Ettuthokai Noolgal with Etymology | Sangam Literature Explained | Iyal 1 Karpavai Katrapin

இயல் 1, கற்பவை கற்றபின்

நற்றிணை நல்ல குறுந்தொகை ஐங்குறுநூறு

ஒத்த பதிற்றுப்பத்து ஓங்கு பரிபாடல்

கற்றறிந்தார் ஏத்தும் கலியொடு அகம்புறம் என்று

இத்திறத்த எட்டுத் தொகை.

இச்செய்யுளில் இடம்பெற்றுள்ள எட்டுத்தொகை நூல்களைப் பெயர்க்காரணத்துடன் எடுத்துக்காட்டுக.

எட்டுத்தொகை நூல்கள்

நற்றிணை

எட்டுதொகை நூல்களுள் முதலில் வைத்து எண்ணப்படுவது; 'நல்' என்னும் அடைமொழி பெற்ற நூல்; நானூறு அகத்திணைப் பாடல்களைக் கொண்டது; பன்னாடு தந்த மாறன் வழுதியால் தொகுக்கப்பட்டது.

குறுந்தொகை

குறைந்த அடிகள் கொண்டதால் குறுந்தொகை எனப்படுகிறது; 'நல்ல' என்னும் அடைமொழி பெற்றது; உரையாசிரியர்களால் மிகுதியாக மேற்கோள் காட்டப்பட்ட நூல்; நானூறு பாடல்களைக் கொண்டது. இதனைத் தொகுத்தவர் பூரிக்கோ. அகம் பற்றியது.

ஐங்குறுநூறு

குறுகிய அடிகளால் திணைக்கு நூறு பாடல்கள் வீதம் ஐநூறு பாடல்களைக் கொண்டதால் இந்நூல் ஐங்குறுநூறு எனப்படுகிறது; ஆசிரியப்பாவால் ஆனது; மருதத் திணை முதலில் வைக்கப்பட்டுள்ளது; தொகுத்தவர் புலத்துறை முற்றிய கூடலூர் கிழார்; தொகுப்பித்தவர் யானைக்கட்சேய் மாந்தரஞ்சேரல் இரும்பொறை.

பதிற்றுப்பத்து

சேரமன்னர்கள் பத்துப்பேரைப் பற்றிப் பத்துப்பத்துப் பாடல்களாக நூறு பாடல்களைக் கொண்டதால் 'பதிற்றுப்பத்து' எனப்படுகிறது. முதல் பத்தும் பத்தாவது பத்தும் கிடைக்கவில்லை. புறம் பற்றியது.

பரிபாடல்

பரிபோல் கால்களால் பரிந்து நடைபோடும் பண்ணிசைப் பாடல்களைக் கொண்ட நூலாதலால் 'பரிபாடல்' எனப்படுகிறது. 'ஓங்கு' என்னும் அடைமொழி பெற்றது. இருபத்தைந்து அடி முதல் நானூறு அடி வரையுள்ள எழுபது பாடல்களைக் கொண்டது. திருமால், முருகன், கொற்றவை, வையை, மதுரை பற்றி அகமும் புறமும் கலந்த பாடல்களால் ஆனது.

கலித்தொகை

கலிப்பாவால் பாடப்பட்டதால் 'கலித்தொகை' எனப்படுகிறது; 'கற்றறிந்தோர் ஏத்தும் கலி' என்னும் அடைமொழி பெற்றது. நூற்றைம்பது பாடல்களைக் கொண்டது; ஐந்திணைப் பாடல்களால் ஆனது.

அகநானூறு

அகம் பற்றிய நானூறு பாடல்களைக் கொண்டது; நெடுந்தொகை எனப்படுகிறது; தொகுத்தவர் உப்பூரிக்குடி கிழார் மகனார் உருத்திரசன்மர்; தொகுப்பித்தவர் உக்கிரப்பெருவழுதி.

புறநானூறு

புறம் பற்றிய நானூறு பாடல்களைக் கொண்டது. பழந்தமிழரின் வரலாற்றுக் களஞ்சியமாகத் திகழ்கிறது.

Mullaipaattu 5 Mark Question Explained | Sangam Literature

5 மதிப்பெண் வினா, முல்லைப்பாட்டு

முல்லைப் பாட்டில் உள்ள கார்கால செய்திகளை விவரித்து எழுதுக.

முல்லைப்பாட்டு

நனந்தலை உலகம் வளைஇ நேமியொடு வலம்புரி பொறித்த மாதாங்கு தடக்கை நீர் செல நிமிர்ந்த மாஅல் போல பாடுஇமிழ் பனிக்கடல் பருகி வலனேர்பு கோடு கொண்டு எழுந்த கொடுஞ் செலவு எழிலி பெரும்பெயல் பொழிந்த சிறுபுன் மாலை அருங் கடி மூதூர் மருங்கில் போகி யாழ் இசை இன வண்டு ஆர்ப்ப நெல்லொடு நாழி கொண்ட நறுவீ முல்லை அரும்பு அவிழ் அலரி தூஉய் கைதொழுது பெருமுது பெண்டிர் விரிச்சி நிற்ப சிறுதாம்பு தொடுத்த பசலைக் கன்றின் உறுதுயர் அலமரல் நோக்கி ஆய்மகள் நடுங்கு சுவல் அசைத்த கையள் கைய கொடுங்கோல் கோவலர் பின் நின்று உய்த்தர இன்னே வருகுவர் நின் தாயர் என்போள் நன்னர் நன்மொழி கேட்டனம்.

