடும் என ஆய்வுகள் கூறுகின்றன.
• பாலித்தீன் பைகள் கால்வாய்களில் அடைத்துக் கொள்வதால் நீர் வழிகள் அடைபட்டு மழைக் காலங்களில் வெள்ளப் பெருக்கு போன்ற அபாயங்கள் ஏற்படுகின்றன. நீர் தேங்கி கொசுக்கள் உற்பத்தியாகி டெங்கு, சிக்குன் குனியா போன்ற நோய்கள் பரவுகின்றன. நிலத்தடி நீர் பெருகுவதைத் தடுக்கின்றன.
• மனிதர் உண்டுவிட்டு கீழே போடும் நெகிழிப் பைகளைத் தின்னும் விலங்குகளின் உணவுக் குழாய்கள் பாதிக்கப்பட்டு அவைகள் இறக்க நேரிடுகின்றன.
• மட்காத நெகிழிப் பொருள்கள் வேளாண் நிலங்களில் தங்கி அதன் வளத்தைக் குறைத்து நஞ்சாக்குகிறது. பயிர் வளர்ச்சியையும் பாதிக்கிறது.
• கடலில் எறியப்படும் நெகிழிப் பொருள்கள் கடல்வாழ் உயிரினங்களுக்கும், வனப்பகுதியில் எறியப்படுபவை வனவாழ் உயிரினங்களுக்கும் தீங்கு விளைவித்து பல்லுயிர் பெருக்கச் சூழலைப் பெரிதும்பாதிக்கின்றன.

பாராட்டுரை

நமது பள்ளி ஆண்டு விழா என்பது ஒவ்வொரு மாணவருக்கும் மிகவும் மகிழ்ச்சியைத் தரக்கூடிய ஒரு நிகழ்வாகும். என்றும் பசுமையான நினைவுகளாக இருக்கக்கூடிய ஆண்டுவிழாவில், ஆண்டுதோறும் புதியபுதிய சிந்தனைகளை மாணவர்கள் மனத்தில் விதைப்பீர்கள். அந்த வகையில் இந்த ஆண்டு நெகிழிப்பைகளின் தீமையைக் கருவாகக் கொண்டமைக்கு எனது மனமார்ந்த பாராட்டுக்களைத் தெரிவித்துக்கொள்கிறேன். அதை விதைப்பதற்கு நமது பாரம்பரியக் கலையான பொம்மலாட்டக் கலையைத் தேர்வு செய்த பள்ளி ஆண்டுவிழா ஏற்பாட்டாளர்களுக்குத் தலை வணங்குகிறேன். 'ஒரே கல்லில் இரண்டு மாங்காய்' என்பது போல இந்த நிகழ்ச்சியின் மூலம் பொம்மலாட்டக் கலையின் அருமை பெருமைகளை அறிந்து கொண்டதோடு நெகிழிப் பைகளின் தீமைகளையும் அறிந்துகொண்டோம். நெகிழிப் பைகளைத் தவிர்த்து, துணிப்பைகளைப் பயன்படுத்த வேண்டும் என்ற மனமாற்றம் ஏற்பட இந்த நிகழ்ச்சியே காரணமாக அமைந்தது.

முடிவுரை

திரைப்படத் துறையின் அதீத வளர்ச்சியால், தமிழகத்தில் தொன்மையான பாரம்பரியக் கலையான பொம்மலாட்டம் படிப்படியாக அழிந்து வருகிறது. அழிவில் இருக்கும் பழைமை வாய்ந்த பொம்மலாட்டக் கலையைக் காக்க மத்திய, மாநில அரசுகள் பள்ளி, கல்லூரி பாடத் திட்டத்தில் செயல்முறைப்பயிற்சியாக பொம்மலாட்டத்தை வைத்து, இளைய தலைமுறையினரிடம் இக்கலையைக் கொண்டு செல்லும் சீரிய முயற்சிகளை மேற்கொள்ள வேண்டும். மேலும், இந்தக் கலைஞர்களுக்கு உலகப் பொம்மலாட்ட தினமான மார்ச் 21 அன்று விருதுகள் வழங்கி ஊக்குவிக்க வேண்டும் என்று கூறி, எனது பாராட்டு உரையை நிறைவு செய்கிறேன். நன்றி, வணக்கம்!

