கடலோர பாதுகாப்பை வலுப்படுத்த வேண்டும்: ரஜினிகாந்த் வேண்டுகோள்
"நம் நாட்டின் அமைதி, நிம்மதி மற்றும் மகிழ்ச்சியை சீர்குலைக்க பயங்கரவாதிகள் கடல் வழியாக ஊடுருவி நாச வேலைகள் செய்ய வாய்ப்புள்ளது."
இதற்கு உதாரணமாக, 26/11 மும்பை தாக்குதல் சம்பவங்களை சுட்டிக்காட்டிய ரஜினிகாந்த், அந்த கொடூர தாக்குதலில் சுமார் 175 பேர் கொல்லப்பட்டதை மிகுந்த வேதனையுடன் நினைவு கூர்ந்துள்ளார்.
கடலோரப் பகுதிகளில் வசிக்கும் மக்கள் மிகவும் விழிப்புணர்வுடன் இருக்க வேண்டும் என்றும், சந்தேகத்திற்கிடமான நபர்கள் அல்லது படகுகள் நடமாட்டம் இருந்தால் உடனடியாக அருகிலுள்ள காவல் நிலையத்தில் புகார் அளிக்க வேண்டும் என்றும் அவர் கேட்டுக்கொண்டுள்ளார்.
இந்த விழிப்புணர்வை மக்கள் மத்தியில் ஏற்படுத்தும் ஒரு சிறப்பான முயற்சியாக, மத்திய தொழில் பாதுகாப்புப் படையின் (CISF) 100 வீரர்கள், மேற்கு வங்கத்திலிருந்து கன்னியாகுமரி வரை சுமார் 7,000 கிலோ மீட்டர் தூரம் சைக்கிள் பேரணி மேற்கொண்டு வருகின்றனர்.
சிஐஎஸ்எஃப் வீரர்களின் இந்த மகத்தான முயற்சிக்கு அனைவரும் ஆதரவு அளிக்க வேண்டும் என்றும், அவர்கள் உங்கள் ஊர்களுக்கு வரும்போது அவர்களுக்கு சிறப்பான வரவேற்பு அளிக்க வேண்டும் என்றும் ரஜினிகாந்த் வேண்டுகோள் விடுத்துள்ளார்.