சொல்பொருள்

நேமியொடு - சக்கரத்துடன்

வலம்புரி - வலமாக சுழிகளை உடைய சங்கினை

பொறித்த - வைத்திருப்பவர் திருமால்

மா - திருமகளை

தாங்கு - மார்பிலே தாங்கியவர்

தடக்கை - பெரிய கைகளை உடையவர்

நீர் செல - மாவலி மன்னன் நீரை வார்க்க

நிமிர்ந்த - விண்ணுக்கும் மண்ணுக்கும் உயர்ந்து நின்ற

மாஅல் போல - திருமால் போன்ற மேகம் (செய்யுளிசை அளபெடை)

பாடு - ஒலி

இமிழ் - ஒலிக்கின்ற

பனிக்கடல் - குளிர்ந்த கடல் நீரை

பருகி - குடித்தது

வலன் - வலிமையாக

ஏர்பு - எழுந்தது

கோடு - மலைமீது

கொண்டு - மோதி

எழுந்த - எழுந்து

கொடுஞ் செலவு - விரைந்து செல்லும்

எழிலி - மேகம்

நனம் - அகன்ற

தலை - இடத்தை உடைய

உலகம் - உலகத்தை

வளைஇ - வளைத்தது (சொல்லிசை அளபெடை)

சிறு - சிறுபொழுது ஆகிய

புன் - துன்பத்தைத் தருகின்ற

மாலை - மாலைப் பொழுதில்

பெரும் - பெரிய

பெயல் - மழை

பொழிந்த - பெய்தது

பெருமுது பெண்டிர் - மிகவும் வயது முதிர்ந்த பெண்கள்

அருங் கடி - கடும் காவலையுடைய

மூதூர் - பழமையான ஊரின்

மருங்கில் - பக்கத்தில்

போகி - சென்றனர்

யாழ் இசை - யாழின் இசை போல்

இன வண்டு - வண்டினங்கள்

ஆர்ப்ப - ஆரவாரம் செய்தன

நாழி - படி

கொண்ட - நிறைய

நெல்லொடு - நெல்லுடன்

நறுவீ முல்லை - நறுமணம் கொண்ட முல்லை

அலரி - மலர்களை

(அரும்பு - மொட்டுகள் அவிழ் - மலர்ந்த)

தூஉய் - தூவினர்

கைதொழுது - கைகளால் தொழுதனர்

விரிச்சி - நற்சொல் கேட்டு

நிற்ப - நின்றனர்

நடுங்கு - நடுங்கிய

சுவல் - தோள்களை

அசைத்த - கட்டிய

கையள் - கைகளை உடைய

ஆய்மகள் - இடையர் குலப் பெண்

சிறு - சிறிய

தாம்பு - கயிற்றினால்

தொடுத்த - கட்டப்பட்ட

பசலைக் - இளமையான

கன்றின் - கன்று

உறுதுயர் - அடைந்த துன்பத்தை

அலமரல் - நினைத்துப்

நோக்கி - பார்த்தாள்

கைய - கையில்

கொடுங்கோல் - வளைந்த கத்தியை உடைய கம்பை ஏந்திய

கோவலர் - இடையர்

பின் நின்று - பின்னே நின்று

உய்த்தர - செலுத்த

இன்னே - இப்பொழுதே

நின் தாயர் - உன்னுடைய தாய்ப்பசு

வருகுவர் - வந்துவிடும்

என்போள் - என்று கூறினாள்

நன்னர் - நன்மை தரும்

நன்மொழி - நற் சொல்லை

கேட்டனம் - கேட்டோம்.

[முல்லைப்பாட்டு, பத்துப்பாட்டு நூல்களுள் ஒன்று; 103 அடிகளை உடையது; ஆசிரியப்பாவால் ஆனது; பத்துப்பாட்டில் மிக குறைந்த அடிகளையுடைய நூல். இதனை இயற்றியவர் காவிரிப்பூம்பட்டினத்து பொன்வணிகனார் மகனார் நப்பூதனார். முல்லைப்பாட்டு முல்லை நிலத்தைப் பற்றியது. முல்லையின் பெரும்பொழுது கார்காலம்; சிறுபொழுது மாலை ஆகும்.]

5 மதிப்பெண் வினாவுக்கான விடை

முல்லைப்பாட்டு - கார்காலச் செய்திகள்

திருமாலின் தோற்றம்

சக்கரத்துடன் வலஞ்சுழிச் சங்கினை ஏந்தியிருப்பவர்; திருமகளை மார்பிலே தாங்கியவர்; பெரிய கைகளை உடையவர்; மாவலி மன்னன் நீரை வார்க்க விண்ணுக்கும் மண்ணுக்கும் உயர்ந்து நின்றவர்.

மாலை நேரப்பெருமழை

அத்தகைய திருமால் போன்ற மேகம் ஒலி ஒலிக்கின்ற குளிர்ந்த கடல் நீரைக் குடித்தது; வலிமையாக எழுந்தது; மலை மீது மோதியது; விரைந்து சென்று அகன்ற இடத்தையுடைய உலகத்தை வளைத்தது; துன்பத்தைத் தருகின்ற சிறு பொழுதாகிய மாலைப்பொழுதில் பெரிய மழை பெய்தது.

பெருமுது பெண்டிர் விரிச்சி கேட்டல்

பெரிதும் வயது முதிர்ந்த பெண்கள் கடும் காவலை உடைய பழமையான ஊரின் பக்கத்தில் சென்றனர். வண்டினங்கள் யாழின் இசை போல் ஆரவாரம் செய்தன. நெல்லுடன் படி நிறைய முல்லை மலர்களைத் தெய்வத்தின் முன் தூவினர். கைகளால் தொழுதனர். நற்சொல் கேட்டு நின்றனர்.

ஆயர் குல மகளின் நற்சொல் கேட்டல்

அங்கு, நடுங்குகின்ற தோள்களைக் கட்டியபடி இடையர் குலப் பெண் ஒருத்தி இருந்தாள். சிறிய கயிற்றினால் கட்டப்பட்ட இளம் கன்று அடைகின்ற துன்பத்தை நினைத்துப் பார்த்தாள். அப்பொழுது,"வளைந்த கத்தியை உடைய கம்பைக்கொண்ட எம் இடையர் பின்னே நின்று செலுத்த, உன் தாயர் இப்பொழுதே வந்துவிடுவர்"என்றாள். இதைக்கேட்ட முதுபெண்டிர் "நன்மை தரும் நற்சொல்லைக் கேட்டோம்" என்றனர்.