Essay on Santror Valartha Tamil (சான்றோர் வளர்த்த தமிழ்) | Tamil Literature

கட்டுரை: சான்றோர் வளர்த்த தமிழ்

குமரிக்கடல் முனையையும் வேங்கட மலை முகட்டையும் எல்லையாகக் கொண்ட தென்னவர் திருநாட்டிற்குப் புகழ் தேடித்தந்த பெருமை தகைசால் தமிழன்னையைச் சாரும். எழில் சேர் கன்னியாய் என்றும் திகழும் அவ்வன்னைக்கு, பிள்ளைத் தமிழ் பேசி, சதகம் சமைத்து, பரணி பாடி, கலம்பகம் கண்டு, உலாவந்து, அந்தாதி கூறி, கோவை மாத்து, அணியாகப் பூட்டி, அழகூட்டி அகம்மிக மகிழ்ந்தனர் செந்நாப்புலவர்கள். இக்கருத்தைக் கருவாகக் கொண்டு 'சான்றோர் வளர்த்த தமிழ்' என்னும் தலைப்பில் கட்டுரை எழுதுக.

முன்னுரை

தமிழ்ப்பூஞ்சோலையில் பல்லாயிரம் செடி கொடிகளில் பலகோடி வண்ண மலர்கள் மலர்கின்றன. நறுமணமும் நறுந்தேனும் தென்றலில் கரைகின்றன. தேனுண்ட வண்டு பாடி மகிழ்கின்றன; மயங்கித் தெளிகின்றன. மகரந்தச் சேர்க்கையால் புதுப்புது மலர்கள் தோன்றுகின்றன. அயராத உழைப்பால் தமிழ்ச்சோலை வளர்த்த வண்டுகளைக் காண்போம், வாரீர்.

தமிழின் எல்லை

"வடவேங்கடம் தென்குமரி ஆயிடைத் தமிழ் கூறும் நல்லுலகத்து" எனப் பனம்பாரனார் தமிழின் எல்லை சுட்டுகிறார். "தமிழ் நிலைபெற்ற தாங்கரு மரபின் மகிழ்நனை மறுகின் மதுரை" என்று சிறுபாணாற்றுப்படையும் "தமிழ்கெழு கூடல் தண்கோல் வேந்தே" என்று புறநானூறும் தமிழன்னையின் தாய்வீடு பற்றிக் குறிப்பிடுகின்றது.

எழில்சேர் கன்னி

"இனிமையும் நீர்மையும் தமிழென லாகும்" என்கிறது, பிங்கலந்தை நிகண்டு. சிலப்பதிகாரம், மணிமேகலை, சீவக சிந்தாமணி, வளையாபதி, குண்டலகேசி என்ற ஐம்பெரும் காப்பியங்களை அணிகலன்களாக அணிந்தவள், தமிழன்னை; பாலும் தேனும் போன்ற பாட்டும் தொகையும் அருந்தியவள்; நீதி நூல்களைத் தனது நெற்றியில் அணிந்தவள்; தொண்ணூற்றாறு வகைச் சிற்றிலக்கியங்களைத் துவளாமல் அணிந்தவள். புதுப்புது இலக்கிய வடிவங்களை அணிந்து கணினித் தமிழாய், கன்னித்தமிழாய் வளர்ந்து வருகிறாள்.

பிள்ளைத்தமிழ் பேசி, சதகம் சமைத்தவள்

தெய்வத்தையோ அல்லது மக்களுள் சிறந்தாரையோ குழந்தையாகப் பாவித்து பத்து பருவங்கள் அமைத்துப் பாடுவது பிள்ளைத் தமிழாகும். ஒட்டக்கூத்தரின் இரண்டாம் குலோத்துங்கன் பிள்ளைத்தமிழ் காலத்தால் முந்தியது. குமரகுருபரரின் மீனாட்சியம்மை பிள்ளைத் தமிழ், மகாவித்துவான் மீனாட்சி சுந்தரனாரின் சேக்கிழார் பிள்ளைத்தமிழ் சிறப்பு வாய்ந்தவை.

நூறு பாடல்களைக் கொண்ட நூலுக்குச் 'சதகம்' என்று பெயர். மாணிக்கவாசகரின் திருச்சதகமே முதல் சதகம் ஆகும். படிக்காசுப் புலவரின் தொண்டைமண்டல சதகம் புகழ் வாய்ந்தது.

பரணி பாடி, கலம்பகம் கண்டவள்

"ஆனை ஆயிரம் அமரிடை வென்ற மானவனுக்கு வகுப்பது பரணி". சயங்கொண்டாரின் கலிங்கத்துப்பரணியே முதல் பரணியாகும். தத்துவராயரின் மோகவதைப் பரணி, வைத்தியநாதரின் பாசவதைப் பரணி, ஒட்டக்கூத்தரின் தக்கயாகப் பரணி ஆகியவை சிறப்பு வாய்ந்தவை.

புயவகுப்பு முதலான பதினெட்டு உறுப்புகள் கொண்டு, பலவகைப் பாக்களும் கலந்து பாடுவது கலம்பகம் ஆகும். மூன்றாம் நந்திவர்மனின் நந்திக்கலம்பகமே முதல் கலம்பக நூலாகும். இரட்டையர்கள், கலம்பகம் பாடுவதில் வல்லவர்கள். இதனைக் "கண்பாய கலம்பகத்திற்கு இரட்டையர்கள்" என்னும் தொடர் விளக்கும்.

உலாவந்து, அந்தாதி கூறி, கோவை யாத்தவள்

அரசர்கள் உலா வரும்போது ஏழு பருவ மங்கையரும் கண்டு, காதல் கொண்டு, மயங்குவதாகப் பாடுவது உலாவாகும். சேரமான் பெருமாள் நாயனார் இயற்றிய 'திருக்கயிலாய ஞான உலா' காலத்தால் முற்பட்டது. ஒட்டக்கூத்தரின் 'மூவருலா' குறிப்பிடத்தக்கது.

கி.பி. ஐந்தாம் நூற்றாண்டில் அந்தாதி வகை முகிழ்த்து, மலர்ந்து, மணம் பரப்பியது. காரைக்காலம்மையாரின் அற்புதத் திருவந்தாதியே முதல் அந்தாதி. முதலாழ்வார் மூவரின் நூற்றந்தாதிகள், சேரமான் பெருமாள் நாயனாரின் பொன்வண்ணத்தந்தாதி போன்றவை குறிப்பிடத் தகுந்தவை. சிற்றிலக்கிய வகைகளில் அந்தாதி வகையே மிகுதி.

அகத்துறைக் கூற்றுகளை வரிசைப்படி கோத்துப் பாடுவது கோவை. பாண்டிக்கோவை, மாணிக்கவாசகரின் திருக்கோவை, பொய்யாமொழிப் புலவரின் தஞ்சைவாணன் கோவை ஆகியவை புகழ்பெற்றவை.

முடிவுரை

கம்பரும் கபிலரும், ஔவையும் வள்ளுவரும், ஆழ்வார்களும் நாயன்மார்களும், வீரமாமுனிவரும் உ.வே.சாமிநாதரும், பாரதியும் தாசனும் இன்னும் பலரும் அருந்தமிழுக்கு அருந்தொண்டு ஆற்றியுள்ளனர். சாகும்போதும் தமிழ்படித்துச் சாகவேண்டும் என்று படித்து மகிழ்ந்தனர், புலவர் பெருமக்கள். 'தமிழுக்குத் தொண்டு செய்வோன் சாவதில்லை' என்ற தாசனின் கூற்று மெய் ஆகிறது.

Kalpana Chawla Essay: Life, Education, and Achievements in Space

விண்வெளியும் கல்பனா சாவ்லாவும்

முன்னுரை

                "பெண்ணுக்கு ஞானத்தை வைத்தான் - புவி 

                 பேணி வளர்த்திடும் ஈசன் "

என்ற பாரதியின் வரிகளுக்கு ஏற்ப, ஞானப் பெண்ணாய் ஞாலம் அளந்தாள், வீரமங்கை. நிலவைப் பார்த்து  உணவுண்ட காலத்திலேயே, நிலவில் சோறு உண்ணக் கனாக் கண்டவள், கல்பனா.  வானில் நட்சத்திரங்களை எண்ணி, அவள் வானத்து நட்சத்திரமான வரலாறு காண்போம், வாரீர்!

குழந்தைப் பருவம்

             அரியானா மாநிலம் கர்னல் என்னும் ஊரில் பனாரஸ் லால் சாவ்லா - சன்யோகிதா தேவி இணையருக்கு மகளாக மார்ச் 17, 1962 ஆம் ஆண்டு பிறந்தார், கல்பனா.   கல்பனா என்ற பெயருக்கு 'கற்பனை' என்று பொருள்.  கல்பனாவுக்கு, விமான ஓட்டியும் தொழில் அதிபருமான ஜே. ஆர். டி. டாடா (ஜஹாங்கீர் ரத்தன்ஜி தாதாபாய் டாட்டா) அவர்களைப் பார்த்தது முதல் விமானம் ஓட்டும் ஆர்வம் ஏற்பட்டது.