பாடப்புத்தக விளக்கம்:

கார்காலச் செய்திகள்

பெரு மழைப்பொழிவு

அகன்ற உலகத்தை வளைத்துப் பெருமழை பொழிகிறது. வலம்புரிச் சங்கு பொறித்த கைகளையுடைய திருமால் குறுகிய வடிவம் கொண்டு மாவலி மன்னன் நீர் வார்த்து தரும்பொழுது, மண்ணுக்கும் விண்ணுக்குமாகப் பேருருவம் எடுத்து உயர்ந்து நிற்பது போன்று உள்ளது மழை மேகம். மேகம் ஒலிக்கும் கடலின் குளிர் நீரைப் பருகிப் பெருந்தோற்றம் கொண்டு, வலமாய் எழுந்து, மலையைச் சூழ்ந்து, விரைந்த வேகத்துடன் பெருமழையைப் பொழிகிறது.

விரிச்சி கேட்டல்

துன்பத்தை செய்கின்ற மாலைப்பொழுதில் முதிய பெண்கள் மிகுந்த காவலையுடைய ஊர்ப்பக்கம் சென்றனர். யாழிசை போன்று ஒலிக்கும் வண்டுகள் சூழ்ந்து ஆரவாரிக்கின்றன. நறுமணம் கொண்ட அரும்புகள் மலர்ந்த முல்லைப் பூக்களோடு நாழியில் கொண்டு வந்த நெல்லையும் சேர்த்துத் தெய்வத்தின் முன் தூவினர். பிறகு தெய்வத்தைத் தொழுது, தலைவிக்காக நற்சொல் கேட்டு நின்றனர்.

அங்கு சிறு தாம்புக்கயிற்றால் கட்டப்பட்ட இளங்கன்று பசியால் வாடிக் கொண்டிருந்தது. அதன் வருத்தத்தை ஓர் இடைமகள் கண்டாள். குளிர் தாங்காமல் கைகளைக் கட்டியபடி நின்ற அவள், "புல்லை மேய்ந்து உன் தாயர் வளைந்த கத்தியை உடைய கம்பைக் கொண்ட எம் இடையர் ஓட்டிவர இப்போது வந்து விடுவர், வருந்தாதே" என்றாள். இது நல்ல சொல் எனக் கொண்டு தலைவியிடம், நற்சொல்லை நாங்கள் கேட்டோம் என்று கூறினர். இவ்வாறு தலைவன் வருகை குறித்து முது பெண்டிர் விரிச்சி கேட்டு நின்றனர்.

தலைவியை ஆற்றுப்படுத்துதல்

தலைவன் பகைவரை வென்று திறைப்பொருளோடு வருவது உறுதி. தலைவியே! மனத்தடுமாற்றம் கொள்ளாதே! என ஆற்றுப்படுத்தினர் முது பெண்டிர்.

Scientific Concepts in Tamil Literature: A Speech on Paripadal & Ancient Texts

5 மதிப்பெண் வினா சொற்பொழிவு, பரிபாடல்

நம் முன்னோர் அறிவியல் கருத்துகளை இயற்கையுடன் இணைத்துக் கூறுவதாகத் தொடங்குகின்ற பின்வரும் சொற்பொழிவைத் தொடர்ந்து நிறைவு செய்க.

சொற்பொழிவு

தலைப்பு: தமிழ் இலக்கியத்தில் அறிவியல்

பேரன்பிற்குரிய அவையோர் அனைவருக்கும் வணக்கம்! இன்று இயல், இசை, நாடகம் என்னும் முத்தமிழுடன் அறிவியலை நான்காம் தமிழாகக் கூறுகின்றனர். ஆதிகாலந்தொட்டு இயங்கி வரும் தமிழ் மொழியில், அறிவியல் என்பது தமிழர் வாழ்வியலோடு கலந்து கரைந்து வந்துள்ளதை இலக்கியங்கள் மூலம் அறிகிறோம். அண்டத்தை அளந்தும் புவியின் தோற்றத்தை ஊகித்தும் கூறும் அறிவியல் செய்திகள், இலக்கியங்களில் உள்ளன. சங்க இலக்கியமான பரிபாடலில்....

தூசுத்திரட்சியால் உண்டாகும் நெபுலாக்களில் இருந்து எப்படி நட்சத்திரங்கள் தோன்றி அழிகின்றனவோ அப்படி இந்த உலகமும் தோன்றி அழிவதை கி.பி. இரண்டாம் நூற்றாண்டில் வாழ்ந்த கீராந்தையார் என்னும் சங்ககாலத் தமிழ்ப்புலவர் கூறியுள்ளார்.

பரிபாடல் கூறும் உலகத் தோற்றம்

தொன்றுதொட்டு வரும் இயற்கையின் நியதிப்படி சந்திரனும் ஏனையவையும் அழிந்த ஊழியின் முடிவில் மீண்டும் உலகம் தோன்றுவதை பரிபாடல் சொல்கிறது.

1. "விசும்பில் ஊழி ஊழ் ஊழ் செல்ல". அதாவது, ஒன்றுமில்லாத ஊழிக்காலம் வந்தது. அந்த ஊழிக்காலம் செல்ல,
2. "கரு வளர் வானத்து இசையில் தோன்றி, உரு அறிவாரா ஒன்றன் ஊழியும்". அதாவது, பரம அணுவிலிருந்து தோன்றிய ஓசையால் உருவம் இல்லாத ஆகாயம் தோன்றியது.
3. "உந்து வளி கிளர்ந்த ஊழ் ஊழ் ஊழியும்". அதாவது, பரம அணுவைச் சுற்றிச் சுழல்கின்ற காற்றால் உப்பிய காற்றின் ஊழிக்காலம் வந்தது.
4. "செந்தீச்சுடரிய ஊழியும்". அதாவது, காற்றினால் செந்நிறத்தில் ஒளிரும் நெருப்பு ஊழிக்காலம் வந்தது.
5. "பனியொடு தண் பெயல் தலைஇய ஊழியும்". அதாவது, காற்று மற்றும் நெருப்பின் விளைவால் பனியும் மழையும் பெய்த ஊழிக்காலம் வந்தது.
6. "அவையிற்று உள் முறை வெள்ளம் மூழ்கி ஆர்தருபு, மீண்டும் பீடு உயர்பு ஈண்டி, அவற்றிற்கும் உள்ளீடு ஆகிய இரு நிலத்து ஊழியும்". அதாவது, வெள்ளத்தால் மூடி இருந்த நிலம் எரிமலை வெடிப்புகளால் மீண்டும் மேலெழுந்து நிலமும் கடலும் தோன்றியது.