கல்வி

        கல்பனா பள்ளிக்கல்வியைத் தாகூர் அரசுப் பள்ளியிலும், இளங்கலை விண்வெளிப் பொறியியல் படிப்பைப் பஞ்சாப் பொறியியல் கல்லூரியிலும், முதுகலை விண்வெளிப் பொறியியல் படிப்பை அமெரிக்காவின் டெக்சாஸ் பல்கலையிலும், முனைவர்பட்ட விண்வெளிப் பொறியியல் படிப்பைக் கொலராடோ பல்கலையிலும் படித்தார்.

பணி

           நாசாவின் அமெஸ் ஆராய்ச்சி மையத்தோடு இணைக்கப்பட்ட, மிகைப்படுத்தப்பட்ட முறைகள் பிரிவின் துணைத் தலைவராகப் பொறுப்பேற்றார்.  செங்குத்தாக குறுகிய இடத்தில் புறப்படுதல் மற்றும் தரை இறங்குதல் பற்றிக்  திரவ இயக்கவியல் கணக்கீடு ஆராய்ச்சி மேற்கொண்டார்.  விமானம் மற்றும் மிதவை வானூர்திகளை (கிளைடர்களை) ஓட்டக் கற்றுக் கொடுக்கும் தகுதிச் சான்றிதழ் பெற்றதோடு, ஓட்ட அனுமதியும் பெற்றார்.

          1995ஆம் ஆண்டு நாசா விண்வெளி வீரர் பயிற்சிக் குழுவில் சேர்ந்தார்.  

சாதனைகள்

            1997ஆம் ஆண்டு விண்வெளி விண்கலப் பணி ஊர்தி 87 இல் தனது முதல் விண்வெளிப் பயணத்தைத் தொடங்கினார்.  பின்னர், தொழில் நுட்ப வல்லுநராக விண்வெளி அலுவலகத்தில் நியமிக்கப்பட்டார்.

             ஜனவரி 16, 2003 விண்வெளி விண்கலப்பணி ஊர்தி 107 இல் விண்வெளிக்குச் சென்றார்.  கல்பனா சாவ்லாவின் பொறுப்புகளாக 'மைக்ரோ ஈர்ப்பு' (கிராவிட்டி) சோதனைகள் அமைந்திருந்தன. கல்பனாவின் குழு எண்பது பரிசோதனைகளை மேற்கொண்டது.

விபத்து

         பிப்ரவரி 1, 2003 இல் தனது பதினாறு நாள் பயணத்தை முடித்துக் கொண்டு பூமியை வந்தடைய 15 நிமிடங்களே இருந்த நிலையில் விண்கலம் விபத்துக்குள்ளானது. இரண்டு பெண்கள் உட்பட ஏழு விண்வெளி வீரர்களும் பலியானார்கள்.  இந்தியா, அமெரிக்கா உட்பட உலகமே அதிர்ச்சியோடு கண்ணீர் அஞ்சலி செலுத்தியது.

விருதுகள்

            அமெரிக்க காங்கிரஸ் விண்வெளிப் பதக்கமும், நாசாவின் விண்ணோட்டப் பதக்கம் மற்றும் சிறப்பு சமூக சேவைக்கான பதக்கமும் கல்பனாவுக்கு வழங்கப்பட்டது.  இளம்பெண் விஞ்ஞானிகளை ஊக்குவிக்கும் விதமாக கர்நாடக அரசு 2004 முதல் 'கல்பனா சாவ்லா விருது' வழங்கி வருகிறது.  இஸ்ரோ 'கல்பனா சாவ்லா' பெயரில் ஒரு விண்கலத்தை ஏவியது. அமெரிக்க விண்வெளி மற்றும் பாதுகாப்புத் தொழில்நுட்ப நிறுவனம் தனது விண்கலத்திற்கு 'எஸ்எஸ் கல்பனா' என்று பெயரிட்டுள்ளது.  

முடிவுரை

             விண்வெளி வீரராக கல்பனா சாவ்லாவின் பங்களிப்பு தற்போது வரை தாக்கத்தை ஏற்படுத்தி உள்ளது.  அவரது தியாகம் வீரர்களுக்கு உற்சாகத்தை அளிக்கிறது. "வானை அளப்போம், கடல் மீனை அளப்போம்; சந்திர மண்டலத்தியல் கண்டு தெளிவோம்" என்ற பாரதியின் வரிகளை மனதில் கொண்டு, கனவுகளை நனவாக்கிச், சாதனை படைத்த சாவ்லாவின் வழியைப் பின்பற்றுவோம், வாரீர்!

Vote of Thanks for School Tree Planting Ceremony (நன்றியுரை)

கேள்வி:

பள்ளி வளாகத்தில் நடைபெற்ற 'மரம் நடும் விழாவுக்கு' வந்திருந்த சிறப்பு விருந்தினருக்கும் பெற்றோருக்கும் பள்ளியின் பசுமை பாதுகாப்புப்படை சார்பாக நன்றியுரை எழுதுக.

நன்றியுரை

இடம்: சங்கரலிங்கபுரம்

நாள்: 24.09.2020

எங்களது பள்ளியில் நடைபெற்ற மரம் நடு விழாவிற்கு வருகை தந்து சிறப்புச் சேர்த்த சான்றோர் பெருமக்களே!

மரம் நடுவதன் அவசியம் குறித்து சிறப்பு விருந்தினராக வருகை புரிந்திருந்த வனப்பாதுகாப்பு அலுவலர் அவர்கள் கூறிய அறிவுரைகள், எங்களது நெஞ்சில் பசுமரத்தாணி போல பதிந்தது. பசுமைப்படை திட்ட அலுவலரும், பள்ளித் தலைமை ஆசிரியரும் வழங்கிய அறிவுரைகளும் வழிகாட்டுதல்களும் எங்களுக்கு மிகுந்த ஊக்கத்தை அளித்தது.

நம் பள்ளியின் பசுமை படை அலுவலர்,

"மரம் இயற்கை நமக்கு தந்த வரம். உண்ணக் கனியும் ஒதுங்க நிழலும் தந்தது; உடலுக்கு மருந்தும், உணர்வுக்கு விருந்தும் தந்தது; அடையக் குடிலும், அடைக்கக் கதவும் தந்தது; அழகு வேலியும், ஆடத் தூலியும் தந்தது; தடவத் தைலமும் தாளிக்க எண்ணையும் தந்தது; எழுதக் காகிதமும் எரிக்க விறகும் தந்தது. மரம்தான் மரம்தான் எல்லாம் மரம்தான்! மறந்தான் மறந்தான், மனிதன் மறந்தான். மனிதா, மனிதனாக வேண்டுமா? மரத்திடம் வா. ஒவ்வொரு மரமும் போதி மரம்!!"

என்று பேசினார். அவரது கருத்து எங்களுக்கு உற்சாகத்தை அளித்தது.

மரங்களின் வகைகள், அவற்றின் பயன்கள், எந்தெந்த மண்ணில் எந்தெந்த மரங்கள் வளரும், மரங்களின் பொருளாதார பயன்கள், பருவநிலை மாற்றம், எதிர்காலச் சவால்கள் குறித்த தகவல்களை இந்த விழா மூலமாக நாங்கள் அறிந்து கொண்டோம்.

இந்த விழாவிற்கு வருகை தந்து சிறப்பு சேர்த்த சிறப்பு விருந்தினர்களுக்கும், பெற்றோர்களுக்கும் பசுமைப் பாதுகாப்பு படை சார்பாக நன்றியைத் தெரிவித்துக் கொள்கிறோம். இந்த விழா சிறப்புடன் நடைபெறக் காரணமாக இருந்த அனைவருக்கும் நன்றியைத் தெரிவித்துக் கொள்கிறோம்.

நன்றி, வணக்கம்!

An Essay on a Visit to the Government Exhibition

உங்கள் பகுதியில் நடைபெற்ற அரசுப் பொருட்காட்சிக்குச் சென்று வந்த நிகழ்வை கட்டுரையாக்குக.

அரசுப்பொருட்காட்சி

முன்னுரை

கண்ணால் காண்பவை மனத்தில் ஆழமாகப் பதிந்து, நெடுங்காலம் நிலைத்திருக்கும். அதனால்தான், பள்ளிகளில் சில இடங்களைக் குறிப்பிட்டு சுற்றுலாவாக அழைத்துச் செல்கின்றனர். அந்த வகையில் பொருட்காட்சிகள் கூட மக்கள் அறிவை வளர்க்க பெருந்துணை புரிகின்றன. நான் அண்மையில் என் நண்பர்களுடன் மதுரையில் உள்ள தமுக்கம் மைதானத்தில் நடைபெற்ற அரசுப் பொருட்காட்சிக்குச் சென்று வந்தேன். அது குறித்துச் சில செய்திகளைக் கூறுகிறேன், கேளுங்கள்.