பிற இலக்கியங்களில் அறிவியல்

இதேபோன்று, மற்றொரு சங்க இலக்கியமான புறநானூறு, உலகம் ஐம்பூதங்களால் ஆனது என்பதை,

"மண் திணிந்த நிலனும்
நிலம் ஏந்திய விசும்பும்,
விசும்பு தைவரு வளியும்
வளித் தலைஇய தீயும்,
தீ முரணிய நீரும், என்றாங்கு
ஐம்பெரும் பூதத்து இயற்கை போல்" என்று குறிப்பிடுகிறது.

தானியங்கி விமானம் குறித்து 'வலவன் ஏவா வான ஊர்தி' என்று குறிப்பிடுகிறது.

வானவெளியில் உள்ள வெற்றிடம் குறித்து 'வறிது நிலைஇய காயமும்' என்கிறது.

திருக்குறள் மற்றும் பிற சான்றுகள்

'சுழன்றும் ஏர்பின்னது உலகம்' என்ற குறள் மூலம் உலகம் உருண்டை என்பதையும், 'மாதர் முகம்போல் ஒளிவிட வல்லையேல் காதலை வாழி மதி' என்ற குறள் மூலம் திங்களுக்குத் தானாக ஒளிவிடும் தன்மை இல்லை என்பதையும், 'திங்களைப் பாம்பு கொண்டற்று' என்ற குறள் மூலம் சந்திரகிரகணம் பற்றியும் திருக்குறள் குறிப்பிடுகிறது.

"தினையளவு போதாச் சிறுபுல் நீர் நீண்ட பனையளவு காட்டும்" என்ற கபிலரின் வரிகள் ஒளியியல் குறித்த அறிவுக்குச் சான்றாகும்.

'புல்லாகிப் பூடாகி' எனத்தொடங்கும் திருவாசக வரிகள் பரிணாம வளர்ச்சி குறித்துக் கூறுகிறது.

'அணுவைத் துளைத்து ஏழ் கடலைப் புகட்டி' என்னும் அவ்வையாரின் வரிகள் அறிவியல் அறிவைப் பறைசாற்றுகின்றன.

"மருந்தென வேண்டாவாம் யாக்கைக்கு அருந்தியது அற்றது போற்றி உணின்" எனும் குறள் மருத்துவ அறிவை வெளிப்படுத்துகின்றது.

இவையெல்லாம் தமிழ் இலக்கியங்கள் காட்டும் அறிவியல் செய்திகள் என்று கூறி, வாய்ப்புக்கு நன்றி கூறி விடைபெறுகிறேன்.

நன்றி, வணக்கம்!

Aram in Sangam Literature: One Mark Questions and Answers

சங்க இலக்கியத்தில் அறம்

ஒரு மதிப்பெண் வினாக்கள் மற்றும் விடைகள்

1. தமிழர்கள் இல்வாழ்க்கையை_________ஆகக் கொண்டனர்

   விடையைக் காண்க

   அற வாழ்க்கை

2. தமிழர் பொருள் ஈட்டி_______ செய்து இன்புற்றனர்

   விடையைக் காண்க

   அறம்

3. சங்ககாலத்தில் எதை மனித உறவின் மையமாக கொண்டிருந்தனர்?

   விடையைக் காண்க

   அறம்

4. உலகே பரிசாகக் கிடைத்தாலும் எச்செயல்களைச் செய்ய மறுத்தவர், தமிழர்?

   விடையைக் காண்க

   பழி தரும் செயல்களை

5. சமயக் கலப்பில்லாத மானிட அறம் இயல்பாக நிலவிய காலம் எது?

   விடையைக் காண்க

   சங்க காலம்

6. மனிதன் தனியானவன் அல்லன். அவன் சமூகக் கடலின் ஒரு _______

   விடையைக் காண்க

   துளி

7. மனிதன் எல்லாரோடும் எல்லாவற்றோடும் எவ்வளவுக்கெவ்வளவு தன்னை இணைத்துக் கொள்கிறானோ அவ்வளவுக்கவ்வளவு அவனுடைய______  பெருகுகிறது

   விடையைக் காண்க

   மகிழ்ச்சி

8. மனிதன் மகிழ்ச்சிப் பெருக்கில் திளைக்க வேண்டும் என்றால் அனைத்தையும் ஊடுருவிச் செல்லும் பொதுவிதியான _______ஐ மனிதன் ஏற்க வேண்டும்.

   விடையைக் காண்க

   அறத்தை

9. அனைத்தையும் ஊடுருவிச் செல்லும் பொது விதி எது?

   விடையைக் காண்க

   அறம்

10. அறநெறிக் காலம் என்பது எது?

    விடையைக் காண்க

    சங்க காலத்திற்குப் பிந்தைய அற இலக்கியங்களின் காலத்தை அறநெறிக் காலம் என்பர்.

11. அறநெறிக் கால அறங்கள் சமயம் சார்ந்தவை. ஆனால், சங்க இலக்கிய அறங்கள்______

    விடையைக் காண்க

    இயல்பானவை

12. "கவிதை வாழ்க்கையின் திறனாய்வு" என்று கூறியவர் யார்?

    விடையைக் காண்க

    திறனாய்வாளர் ஆர்னால்டு

13. சங்க அறங்கள் __________களிடமிருந்து இரவல் பெறப்பட்டவை அல்ல

    விடையைக் காண்க

    சமயங்கள்

14. அறம் செய்வதில்________ நோக்கம் இருக்கக் கூடாது

    விடையைக் காண்க

    வணிக

15. அறம் செய்வதில் வணிக நோக்கம் இருக்கக் கூடாது என்பது _______ மக்களின் கருத்தாக இருந்தது

    விடையைக் காண்க

    சங்ககால

16. இப்பிறப்பில் அறம் செய்தால் அதன் பயனை மறுபிறப்பில் பெறலாம் என்ற _______ நோக்கு கூடாது என்று கூறப்பட்டது.