தமுக்கம் மைதானம்

தமுக்கம் மைதானம் மதுரையின் வரலாற்றுச் சிறப்பு மிக்க மைதானமாக பதினான்காம் நூற்றாண்டில் மன்னர் விஸ்வநாத நாயக்கரால் கட்டப்பட்டு, மதுரை நாயக்கர் வம்சத்தால் பராமரிக்கப்பட்டு வந்தது. அக்காலத்தில் குதிரைப் பந்தயம், யானைப் பந்தயம், மாட்டு சண்டைகள் போன்ற விளையாட்டுகளும் சிலம்பு சண்டை, கத்திச் சண்டை போன்ற கலைகளும் இங்கு நடத்தப்பட்டன.

அரசுப் பொருட்காட்சி

சித்திரைத் திருவிழாவை முன்னிட்டு ஆண்டுதோறும் மதுரைத் தமுக்கம் மைதானத்தில் அரசு சார்பில் பொருட்காட்சி நடைபெறும். மாலை வேளையில் பல வண்ண விளக்குகளால் மைதானமே ஜொலிக்கும். பல்வேறு அரசுத் துறைகளின் சார்பில் அரசின் சாதனைகளை விளக்கும் வகையில் அரங்குகள் அமைக்கப்பட்டு இருக்கும்.

பல்துறை அரங்குகள்

அரசு ஏற்பாடு செய்திருந்த பொருட்காட்சி ஆதலால், உள்ளே நுழைந்ததும் அரசு சார்புடைய காவல்துறை, சுற்றுலாத் துறை, பொதுப்பணித் துறை, அற நிலையத் துறை, வனத் துறை, தீயணைப்புத் துறை, விளம்பரத் துறை, போக்குவரத்துத் துறை, மின்துறை, அறிவியல் துறை எனப் பல்வேறு துறைசார்ந்த அரங்குகள் அமைக்கப்பட்டிருந்தன. விவசாயம், கைத்தறி, மீன் வளர்ப்பு முதலான துறை சார்ந்த அரங்குகளும் இருந்தன. அவற்றில் நமக்குத் தேவையான விளக்கமளிக்கப் பொறுப்புடைய பலர் காத்திருந்தது சிறப்பாக இருந்தது. நான் பல வினாக்களை வினவி, என் ஐயங்களைப் போக்கிக் கொண்டேன்.

பல்வேறு கடைகள்

சிறுவர்களுக்கான பொம்மைகள் விற்கும் கடைகள், புத்தகக் கடைகள், ஆயத்த ஆடைகள் விற்கும் கடைகள், வீட்டுப் பயன்பாட்டுப் பொருட்கள் விற்கும் கடைகள், கைவினைப் பொருட்கள் விற்கும் கடைகள் எனப் பல்வேறு கடைகள் அங்கே காணப்பட்டன.

கேளிக்கை அரங்குகள்

பல்வேறு கலை நிகழ்ச்சிகள், சாகச நிகழ்ச்சிகள் போன்றவை நடத்தப்பட்டன. மீன் கண்காட்சிக் கூடம் கண்களைக் கவர்வதாக இருந்தது. பல்வேறு வகையான இராட்டினங்களில் குழந்தைகள், சிறியவர், பெரியவர் என அனைவரும் சுற்றி மகிழ்ந்தனர்.

உணவு அரங்குகள்

குடும்பம் குடும்பமாக வந்திருந்த சிலர், அங்கு அமைக்கப்பட்டிருந்த பல்வேறு உணவு அரங்கங்களில் கூடிநின்று, பல்வேறு வகையான தின்பண்டங்களை வாங்கி உண்டு மகிழ்ந்தனர். அங்குக் குடிப்பதற்குப் பல்வேறு வகையான சாறுகள் வழங்கப்பட்டன. பனிக்கூழ் வகைகள் எல்லோரையும் கவர்ந்தன. 'ஆவின்' பால் நிறுவனம் அமைத்திருந்த அரங்கில் எண்ணற்ற மக்கள் அவரவர் விருப்பத்திற்கு ஏற்ப சுவையுடைய பண்டங்களை வாங்கிச் சுவைத்தனர்.

முடிவுரை

பொருட்காட்சி என்பது வெறும் பொருள்களை மட்டும் காண உதவவில்லை. அது பல்வேறு துறை அறிவையும் பெற உதவுவதாக அமைந்துள்ளது. எனவே, அடுத்த முறை நண்பர்களை எல்லாம் அழைத்துக் கொண்டு செல்ல வேண்டும் என்ற முடிவுடன் வீடு திரும்பினேன்.