    விடையைக் காண்க

    வணிக

17. "இம்மைச் செய்தது மறுமைக்கு ஆம் எனும் அறவிலை வணிகன் ஆஅய் அல்லன்"-என்று குறிப்பிடும் இலக்கியம் எது?

    விடையைக் காண்க

    புறநானூறு

18. "இம்மைச் செய்தது மறுமைக்கு ஆம் எனும் அறவிலை வணிகன் ஆஅய் அல்லன்"-என்று பாடியவர் யார்?

    விடையைக் காண்க

    ஏணிச்சேரி முடமோசியார்

19. "இம்மைச் செய்தது மறுமைக்கு ஆம் எனும் அறவிலை வணிகன் ஆஅய் அல்லன்"-என்ற பாடல் வரிகள் உணர்த்தும் கருத்து யாது?

    விடையைக் காண்க

    நோக்கம் இன்றி அறம் செய்வதே மேன்மை தரும்

20. மன்னர்களிடம் உள்ள செங்கோலும் வெண்கொற்றக் குடையும் எதன் குறியீடாகப் போற்றப்பட்டன?

    விடையைக் காண்க

    அறத்தின் குறியீடாகப் போற்றப்பட்டன

21. 'அறநெறி முதற்றே அரசின் கொற்றம்', 'அறநெறி பிழையாத் திறனறி மன்னர்' என்ற பாடல் வரிகள் எதனைச் சுட்டுகின்றன?

    விடையைக் காண்க

    மன்னர்களுடைய செங்கோலும் வெண்கொற்றக்குடையும் அறத்தின் குறியீடுகளாகப் போற்றப்பட்டன என்பதைக் காட்டுகின்றன.

22. அரசன் எதைப்போன்று நேரிய ஆட்சியை மேற்கொள்ளவேண்டும்?

    விடையைக் காண்க

    செங்கோல்

23. அரசனின் கடமை யாது?

    விடையைக் காண்க

    நீர்நிலை பெருக்கி நில வளம் கண்டு உணவுப்பெருக்கம் காண்பதும் அதனை அனைவருக்கும் கிடைக்கச் செய்வதும் அரசனின் கடமையாகச் சொல்லப்பட்டது.

24. எதன் அடிப்படையில் தண்டனை வழங்க வேண்டும்?

    விடையைக் காண்க

    அறத்தின் அடிப்படையில் ஆராய்ந்து தண்டனை வழங்க வேண்டும்

25. அறத்தின் அடிப்படையில் ஆராய்ந்து தண்டனை வழங்க வேண்டும் என்று பாடிய புலவர் யார்?

    விடையைக் காண்க

    ஊன்பொதிப் பசுங்குடையார்

26. நன்றும் தீதும் ஆய்தலும் அன்பும் அறனும் காத்தலும் அமைச்சர் கடமை என்று கூறும் இலக்கியம் எது?

    விடையைக் காண்க

    மதுரைக்காஞ்சி

27. "செம்மை சான்ற காவிதி மாக்கள்" என்று அமைச்சர்களைப் பாடுபவர் யார்?

    விடையைக் காண்க

    மாங்குடி மருதனார்

28. அரசனின் அறநெறி ஆட்சிக்குத் துணை புரிந்தவை எவை?

    விடையைக் காண்க

    அறம் கூறும் மன்றங்கள்

29. அறம் கூறு அவையம் பற்றி "அறம் அறக்கண்ட நெறிமான் அவையம்" என்று பாடும் இலக்கியம் எது?

    விடையைக் காண்க

    புறநானூறு

30. மதுரையில் இருந்த அற அவையம் பற்றிக் குறிப்பிடும் நூல் எது?

    விடையைக் காண்க

    மதுரைக்காஞ்சி

31. தனிச்சிறப்பு பெற்ற அற அவையம் எது?

    விடையைக் காண்க

    உறையூர் அற அவையம்

32. துலாக்கோல் போல நடுநிலை மிக்க அற அவையம் எது?

    விடையைக் காண்க

    மதுரை அற அவையம்

33. போர் அறம் என்பது யாது?

    விடையைக் காண்க

    வீரமற்றோர், புறமுதுகிட்டோர், சிறார், முதியோர் ஆகியோரை எதிர்த்துப் போர் செய்யாமையே போர் அறம் ஆகும்

34. போரின் கொடுமையிலிருந்து பசு, பார்ப்பனர், பெண்கள், நோயாளர், புதல்வரைப் பெறாதவர் ஆகியோருக்குத் தீங்கு வராமல் போர்புரிய வேண்டும் என்று கூறும் நூல் எது?

    விடையைக் காண்க

    புறநானூறு

35. தம்மை விட வலிமை குறைந்தாரோடு போர் செய்வது கூடாது என்று பாடியவர் யார்?

    விடையைக் காண்க

    ஆவூர் மூலங்கிழார்

36. "எறியார் எறிதல் யாவணது எறிந்தோர் எதிர்சென்று எறிதலும் செல்லான்" என்று பாடும் இலக்கியம் எது?

    விடையைக் காண்க

    புறநானூறு

37. "எறியார் எறிதல் யாவணது எறிந்தோர் எதிர்சென்று எறிதலும் செல்லான்" என்று பாடிய புலவர் யார்?

    விடையைக் காண்க

    ஆவூர் மூலங்கிழார்

38. உண்மையான மகிழ்ச்சி எது?

    விடையைக் காண்க

    தன்னுடைய மகிழ்ச்சியை மறந்து மற்றவர் மகிழ்ச்சியை நாடுவதுதான் உண்மையான மகிழ்ச்சி.

39. ___________யை மறப்பது தான் மகிழ்ச்சி

    விடையைக் காண்க

    தன் மகிழ்ச்சி

40. "செல்வத்துப் பயனே ஈதல் துய்ப்பேம் எனினே தப்புந பலவே" என்று பாடிய புலவர் யார்?

    விடையைக் காண்க

    மதுரைக் கணக்காயனார் மகனார் நக்கீரனார்

41. "செல்வத்துப் பயனே ஈதல் துய்ப்பேம் எனினே தப்புந பலவே" என்று பாடும் நூல் எது?

    விடையைக் காண்க

    புறநானூறு

42. கொடையின் சிறப்பால் போற்றப்படும் வள்ளல்கள் எத்தனை பேர்?

    விடையைக் காண்க

    7

43. வள்ளல்களின் கொடைப் பெருமையைப் பாடும் இலக்கியங்கள் எவை?

    விடையைக் காண்க

    சிறுபாணாற்றுப்படை, பெருஞ்சித்திரனார் பாடல்

44. ஆற்றுப்படை இலக்கியங்கள் _________இலக்கியங்களாகவே உள்ளன

    விடையைக் காண்க

    கொடை

45. பதிற்றுப்பத்து_______ அரசர்களில் கொடைப் பதிவாகவே உள்ளது

    விடையைக் காண்க

    சேர

46. "இல்லோர் ஒக்கல் தலைவன், பசிப்பிணி மருத்துவன்" என்று போற்றப்படுபவர் யாவர்?

    விடையைக் காண்க

    வள்ளல்கள்

47. வழங்குவதற்குப் பொருள் உள்ளதா என்று கூடப் பார்க்காமல் கொடுக்கும் வள்ளல் யார்?

    விடையைக் காண்க

    பிடவூர்க்கிழான் மகன் பெருஞ்சாத்தன்

48. பிடவூர்க் கிழான் மகன் பெருஞ்சாத்தனைப் பாராட்டுபவர் யார்?

    விடையைக் காண்க

    நக்கீரர்

49. "வள்ளலின் பொருள் இரவலனின் பொருள். வள்ளலின் வறுமை இரவலனின் வறுமை" என்று குறிப்பிடுவர் யார்?

    விடையைக் காண்க

    பெரும்பதுமனார்

50. உலகமே வறுமையுற்றாலும் கொடுப்பவன் யார்?

    விடையைக் காண்க

    அதியமான்

51. "உலகமே வறுமையுற்றாலும் கொடுப்பவன் அதியன்" என்று பாடியவர் யார்?

    விடையைக் காண்க

    அவ்வையார்

52. இரவலர் தேடி வராவிட்டாலும் அவர்களைத் தேடி வரவழைத்தல் யாருடைய இயல்பு?

    விடையைக் காண்க

    ஆடுகோட்பாட்டுச் சேரலாதன்

53. ஆடுகோட்பாட்டுச் சேரலாதனைப் பாடிய புலவர் யார்?

    விடையைக் காண்க

    நச்செள்ளையார்

54. மறுமை நோக்கிக் கொடுக்காதவன் யார்?

    விடையைக் காண்க

    பேகன்

55. "மறுமையை நோக்கிக் கொடுக்காதவன் பேகன்" என்று பாடியவர் யார்?

    விடையைக் காண்க

    பரணர்

56. "தன்னை நாடி வந்த பரிசிலன் பொருள் பெறாமல் திருப்புவது தன் நாட்டை இழந்த துன்பத்தை விட பெருந்துன்பம் தருகிறது" என்று வருந்தியவர் யார்?

    விடையைக் காண்க

    பெருந்தலைச் சாத்தனார்

57. பெருந்தலைச் சாத்தனாரைப் பாடிய புலவர் யார்?

    விடையைக் காண்க

    குமணன்

58. எல்லாவற்றையும் கொடுப்பவன் யார்?

    விடையைக் காண்க

    மலையமான் திருமுடிக்காரி

59. "எல்லாவற்றையும் கொடுப்பவன் மலையமான் திருமுடிக்காரி" என்று பாடிய புலவர் யார்?

    விடையைக் காண்க

    கபிலர்

60. "ஈயாமை இழிவு, இரப்போர்க்கு ஈயாது வாழ்தலை விட உயிரை விட்டு விடுதல் மேலானது" என்று பாடும் நூல் எது?

    விடையைக் காண்க

    கலித்தொகை

61. தாம் பெற்றதைப் பிறருக்கு வழங்கிய புலவர் யார்?

    விடையைக் காண்க

    பெருஞ்சித்திரனார்

62. தாம் பெற்றதைப் பிறருக்கு வழங்கும் பெருஞ்சித்திரனாரின் பேருள்ளத்தைப் பலப்படுத்தும் இலக்கியம் எது?

    விடையைக் காண்க

    புறநானூறு

63. உதவி செய்தலை ஈழத்துப் பூதன்தேவனார் எவ்வாறு குறிப்பிடுகிறார்?

    விடையைக் காண்க

    உதவியாண்மை

64. "பிறர் நோயும் தம் நோய் போல் போற்றி அறன் அறிதல் சான்றவர்க்கு எல்லாம் கடன்" என்று கூறும் இலக்கியம் எது?

    விடையைக் காண்க

    கலித்தொகை

65. கலித்தொகையை பாடியவர் யார்?

    விடையைக் காண்க

    நல்லந்துவனார்

66. "பிறர் நோயும் தம் நோய் போல் போற்றி அறன் அறிதல் சான்றவர்க்கு எல்லாம் கடன்" என்று பாடியவர் யார்?

    விடையைக் காண்க

    நல்லந்துவனார்

67. "உண்மையான செல்வம் என்பது பிறர் துன்பம் தீர்ப்பது தான்" என்று பாடியவர் யார்?

    விடையைக் காண்க

    நல்வேட்டனார்

68. சான்றோர் செல்வம் என்பது சேர்ந்தோர் புன்கண் அஞ்சும் பண்பின் மென்கண் செல்வஞ் செல்வமென் பதுவே என்று பாடும் இலக்கியம் எது?