Essay on Visiting a Kalai Thiruvizha (Art Festival) in Tamil

கலைத் திருவிழாவிற்குச் சென்று வந்த நிகழ்வு குறித்துக் கட்டுரை எழுதுக

கட்டுரை -கலைத்திருவிழா

முன்னுரை

மனிதன் கொண்ட விழைவின் வெளிப்பாடே விழா. இவ்விழாவில் அவரவர் சார்ந்த சமூகத்தின் விழுமியங்கள் கலைகள் வடிவில் பொதுவில் நிகழ்த்தப்படும். சமூகத்தின் பன்முகத் தன்மையையும் பண்பாட்டையும் பறைசாற்றும் கலைகள் மனத்திற்கு மகிழ்ச்சியையும் புத்துணர்ச்சியையும் தருவதோடு வாழ்க்கை நெறிகளையும் வகுத்துக் கூறும். இத்தன்மை வாய்ந்த கலைத் திருவிழாவைக் காண மதுரைக்குச் சென்று வந்தேன். அதைப் பற்றிக் கூறுகிறேன், கேளுங்கள்.

கண்கவர் கலைத் திருவிழா

மதுரை அரசுக் கலைக்கல்லூரியில் மாநில அளவிலான கலைத் திருவிழாவிற்கு ஏற்பாடு செய்யப்பட்டிருந்தது. "அருமை உடைத்தென்று அசாவாமை வேண்டும்" என்பதை மனத்தில் கொண்டு பள்ளி, வட்டார மற்றும் மாவட்ட அளவிலான போட்டிகளில் கலந்துகொண்டு வெற்றி பெற்ற மாணவர்கள் மாநில அளவிலான கலைத் திருவிழாவில் கலந்துகொள்ள மிகுந்த ஆர்வத்துடன் அதிகாலையிலேயே வந்திருந்தனர். "ஓவிய விதானத்து உரைபெறு நித்திலத்து மாலைத்தாமம் வளையுடன் நாற்றி, விருந்துபடக் கிடந்த அருந்தொழில் அரங்கம்" என்ற சிலப்பதிகார அரங்கம் போல் இக்கலைத் திருவிழா அரங்கம் விளங்கிற்று. வண்ணவண்ணத் தோரணங்களும் வரவேற்புப் பதாகைகளும் சிவப்புக்கம்பள விரிப்பும் விசாலமான பார்வையாளர் அரங்கும் கண்களைக் கவர்ந்தன!

நிகழ்ச்சித் தொடக்கம்

மாநில அளவிலான கலைத் திருவிழா போட்டிகளைத் தமிழக முதல்வர் தொடங்கி வைத்தார். அமைச்சர் பெருமக்கள், பல்வேறு துறைகளின் உயர் அதிகாரிகள், கலைஞர்கள், கல்வியாளர்கள், பொதுமக்கள், பெற்றோர்கள், மாணவர்கள் எனப் பலரும் திரளாகக் கலந்து கொண்டு விழாவைச் சிறப்பித்தனர்.

நோக்கம் மற்றும் குறிக்கோள்

அரசு மற்றும் அரசு உதவிபெறும் பள்ளி மாணவர்களின் உள்ளார்ந்த கலைத் திறன்களை வெளிக் கொணர்வதை நோக்கமாகக் கொண்டு இக்கலைத் திருவிழா 2022ஆம் ஆண்டு முதல் நடத்தப்பட்டு வருகிறது. இந்த ஆண்டு, "சூழல் பாதுகாப்பு அனைவரின் பொறுப்பு" என்ற குறிக்கோளில் நடத்தப்பட்டது.

பல்வேறு போட்டிகள்

வகுப்புகள் 1-2, 3-5, 6-8, 9-10, 11-12 என ஐந்து பிரிவுகளில் கவின்கலை, இசை, நாடகம், நடனம் என்னும் வகைகளில் பல்வேறு போட்டிகள் நடத்தப்பட்டன. மாணவர்களின் கைவண்ணத்தில் உருவான பல்வேறு செதுக்குச் சிற்பங்களிலும் வண்ண ஓவியங்களிலும் சூழல் பாதுகாப்பின் இன்றியமையாமை வெளிப்பட்டது. இந்நிகழ்ச்சியில் சிறந்த சிற்பக் கலைஞர்களையும் ஓவியக் கலைஞர்களையும் அடையாளம் காண முடிந்தது.

கருவி இசையும் வாய்ப்பாட்டும்

கருவி இசைக்கென்று தனியாக அரங்கம் அமைக்கப்பட்டிருந்தது. கருவி இசையில் தோற்கருவி, துளைக்கருவி, தந்திக்கருவிஎனப் பலவகை இசைக்கருவிகளை இசைக்கும் போட்டிகள் நடத்தப்பட்டன. "மத்தளம் கொட்ட வரிசங்கம் நின்று ஊத" என்று ஆண்டாள் பாடியது போன்று மாணவர்கள் பம்பை, உறுமி, உடுக்கை, பறை, மிருதங்கம், தபேலா, டிரம்ஸ், நாதஸ்வரம், புல்லாங்குழல், வீணை, வயலின், கிட்டார் ஆகியவற்றை இசைத்தனர்; பார்வையாளர்கள் மயங்கினர். மற்றொருபுறம் வாய்ப்பாட்டு இசையில் பங்கேற்ற மாணவர்கள் நாட்டுப்புறப் பாடல்களையும் செவ்வியல் இசைப் பாடல்களையும் பாடி அசத்தினர்.

நடனமும் நாடகமும்

தனிநபர் நடனம் மற்றும் குழு நடனம் என்னும் இரண்டு பிரிவுகளாக நடனப் போட்டி நடத்தப்பட்டது. போட்டிகளில் கலந்து கொண்ட மாணவர்கள் பாடல்களுக்கு ஏற்ப வண்ண வண்ண ஆடை அலங்காரங்களுடன் பரதநாட்டியம், நாட்டுப்புற நடனம், மேற்கத்திய நடனம் எனப் பலவகை நடனங்களை ஆடி பார்வையாளர்களை மகிழ்வித்தனர். தனிநபர் நடிப்பு, பலகுரல் பேச்சு, நகைச்சுவை வழங்குதல், குழுநாடகம் என்னும் பிரிவுகளில் நாடகப் போட்டி நடத்தப்பட்டது. சூழல் பாதுகாப்பைக் கருப்பொருளாகக் கொண்ட நாடகங்கள் பார்வையாளர்கள் மனத்தில் பதிந்தன. மாணவர்களின் நடனமும் நடிப்பும் தேர்ந்த திரைக் கலைஞர்களைப் போலவே இருந்தது. இக்கலைத் திருவிழாக் காட்சிகளையெல்லாம்,"அருவிய முருகியம் ஆர்ப்பப் பைங்கிளி பருகிய தமிழிசை பாடப் பொன்மயில் அருகிய சிறை விரித்தாடப் பூஞ்சினை மருவிய குரக்கினம் மருண்டு நோக்குமால்" என்பது போல நாங்கள் நோக்கினோம்.

விருது வழங்கும் நிகழ்ச்சி

பல்வேறு போட்டிகளில் பங்கேற்று முதன்மை பெற்ற மாணவ மாணவிகளுக்கு கலையரசன் மற்றும் கலையரசி விருதுகள் வழங்கப்பட்டன. விருது பெற்ற மாணவர்கள் முகத்திலே மகிழ்ச்சி வெள்ளம் கரைபுரண்டு ஓடியது. "போட்டிகளில் கலந்துகொண்டு சிறப்பிடம் பெற்ற மாணவர்கள் வெளிநாட்டுச்சுற்றுலா அழைத்து செல்லப்படுவார்கள்" என்று பள்ளிக் கல்வித்துறை அமைச்சர் அறிவித்தார். அமைச்சர்கள், கல்வியாளர்கள் மற்றும் கலைஞர்களின் வாழ்த்துரையுடன் கலைத்திருவிழா இனிதே நிறைவடைந்தது. ஆயினும், கலைத்திருவிழாக்காட்சிகள் என் கண்களைவிட்டு அகலவே இல்லை!

முடிவுரை

நிகழ்ச்சியில் பங்கேற்ற மாணவர்கள் அனைவரின் நெஞ்சிலும் கலைத் திருவிழாவே குடிகொண்டிருந்தது. "நதியில் விளையாடி கொடியில் தலைசீவி நடந்த இளந்தென்றலாய்" மாணவர்கள் ஒவ்வொருவரும் கலைஞர்களாக மாறிக் கொண்டிருந்தார்கள். மாணவர்களின் திறன்கள் மெருகூட்டப்பட்டிருந்தன. எதிர்காலத்தில் மாணவர்கள் மிகப்பெரிய சாதனையைப் படைக்க இக்கலைத் திருவிழா நிச்சயம் தூண்டுகோலாக அமையும் என உறுதியாக நம்பலாம்.