    விடையைக் காண்க

    நற்றிணை

69. "உறவினர் கெட வாழ்பவனின் பொலிவு அழியும்" என்று பாடியவர் யார்?

    விடையைக் காண்க

    பெருங்கடுங்கோ

70. செல்வம் என்பது சிந்தையின் நிறைவு___________

    விடையைக் காண்க

    நிறைவு

71. நிறைவடைகிறவனே செல்வன் என்று கூறுவது எது?

    விடையைக் காண்க

    சீன நாட்டுத் தாவோவியம்

72. பிறருக்கு உதவாமல் மனிதத்திற்குக் கொடும்பாவி கட்டுவது _____காலத்தில் இல்லை.

    விடையைக் காண்க

    சங்க

73. ______________ சிறந்த அறமாகச் சங்க இலக்கியங்கள் பேசுகின்றன.

    விடையைக் காண்க

    வாய்மையை

74. வாய்மை பேசும் நாவே உண்மையான நா என்ற கருத்தை வலியுறுத்தும் வரிகள் யாவை?

    விடையைக் காண்க

    பொய்யா செந்நா, பொய்படுபறியா வயங்கு செந்நா

75. _______ ஓர் அதிசயத் திறவுகோல் என்பார்கள்

    விடையைக் காண்க

    நாக்கு

76. இன்பத்தின் கதவைத் திறப்பதும் துன்பத்தின் கதவைத் திறப்பதும் எது?

    விடையைக் காண்க

    நாக்கு

77. ______ பேசும் நா மனிதனை உயர்த்துகிறது.

    விடையைக் காண்க

    மெய்

78. ______ பேசும் நா மனிதனைத் தாழ்த்துகிறது

    விடையைக் காண்க

    பொய்

79. 'பிழையா நன்மொழி' என்று வாய்மை பற்றிக் குறிப்பிடும் நூல் எது?

    விடையைக் காண்க

    நற்றிணை

80. நிலம் புடை பெயர்ந்தாலும் ____ சொல்லக்கூடாது

    விடையைக் காண்க

    பொய்

81. தாம் சிந்திக்காமல் பிறர் சொல்ல அறியும் அறம்  _______தரமானது

    விடையைக் காண்க

    மூன்றாம்

82. சிந்தித்து அறிந்து கொள்ளும் அறம்  _______தரமானது

    விடையைக் காண்க

    இரண்டாம்

83. இயல்பாக அறியும் அறம்  ______தரமானது

    விடையைக் காண்க

    முதல்

84. சங்க இலக்கியங்கள் காட்டும் அறங்கள் இயல்பான _______ தரமான அறங்கள்.

    விடையைக் காண்க

    முதல்

85. போதிதர்மர் எந்த நூற்றாண்டில் சீனாவிற்குச் சென்றார்?

    விடையைக் காண்க

    6

86. போதிதர்மர் சீனாவில் எந்தத் தத்துவத்தைப் போதித்தார்?

    விடையைக் காண்க

    பவுத்த சமயத் தத்துவத்தின் ஒரு பிரிவு

87. ஜென் தத்துவம் உருவாகக் காரணமானவர் யார்?

    விடையைக் காண்க

    போதிதர்மர்

88. போதிதர்மர் யார்?

    விடையைக் காண்க

    கிபி ஆறாம் நூற்றாண்டில் வாழ்ந்த காஞ்சி மாநகரத்துச் சிற்றரசர்

89. போதி தர்மருக்கு சீனர்கள் செய்த கைம்மாறு என்ன?

    விடையைக் காண்க

    போதி தர்மருக்குச் சீனர்கள் கோவில் கட்டிச் சிலை வைத்து இன்றளவும் வணங்கி வருகின்றனர்.

90. ஜென் தத்துவம் எதிலிருந்து உருவானது?

    விடையைக் காண்க

    போதி தர்மரின் தத்துவப் போதனையில் இருந்து

Purananuru (Poetry): Class 9 Tamil Chapter 1.2 Explained | குடபுலவியனார்

இயற்கை – உ | கவிதைப் பேழை

கவிதைப்பேழை: புறநானூறு

- குடபுலவியனார்

நுழையும்முன்

நிலம், நீர், காற்று என்பவை மனிதனின் அடிப்படைத் தேவைகளாகும். இயற்கை நமக்குக் கொடையாகத் தந்திருக்கும் இவற்றை உரிய முறையில் பேணிப் பாதுகாக்க வேண்டும். நீரின் இன்றியமையாமையை உணர்ந்த நம் முன்னோர்கள், நீர்நிலைகளை உருவாக்குபவர்களை "உயிரை உருவாக்குபவர்கள்" என்று போற்றினர்.

வான் உட்கும் வடிநீண் மதில்,

மல்லல் மூதூர் வய வேந்தே!

செல்லும் உலகத்துச் செல்வம் வேண்டினும்

ஞாலம் காவலர் தோள்வலி முருக்கி,

ஒருநீ ஆகல் வேண்டினும், சிறந்த

நல்லிசை நிறுத்தல் வேண்டினும், மற்றுஅதன்

தகுதி கேள்இனி மிகுதி ஆள!

நீர்இன்று அமையா யாக்கைக்கு எல்லாம்

உண்டி கொடுத்தோர் உயிர் கொடுத்தோரே!

உண்டி முதற்றே உணவின் பிண்டம்;

உணவெனப் படுவது நிலத்தொடு நீரே;

நீரும் நிலமும் புணரியோர், ஈண்டு

உடம்பும் உயிரும் படைத்திசினோரே!*

வித்திவான் நோக்கும் புன்புலம் கண்ணகன்

வைப்பிற்று ஆயினும், நண்ணி ஆளும்

இறைவன் தாட்கு உதவாதே ! அதனால்

அடுபோர்ச் செழிய! இகழாது வல்லே;

நிலன் நெளிமருங்கின் நீர்நிலை பெருகத்

தட்டோர் அம்ம ! இவண் தட்டோரே!

தள்ளாதோர் இவண் தள்ளா தோரே!

(புறம் 18:11 – 30)

(பாண்டியன் நெடுஞ்செழியனைப் பாடியது)

திணை: பொதுவியல் துறை: முதுமொழிக்காஞ்சி

பாடலின் எளிய உரை

விண்ணை முட்டும் திண்ணிய நெடுமதில்

வளமை நாட்டின் வலிய மன்னவா

போகும் இடத்திற்குப் பொருள்

உலகம் வெல்லும் ஒரு தனி ஆட்சி

வாடாத புகழ் மாலை வரவேண்டுமென்றால்

தகுதிகள் இவைதாம் தவறாது தெரிந்துகொள்

உணவால் ஆனது உடல்

நீரால் ஆனது உணவு

உணவு என்பது நிலமும் நீரும்

நீரையும் நிலத்தையும் இணைத்தவர்

உடலையும் உயிரையும் படைத்தவர்

புல்லிய நிலத்தின் நெஞ்சம் குளிர

வான் இரங்கவில்லையேல்

யார் ஆண்டு என்ன

அதனால் எனது சொல் இகழாது

நீர்வளம் பெருக்கி நிலவளம் விரிக்கப்

பெற்றோர் நீடுபுகழ் இன்பம் பெற்றோர்

நீணிலத்தில் மற்றவர் இருந்தும் இறந்தும்

கெட்டோர் மண்ணுக்குப் பாரமாய்க் கெட்டோர்

பொதுவியல் திணை

வெட்சி முதலிய புறத்திணைகளுக் கெல்லாம் பொதுவான செய்திகளையும் முன்னர் விளக்கப்படாத செய்திகளையும் கூறுவது பொதுவியல் திணையாகும்.

முதுமொழிக்காஞ்சித் துறை

அறம், பொருள், இன்பம் என்னும் முப்பொருளினது உறுதி தரும் தன்மையைக் கூறுதல்.

சொல்லும் பொருளும்

• யாக்கை - உடம்பு
• புணரியோர் - தந்தவர்
• புன்புலம் - புல்லிய நிலம்
• தாட்கு - முயற்சி, ஆளுமை
• தள்ளாதோர் இவண் தள்ளாதோரே - குறைவில்லாது நீர் நிலை அமைப்பவர்கள் குறைவில்லாது புகழுடையவர்களாக விளங்குவார்கள்.

பாடலின் பொருள்

வான்வரை உயர்ந்த மதிலைக் கொண்ட பழைமையான ஊரின் தலைவனே! வலிமை மிக்க வேந்தனே! நீ மறுமை இன்பத்தை அடைய விரும்பினாலோ உலகு முழுவதையும் வெல்ல விரும்பினாலோ நிலையான புகழைப் பெற விரும்பினாலோ செய்ய வேண்டியன என்னவென்று கூறுகிறேன். கேட்பாயாக!

உலகில் உள்ள யாவற்றையும் மிகுதியாகக் கொண்டு விளங்கும் பாண்டிய நெடுஞ்செழியனே! நீர் இன்றி அமையாத உடல் உணவால் அமைவது; உணவையே முதன்மையாகவும் உடையது. எனவே உணவு தந்தவர் உயிரைத் தந்தவர் ஆவர்.

உணவு எனப்படுவது நிலத்துடன் நீரும் ஆகும். நிலத்தையும் நீரையும் ஒன்று சேர்த்தவர் இவ்வுலகில் உடலையும் உயிரையும் ஒன்று சேர்த்தவர். நெல் முதலிய தானியங்களை விதைத்து மழையைப் பார்த்திருக்கும் பரந்த நிலமாயினும் அதனைச் சார்ந்து ஆளும் அரசனின் முயற்சிக்குச் சிறிதும் உதவாது. அதனால், நான் கூறிய மொழிகளை இகழாது விரைவாகக் கடைப்பிடிப்பாயாக.

நிலம் குழிந்த இடங்கள் தோறும் நீர்நிலையைப் பெருகச் செய்தல் வேண்டும். அவ்வாறு நிலத்துடன் நீரைக் கூட்டியோர் மூவகை இன்பத்தையும் நிலைத்த புகழையும் பெறுவர். இதைச் செய்யாதவர் புகழ் பெறாது வீணே மடிவர்.

இலக்கணக்குறிப்பு

• மூதூர், நல்லிசை, புன்புலம் - பண்புத்தொகைகள்
• நிறுத்தல் - தொழிற்பெயர்
• அமையா - ஈறுகெட்ட எதிர்மறைப் பெயரெச்சம்
• நீரும் நிலமும், உடம்பும் உயிரும் - எண்ணும் மைகள்
• அடு போர் - வினைத்தொகை
• கொடுத்தோர் - வினையாலணையும் பெயர்

பகுபத உறுப்பிலக்கணம்

நிறுத்தல் - நிறு + த் + தல்

நிறு - பகுதி

த் - சந்தி

தல் - தொழிற்பெயர் விகுதி

கொடுத்தோர் - கொடு + த் + த் + ஓர்

கொடு - பகுதி

த் - சந்தி

த் - இறந்தகால இடைநிலை

ஓர் – பலர்பால் வினைமுற்று விகுதி

நூல்வெளி

எட்டுத்தொகை நூல்களுள் ஒன்று புறநானூறு. இது பண்டைய வேந்தர்களின் வீரம், வெற்றி, கொடை குறித்தும் குறுநில மன்னர்கள், புலவர்கள், சான்றோர்கள் உள்ளிட்டவர்களின் பெருமைகளைப் பற்றியும் அன்றைய மக்களின் புறவாழ்க்கையைப் பற்றியும் கூறுகிறது. இந்நூல் பண்டைத் தமிழர்களின் அரிய வரலாற்றுச்செய்திகள் அடங்கிய பண்பாட்டுக் கருவூலமாகத் திகழ்கிறது.

---

குளம்தொட்டுக் கோடு பதித்து வழிசீத்து
உளம்தொட்டு உழுவயல் ஆக்கி - வளம்தொட்டுப்
பாகுபடும் கிணற்றோடு என்று இவ்வைம் பாற்படுத்தான்
ஏகும் சொர்க்கத்து இனிது

- சிறுபஞ்சமூலம் 64